Read turkana Esekiel 37 Bible Online

Esekiel 37 - turkana bible

Esekiel 37

¹Katikokin ayong agogongu a Ekapolon Akuj sodi kayau etau keng ayong kewaak nadipo na eleleba ngakoyo.

²Kesirim ngesi ayong ngakoyo nguna. Ekoe, alalak ngakoyo nguna noi, nabo aokito deu.

³Katolimok ngesi ayong tama, “Itwaan, epedorete ngakoyo nugu akiyar a?” Atatachu ayong atama, “Wae Ekapolon lo irai Ekapolon Akuj, iyong bon iyeni nguna!”

⁴Katolimok nabo tama, “Todwar ani a ngakoyo kanu. Tama iyong kesi, ‘Ee ngakoyo na iokito, kiirasi akiroit a Ekapolon Akuj.

⁵Ebala Ekapolon lo erai Ekapolon Akuj esi kona: Kingolikisi, kewaakini ayong esi akienget toyara.

⁶Kewaakini ayong esi ngamori ka akiring dio katoburuchik amuny. Kewaakini ayong esi akienget toyara, toyeneta atamar arai ayong Ekapolon Akuj.’ ”

⁷Sodi atodwar ayong loger lo kadungokinitere. Ani eringa adwari, eira eruye, tochunun ngakoyo wapei! Kimorikin akoit ka akoit nache na ikwaanatar!

⁸Ani akienyikini, engolik ngamori kepean nakoyo, kebu akiring dang min, toburuchia amuny. Nakaneni peayerete kesi.

⁹Katolimok Akuj ayong tama, “Itwaan, kasio todwar akianget, todwar tolimok ekuwam atamar abala ayong Ekapolon lo arai Ekapolon Akuj kona: Ee akianget, tokut alowaitin aluomwon kadaang kiangak ngawat nakatoak nugu toyaruneta.”

¹⁰ Sodi atodwar ayong loger lo kalimokinitere. Tolom akianget nikech toyara. Towaa kesi. Arai ibore ajore natiapolon.

¹¹Ani erumor katolimok Akuj ayong tama, “Itwaan, eraakasi ngakoyo nugu Ngisirael daang etia ni etia. Ebalasi kesi, ‘Eokito ngakoyo kosi. Emam sua akigieno, kimunyar sua pil.’

¹²Tokona bocha, todwar tolimok ngitunga kang Ngisirael atamar abala ayong Ekapolon lo arai Ekapolon Akuj kona: Kingolikisi a, angaari ayong ngalielin kus keteyaru esi analielin kus, ngitunga kang. Kayauni esi nawi nakwap a Isirael.

¹³Ee ngitunga kang, iyenunete esi atamar arai ayong Ekapolon Akuj na angaarea ayong ngalielin kus keteyaru esi analielin.

¹⁴Ewaakini ayong etau kang nikus toyara. Kewaakini ayong esi nakwap kus a ngikulepek. Toyeneta atamar alimu ayong Ekapolon Akuj, nabo asubak nguna. Ayong Ekapolon Akuj alimu nguna.”

¹⁵Katolimok ayong Ekapolon Akuj akiroit tama,

¹⁶“Itwaan, tolem akitoe kigirak ngakiro nugu, ‘Aka Yuda ka Ngisirael daang lua ekitela a Yuda.’ Sodi tolem akitoe ache kigirak kona, ‘Aka Yosep (akitoe a Epiraim) ka Ngisirael daang lua ekitela a Yosep.’

¹⁷Ani erumor tokonyak ngakiro naarei nguna anakan kon tosubut kori akitoe apei.

¹⁸Ani etamarete ngitunga kon iyong, ‘Nyo pekilimokinea iyong sua eger a ngakiro kanu?’

¹⁹Tolimok iyong kesi atamar ebala Ekapolon lo erai Ekapolon Akuj kona: Edikino ayong alemuni akitoe na eweikinit Yosep na eyei nakan a Epiraim ka ngitela a Isirael, emorik ka na eweikinit Yuda. Etiliwori ayong ngakito naarei nguna akitoe apei atoting a akan kang.

²⁰“Ani itingit ngakito naarei nguna a akan, iteete ngitunga,

²¹tolimok kesi atamar abala ayong Ekapolon lo arai Ekapolon Akuj kona: Kingolikisi a, epuduni ayong ngitunga kang daang Ngisirael alobukui alu kolong aloose kesi. Achununi ayong kesi alowaitin kadaang atobuu nakwap kech a ngikulepek.

²²Emorikini ayong kesi toliworos ebukut epei anakwap, alokidiama ngimoru a Isirael. Ekapolon epei eweikini kesi daang. Nyeringa kesi nabo eliworosi ngibukui ngiarei. Nyeringa nabo etiakio tarata ngapolosio ngaarei.

²³Nyeringa kesi nabo inyasunosi tarata lu nyitaleuno a ngakujo kech anasubuna ka ngakiro nakikadakinete kori nyeringa nabo inyasunosi a ngasechesea. Nakaneni ayuuni ayong kesi anasechesea kadaang nabo etaleu. Eliworosi ngitunga kang atoliwor ayong Akuj kech.

²⁴Ekasuban etich kang Daudi ngesi eliwor ekapolon kech. Emini kesi daang ekeyokon epei. Iwapete kesi ngitalio kang kirichut.

²⁵Elomete kesi nakwap nakolong ainakini ayong ekasuban etich kang Yakobo, nakwap nakolong alomito taapaakech. Elomete kesi neni jik ka ngide kech. Ekasuban etich kang Daudi ngesi eliwor ekapolon kech jik.

²⁶Emini ayong ka kesi achamunet a ekisil. Eliwor achamunet nakajik. Apiari ayong kesi etalala. Etowei ayong akai kang alokiding kech jik.

²⁷Alomi ayong kiding kech, atoliwor Akuj kech toliworos kesi ngitunga kang.

²⁸ Sodi toyena ngibukui atamar etaleu ayong Isirael ani etowea akai kang alokiding kech jik.”