Read turkana Esekiel 38 Bible Online

Esekiel 38 - turkana bible

Esekiel 38

¹Katolimok ayong Ekapolon Akuj akiroit tama,

²“Itwaan, todwar ngakiro naaronok ani a Gog, lo akwap a Magog. Erai ngesi ekapolon loapolon a ngibukui a Mechek ka Tubal. Tolimok ngesi

³atamar abala ayong Ekapolon lo arai Ekapolon Akuj kona: Ee Gog, kingolik, kanyoik ayong iyong, lo irai ekapolon loapolon a Mechek ka Tubal.

⁴Kamojirikini ayong iyong erepak ngikodo lokitinyo kon, sodi keurukukuyo ka ngasigerea kon daang, ka ngangolei, ta ngikameak ngangolei, enapito daang ngiworui lu esiritoe a ejie. Eraakasi kesi ajore etingito ngaupwala ka ngakwaaras.

⁵Ngasigerea a Persia ka Kuch ta Libia, irukito ka iyong, etingito daang ngaupwala ka ngapukoto.

⁶Ngikajwok daang a akwap a Gomer ka lua Bes Togarma alokwap, irukito ka iyong. Irukito iyong ka ngitunga lukaalak.

⁷Tonyoutu, tosubakinos. Iyong ka ngasigerea daang na irukito ka iyong. Toliwor iyong ekarikon kech.

⁸Adaunet a ngikaru alukaalak, ketonyouni ayong iyong tolot kitijik akwap na ngoon ayaunio ngitunga lukaalak lu apote alobukui toloma neni peemito ejie. Iremi iyong ngimoru a Isirael lukolong araakasi alaireng nikooyen, tarai elomito tokona ngitunga akaalimon.

⁹ Itilarete esi ngaren, iyong ka ngajorei kon daang ta ngibukui lukaalak itikokinosi akwap loger a ekuwam aloapolon, toburuchiasi akwap loger a edou.

¹⁰“Iyong Gog, abala ayong Ekapolon lo arai Ekapolon Akuj kona: Na enangea akolongit ngina, epete iyong ngitamen luaronok sodi totuk asubakin naaronok.

¹¹Ilimuni iyong tama, ‘Anyoikini ayong akwap na eyakasi ngadakarin na nyedukitoe ngawasea. Atikokin ngitunga lu ibooyete akaalimon, lu emam ngawasea ka ngidorin.’

¹²Ikokoi iyong ka angatar ebari a ngitunga alu elomito lorerea lukolong enyasunitae. Achununio kesi alobukui, emeto tokona ngibaren nabo etingito ngiboro. Elomito kesi nakiriamet a akwap.

¹³Ngitunga a Cheba ka Dedan ta ngimuchurus a ngirerea a Sipania, kingisete iyong tamasi, ‘Angatar ibunit iyong a? Ichununit iyong ngajorei kon angatar a, akiwok ngakwangae ka egolit ka ngaatuk ta ngiboro, angatar lugu daang a?’

¹⁴“Tokona bocha itwaan, tolimok Gog atamar abala ayong Ekapolon lo arai Ekapolon Akuj kona: Ani tokona iboikinosi ngitunga kang akaalimon, inyouni[31] iyong

¹⁵anipalem ibooyo alokwap aniti kaina. Irikuni iyong ngasigerea nakajwok nakaalak alobukui, edokito daang ngangolei.

¹⁶Itijikini iyong ngitunga kang Isirael totikokin loger a edou alo eburuchiarit akwap. Iyong Gog, na enangea ngirwa ngulu, ketonyouni ayong iyong tolot kitijik akwap kang, toyeneta ngibukui atamar ayong ngae, na etorunio ayong nikon edodiu akitaleuno kang anakonyen kech.

¹⁷Ikwa meere iyong itwaan nikolong eruoro ayong ngakiro keng a, nakolong esuruorea ngikasubak etich kang, lu araakasi ngikadwarak a Isirael atama ngirwa lu isidiuno, ameuni ayong itwaan kitijik Isirael a? Alimu ayong Ekapolon lo arai Ekapolon Akuj.”

¹⁸Ebala Ekapolon lo arai Ekapolon Akuj kona, “Akolongit na itijikinio Gog Isirael, angoi ayong noi.

¹⁹Alimunit ani ariraunea angoit kang atamar erikirikokini akwap alo Isirael lokojokon.

²⁰Emaranikinete ngikolea ka ngikieny, ka ngitieng, ka ngiborei lua ngalup ta ngitunga daang. Ee robo, emaranikinete kesi anakwap ani kakeritotor ayong. Eukorosi ngimoru, erimaunosi ngikipetetio ka ngawasea daang nalup.

²¹Anyarakini ayong Gog ebuloi daang. Alimu ayong Ekapolon lo arai Ekapolon Akuj. Ebongokinosi ngasigerea keng taaras a ngakwaaras kech a ngikulepek.

²²Erirae ayong ngesi a edeke aloaronon ka abukorit ngaakot. Alakakini akiru nakaalan ka na ngamoru, ka akim ta ngipip, potu daang kidiama keng ka ngasigerea keng ta ngibukui lukaalak lu ibakito ka ngesi.

²³Eger ngolo edodikinea ayong ngibukui lukaalak apolou kang ka akitaleuno kang. Toyeneta ngibukui lukaalak atamar arai ayong Ekapolon Akuj.”