Read turkana Esekiel 39 Bible Online

Esekiel 39 - turkana bible

Esekiel 39

¹Tolim Ekapolon lo erai Ekapolon Akuj tama, “Itwaan, todwar naaronok ani a Gog, alo erai ekapolon loapolon a ngibukui a Mechek ka Tubal, tolimok ngesi atamar abala ayong Ekapolon Akuj kona: Iyong Gog, kanyoik ayong iyong.

²Kamojirikini ayong iyong katoree lowae eche, sodi kepud alokwap anikalonan katoriko lomoru a Isirael.

³Ani erumor atanang akau kon tachakun anakan kon ana alokedieny, atanang ngimalea tachakun ana aloteten.

⁴Iyong ka ngasigerea kon ta ngitunga lu irukitotor, ibusokinosi lomoru a Isirael totoaka. Emiekini ayong ngikieny ka ngitieng a moding tanyama ngawat kus.

⁵Ibusokinosi esi naro, kainyo alimu ayong Ekapolon lo arai Ekapolon Akuj.

⁶Enokakini ayong akwap a Magog akim ka ngikwaasea a anam ni ibooyoto ngitunga akaalimon. Toyena atamar arai ayong Ekapolon Akuj.

⁷Eteyeni ayong ngitunga kang Isirael ekiro kang lo italeuno nabo nyemiekini ayong ekiro kang isurumio ngileech nabo. Toyeneta ngibukui atamar arai ayong Ekapolon Akuj na arai Akuj a Isirael na etaleuno.”

⁸Tolim Ekapolon lo erai Ekapolon Akuj tama, “Iteni dir ebunit akolongit na abala ayong.

⁹Sodi tonyout ngitunga lu elomito lorerea a Isirael toloto tochunut ngiboro lujiet lu aisikinio kichunyakis akim, kinoma ngaupwala ka ngakawa, ka ngimalea ka ngamorokin ta ngakwaaras. Etukokinete kesi ngiboro ngulu kirirakis ngakimea na irikarete ngikaru ngikan-kaarei.

¹⁰Nyiitanete kesi akikeyen ngakito nabo, kori akitub ngakiro anamoni, kainyo elalakearosi ngiboro ngulu irirakinete akim. Ekokoyete kesi ka angatar ngiboro a ngitunga alu kolong akokoyete ka angatar ngiboro kech. Alimu ayong Ekapolon lo arai Ekapolon Akuj.”

¹¹Ebala Ekapolon Akuj, “Akolongit ngina, ainakini ayong Gog ewae lo enukakinio alo Isirael, ni enyaritae Adipo a Ngikalotok ni eyei kide anam a Amakat. Egolori erot a ngikalotok, kainyo enukakinio Gog ka ngajorei keng daang neni. Enyarao adipo ngina ‘Adipo a ngajorei a Gog.’

¹²Irikarete Ngisirael ngilapio ngikan-kaarei enukete kesi, sodi kitaleunioto akwap.

¹³Enukete ngitunga a akwap daang kesi. Einakinete ngakiro nguna kesi ekipur akolongit na edodiunea ayong apolou kang. Alimu ayong Ekapolon lo arai Ekapolon Akuj nguna.

¹⁴Adaunet a ngilapio alukan-kaarei kangulu, eseunio ngitunga kirimokis akwap esakete ngawat[32] na eringa eperete analup, tonuka, sodi kitaleunioto akwap.

¹⁵Ani irimito kesi akwap, nacha eriamuneta akoit a itwaan, kitowaa ibore ni idodiuni alokwaas, ani epote ngikanukak, yaasi tonukakis Nadipo a ngajorei a Gog. (

¹⁶Emini tani ere diyete neni lo enyarao ngajorei a Gog.) Sodi kitaleun akwap nabo.”

¹⁷Katolimok Ekapolon lo erai Ekapolon Akuj ayong tama, “Itwaan, tanyarau ngikieny daang ka ngitieng tolimok tama, ‘Tochununos alowaitin kadaang pot nakipeyos nakasubakinit ayong esi. Eliwor ekimuje lotikaalan alomoru a Isirael. Inyamete esi akiring tamata ngaakot.

¹⁸Inyamete esi akiring a ngasigerea anakajwok, tamata ngaakot a ngikapolok a akwap, alu kolong aario loger a ngimesekin aluapolok kori a aluuchik, kori a ngaanei kori loger a ngimongin aluatumak.

¹⁹Na aarea ayong ngitunga ngulu loger a ngakipeyos, inyamete esi nikatoronon kiyelayelakinos, tamata ngaakot kimatamatakinos.

²⁰ Kisimwokio esi alomeesa kang akiring a ngangolei ka na ngikameak ngangolei ka ngasigerea ta ngikajwok. Alimu ayong Ekapolon lo arai Ekapolon Akuj nguna.’ ”

²¹Tolim Ekapolon Akuj tama, “Esingolikini ayong ngibukui apolou kang, edodik eger lo atubio ayong ngakiro eriyan a agogongu kang.

²²Napei kaneni jik, eyenunete Ngisirael atamar arai ayong Ekapolon Akuj na arai Akuj kech.

²³Eyenunete ngibukui atamar arikio Ngisirael nakwap nache kotere ngasechesea kech nakasubeta ayong. Atomulen ayong kesi emiek ngimoe kech idwangete kesi taarae a akwara.

²⁴Ani amuleni ayong kesi atosubea ngakiro na etemem ka elos kech ta aronis.”

²⁵Tolim Ekapolon lo erai Ekapolon Akuj tama, “Nakaneni kesieniyete tokona ayong Ngisirael, lu eraakasi ngalesea a Yakobo, atobuak kesi ajako kech. Erichunit ayong ekiro kang lo italeuno.

²⁶Na moi elometa kesi nakwap kech a ngikulepek akaalimon, imuriakinete ngileech kech ka naaronok nakolong kasubeta kesi ayong. Emam itwaan itoemi kesi.

²⁷Abuuni ayong kesi alobukui atochun anakwapea a ngimoe kech sodi edodiunea akitaleuno kang anakonyen a ngibukui alukaalak.

²⁸Toyeneta ngitunga kang atamar arai ayong Ekapolon Akuj na arai Akuj kech, kainyo ameari kolong ayong kesi tarata ngirikon alobukui dio atobuu nabo nakwap kech a ngikulepek. Nyemiekini tani ipei kech idongi kiding ngibukui nabo.

²⁹Nyeringa nabo amuleni kesi, pearai abukokini ngitunga kang Ngisirael etau kang. Alimu ayong Ekapolon Akuj na arai Akuj.”