Read turkana Esekiel 4 Bible Online

Esekiel 4 - turkana bible

Esekiel 4

¹Katolimok Akuj ayong tama, “Itwaan, tolem ematapar kiwaak ngaren kon. Kigerok ere a Yerusalem.

²Kidodiu atamar iriamitae ani igerokinio ngapanya, ka ngakatiputipui, ka ngadakarin ta ngasua naukonorete kiriama ere.

³Tolem asuat nadapal kitowo alokiding kon ka ere. Kingolia lowae lo a ere alo iriamitae. Iyong ngesi iriamit ere. Eraakasi nguna emachar lo edodiun ani a Ngisirael.

⁴“Ani erumor kinapakin a esiep kon alo alokedieny. Edokokini ayong[4] eriras a Isirael kidiama kon. Ngirwa ngulu daang, lu iperio iyong kaneni, idaki iyong eriras kech.

⁵Katiakakinit ngirwa ngamiae ngauni ka ngitomwon-koomwon, lu eriyan ka ekimar a ngikaru a eriras kech. Ngirwa ngulu daang idaki iyong eriras kech.

⁶Ani edaun ngirwa ngulu, inapakin iyong nabo, a esiep kon alo aloteten, tadak eriras a ngitunga a Yuda. Katiakakini ayong iyong ngirwa ngitomwon-omwon, akolongit apei lokaru epei a eriras kech.

⁷“Tokienyia lowae lo iriamitere Yerusalem, kitorwaa akan na emam ibore eyei, sodi todwar ngakiro naaronok kotere Yerusalem.

⁸Kingolik a, kaeni ayong iyong a ngaunoi, sodi nyiibeloonor iyong alosiep a epei kinapakin aloche, tanang edaun ngirwa lu iriamitere Yerusalem.

⁹“Tolem tokona ngakanoi, ka erau, ka ngimare, ka auk a ngimare, ka ngimomwa ta ngakima. Kimorimorik daang kidorok ngamugati. Akimuj ngina ngesi inyami iyong ngirwa ngamiae ngauni ka ngitomwon-koomwon lu iperio iyong a esiep.

¹⁰Akolongit apei, kitemokinio iyong ngamugati ngagiramea ngamiae ngaarei ka ngatomwon-uni, itemokin akimuj ngina tanang akolongit nache.

¹¹Itemio tani ngakipi na imasi iyong. Imasi iyong ngikopoi ngiarei akolongit apei.

¹²Inokakini iyong akim a ngachin a ngitunga kitaatanea ngamugati iteete ngitunga, ani erumor tanyam.”

¹³Tolim Ekapolon Akuj tama, “Idodiunito ngakiro nguna eger lo moi enyameta Ngisirael akimuj na italeo akinyam,[5] anakwapea ana apetari ayong kesi.”

¹⁴Sodi atatachu ayong atama, “Wae Ekapolon lo irai Ekapolon Akuj! Nyinyasuna ayong akwaan kang nakanuan. Napei alokiditeu nyenyama ayong jik akiring a ibarasit ani etoani bon kori ani earete ngitieng a moding. Nyenyama ayong nakanuan akimuj na nyitaleunitoe.”

¹⁵Abu Akuj tama, “Kasio robo. Kemiekini ayong iyong kinokak akim a ngawar a ngaatuk, meere a ngachin a ngitunga, sodi kitaatanea ngamugati.”

¹⁶Katolimok Akuj ayong nabo tama, “Itwaan, kingolik a, atubori ayong akimuj alo Yerusalem. Enyamete kesi akimuj na itemitoe niti eemito, sodi tamata ngakipi na idokio niti ichanasi.

¹⁷Edaun akimuj kech ka ngakipi. Ejalunosi kesi tolilimiyosi kotere ngasechesea kech.”