Read turkana Esekiel 40 Bible Online

Esekiel 40 - turkana bible

Esekiel 40

¹Arai akolongit na ngatomon a ekaru alokitetet, alo arai ekaru lo a ngitomwon-arei ka ngikan a arikonot kosi, tarai ekaru lo a ngitomon ka nguomwon napei elemario Yerusalem. Akolongit napei ngina, katotikokin ayong agogongu a Ekapolon Akuj.

²Abu Akuj kayaa ayong anakisingolikinet tanang nakwap a Isirael, kewaak moru lotikooyen. Ewae lo alokuju emoru ngolo, ayei adukuoru na asibit ere.

³ Naketaapiarea ngesi ayong inaa, engolik itwaan ni amalimali loger a asuat ananyang. Atingit ngesi auno nawaru nakitemiet ka akitoe nakitemiet. Awei ngesi alokidor.

⁴Katolimok itwaan ngini ayong tama, “Itwaan, kingolik a ngakonyen kon, kiira a ngaki kon. Tochoia alotau ngakiro daang nakedodikini ayong iyong, kainyo kiyaun iyong nege sodi kedodik ayong iyong ngakiro nugu. Kiruor ngakiro daang na ingolikini iyong, tolimok Ngisirael.”

⁵Engolik akai a Akuj iriamit awas. Tolem itwaan ngini akitoe keng nakitemiet na arai aoyau keng ngamitae ngauni, dio kitemio awas. Arai aoyau na alokidiama a awas ngamitae ngauni, tarai alangirir ngamitae ngauni.

⁶Tolot ngesi lokidor lo alokide todoka nadoket kitem ni elomunere, arai ngamitae ngauni elosi nalup.

⁷Ngamaniyae na ayakasi lokwaasea ariyan ngiwaitin daang arai ngamitae ngauni-uni. Ngawasea na atiakito ngamaniyae nguna arai alangirir kech ngamitae ngaarei ka anus. Yaaye ngamaniyae nguna ayei erot lo elosere namaniyat naapolon na ekienyikina ka akai a Akuj. Arai aoyau a erot kangolo ngamitae ngauni.

⁸Kitem ngesi amaniyat ngina,

⁹arai ngamitae ngoomwon elosi nalup. Neni arai esal a ekidor alowae alo ekienyikina ka akai a Akuj. Arai alangirir a ngiwaitin keng alosal amita apei. (

¹⁰ Ariyan ngamaniyae na ayakasi lokwaasea a erot daang, nabo ariyan alangirir a ngikwaasea kech.)

¹¹Ani erumor kitem itwaan ngini abalanyany a erot alo elosi lokidor. Arai daang ngamitae ngakan-kapei ka anus. Alolomu na atiakit ngidorin arai ngamitae ngakan.

¹²Ngaren ngamaniyae nguna, ayei awas nauriyen arai aoyau ngasentimitae ngatomwon-kan. (Ariyan ngamaniyae araakasi ngiwaitin daang ngamitae ngauni-uni.)

¹³Ani erumor kitem ngesi alonis napei alokamanakete amaniyat apei tanang kamanakete nache iwapit erot lo elomarere, toliwor ngamitae ngatomon ka ngaarei ta anus.

¹⁴Amaniyat na esal ngesi epudorere nawas na anikalapatan. Kitem ngesi amaniyat toriam erai abalanyany keng ngamitae ngatomon.

¹⁵Erai aoyau daang a erot alo ekidor napei anawas ana anikalapatan tanang lokwaas lokayaaye amaniyat na esal, erai ngamitae ngatomwon-arei ka ngakan.

¹⁶Ayakasi ngipukei kamanakete ngamaniyae ka kiding alotooma. Echietae asir a ngingolea lokwaasea lu alotooma lu ekienyikina ka erot lo epudorere.

¹⁷Katoriko itwaan ngini ayong kesitor lokidor atopudosi nalaar na anikalapatan. Adukitoe ngamaniyae ngatomwon-uni atapakina nalaar na anikalapatan. Ngaren ngamaniyae nguna, etakitae ngamoru nikalapatan,

¹⁸kiloda alaar. Atiyaara alaar na anikalapatan akidwang na alotooma.

¹⁹Ekeuna ni elomunere nalaar na alotooma. Kitem itwaan ngini alonis a ngidorin aluarei kangulu toliwor ngamitae ngatomwon-kan. Kengarenik ngesi ayong tolot kwap.

²⁰Ayei neni ekidor lo anikalapatan lo engoliarit kwap. Kitem itwaan ngini aoyau ka abalanyany a ekidor kangolo.

²¹Ngamaniyae nauni na ayakasi lokwaas a erot, ka ngikwaasea lu atiakito kesi ta amaniyat naapolon, ariyan daang ka lua ekidor alo alotoo. Arai aoyau daang a erot a ekidor ngamitae ngatomwon-arei ka ngakan tarai abalanyany ngamitae ngatomon ka ngaarei ka anus.

²²Amaniyat naapolon, ka ngipukei ta ngingolea lu echietae ekwaan ka lua ekidor alo alokide. Ayakasi ngadoket ngakan-kaarei na elosere lokidor toyei amaniyat naapolon losal akienyiarit nalaar.

²³Angedakina erot eche tooma alaar napei alokidor alo alokwap tanang lokidor eche lo elomarere nalaar na alotooma, ekwaan ka lua ewae alo alokide. Kitem ngesi alonis a ngirotin kangulu, arai ngamitae ngatomwon-kan.

²⁴Ani erumor katoriko itwaan ngini ayong lowae loa lokuju, engolik ayong ekidor kaina. Kitem ngesi ekidor ngolo, ariyan ka luche.

²⁵Ayakasi ngipukei namaniyae na erot a ekidor kangolo lu ekwaan ka luche. Arai aoyau daang a erot kangolo ngamitae ngatomwon-arei ka ngakan tarai abalanyany ngamitae ngatomon ka ngaarei ta anus.

²⁶Ayakasi ngadoket ngakan-kaarei na elosere lokidor, tokienyiarite amaniyat keng naapolon nalaar. Echietae asir a ngingolea lokwaasea lu alotooma lu akienyikina ka erot.

²⁷Ayei nalaar na alotooma erot lo akienyiarit kuju. Kitem ngesi tani erot lo alokuju ngolo, arai ngamitae ngatomwon-kan, napei alokidor alo anikalapatan tanang loa lotooma.

²⁸Katoriko itwaan ngini ayong kesitor lokidor lo alokuju, kelomak nalaar na alotooma. Kitem ngesi ekidor ngolo, ariyan ka ngidorin lua alaar ana anikalapatan.

²⁹Ngamaniyae na ngikwaasea, ka amaniyat naapolon ta ngikwaasea lu alotooma ariyan ka lua ngidorin aluche. Ayakasi ngipukei namaniyae keng. Arai aoyau daang ngamitae ngatomwon-arei ka ngakan tarai abalanyany ngamitae ngatomon ka ngaarei ta anus.

³⁰Ayakasi ngamaniyae eriamito. Arai aoyau kech ngamitae ngatomon ka ngaarei tarai abalanyany ngamitae ngaarei ka anus.

³¹Akienyiarit amaniyat naapolon nalaar na anikalapatan. Echiekinitae asir a ngingolea lokwaasea a erot. Ayakasi ngadoket ngakan-kauni na elosere lokidor ngolo.

³²Katoriko itwaan ngini ayong kesitor nalaar na alotooma, lokidor lo alokide. Kitem ngesi ekidor, ariyan ka luche.

³³Ngamaniyae na ngikwaasea ka amaniyat naapolon ta ngikwaasea lua lotooma, ariyan ka lua ngidorin aluche. Ayakasi ngipukei eriamito, tani namaniyat naapolon. Arai aoyau daang ngamitae ngatomwon-arei ka ngakan tarai abalanyany ngamitae ngatomon ka ngaarei ta anus.

³⁴Akienyiarit amaniyat naapolon nalaar na anikalapatan. Echiekinitae asir a ngingolea lokwaasea a erot. Ayakasi ngadoket ngakan-kauni na elosere lokidor ngolo.

³⁵Ani erumor katoriko itwaan ngini ayong lokidor loa lokwap. Kitem toriam eriyan ka luche.

³⁶Ayakasi neni dang ngamaniyae na ngikwaasea na isiritoe ngikwaasea lua lotooma, ka amaniyat naapolon ta ngipukei iriamito. Arai aoyau keng daang ngamitae ngatomwon-arei ka ngakan tarai abalanyany ngamitae ngatomon ka ngaarei ta anus.

³⁷Akienyiarit amaniyat naapolon[33] nalaar na anikalapatan. Echiekinitae asir a ngingolea lokwaasea a erot. Ayakasi ngadoket ngakan-kauni na elosere lokidor ngolo.

³⁸Nalaar na anikalapatan, ayei imaniyat ni ekobara lokidor lo alaar ana alotooma. Atapakina imaniyat ngini namaniyat naapolon akienyikinit alaar. Neni ngesi elotanarere akiring a ngibaren alu a ngakipeyos ana inomio elemwaaka.

³⁹Namaniyat naapolon ngina, ayakasi ngimeesae ngiarei lokwaas epei, ngiarei lokwaas loche. Angolanakinio ngibaren lu ipeyeo lomeesae ngulu, kerai lu inomio elemwaaka, kori ngakipeyos na elemarere akisech, kori na atachanot.

⁴⁰Nikalapatan ni elosere lokidor lo alokwap, ayakasi ngimeesae ngiarei lowae epei, toyakas ngiarei lowae loche a amaniyat ana ayei lokidor.

⁴¹Araakasi ngimeesae daang lu angolanakinio ngibaren lu ipeyeo, ngikan-kauni. Ngimeesae nguomwon tooma amaniyat, nguomwon nikalapatan.

⁴²Ngimeesae luomwon lu ayakasi namaniyat na atapakinitae nalaar, lu angolanakinio ngibaren lu epeyeo elemwaaka, akulunitae ngimeesae ngulu anamoru. Arai aoyau kech na alokidiama ngasentimitae ngatomwon-kan. Ariyan ngiwaitin lu alokidiama arai ngasentimitae ngatomwon-kaarei ka ngakan. Ngiboro daang lungolet ngibaren ngulu, ekachio lomeesae ngulu.

⁴³Akodakinitae ngikodo lomeesae ngulu eriamito. Arai alangirir a ngikodo kangulu ngamilimitae ngatomwon-kaarei ka ngakan. Ekachio akiring a ngakipeyos daang lomeesae ngulu.

⁴⁴Ani erumor katoriku itwaan ngini ayong anikalapatan kelomak nalaar na alotooma. Ayakasi ngamaniyae ngaarei na angaara nalaar na alotooma. Akienyiarit apei kuju alodiyete ekidor lo alokwap, tokienyiarite nache kwap alodiyete ekidor lo alokuju.

⁴⁵Katolimok itwaan ngini ayong tama, “Amaniyat na ekienyiarit kuju, erai aka ngimurok alu eweikinito akai a Akuj.

⁴⁶Ani amaniyat na ekienyiarit kwap, erai aka ngimurok alu eweikinito ekeno a ngakipeyos. Kesi ta lokookeng a Sadok. Kesi make ani a Ngilawi epedorete alosit ngaren Ekapolon Akuj tosuba etich keng.”

⁴⁷Kitem itwaan ngini alaar na alotooma. Ariyan ngiwaitin arai ngamitae ngatomwon-kan. Ayei akai a Akuj lowae lo alotoo, toyei ekeno a ngakipeyos ngaren.

⁴⁸Ani erumor katoriko ngesi ayong namaniyat na elomarere kai a Akuj, kitem toliwor ngamitae ngaarei ka anus elosi nalup, tarai abalanyany amita apei ka anus alowaitin kadaang.

⁴⁹Ayakasi ngadoket na elosere namaniyat na elomarere kai a Akuj. Arai abalanyany a amaniyat kangina ngamitae ngatomon tarai aoyau na elosi nalup ngamitae ngakan-kapei. Ayakasi ngapirio ngaarei lowaitin lu elomarere.