Read turkana Esekiel 41 Bible Online

Esekiel 41 - turkana bible

Esekiel 41

¹Ani erumor katoriko itwaan ngini ayong namaniyat na alokiding, na erai ni italeuno. Kitem ngesi erot lo elosere neni. Arai ngamitae ngauni elosi nalup,

²tarai abalanyany ngamitae ngakan. Arai alangirir a ngikwaasea ngamitae ngaarei ka anus alowaitin kadaang. Kitem ngesi amaniyat ngina toriam erai aoyau keng ngamitae ngatomwon-arei tarai ewae louriyen ngamitae ngatomon.

³Ani erumor tolot ngesi lowae lo alotooma noi. Kitem erot lo elosere neni, arai amita apei elosi nalup tarai abalanyany ngamitae ngauni ka anus alowaitin kadaang.

⁴Kitem amaniyat ngina toriam ngiwaitin daang eriyan erai ngamitae ngatomon. Ayei amaniyat ngina yaaye amaniyat na alokiding. Sodi katolimok itwaan ngini ayong tama, “Ni italeuno noi nege.”

⁵Kitem itwaan ngini awas na alotooma akai a Akuj. Arai alangirir ngamitae ngauni. Ayakasi ngamaniyae naachik eriamito akai a Akuj lokwaasea a awas kangina. Arai abalanyany kech ngamitae ngarei-rei.

⁶Adukitoe ngakais nadokok atiakitae ngatiaket ngauni. Atiaket apei ayakasi ngamaniyae ngatomwon-uni. Awas a akai a Akuj na anikalapatan, adiim anatiaket a apei akidwang atiaket na alokidiama, sodi towaatar ngamaniyae anawas peigangitae.

⁷Toliwor ani ingolikinio ngawasea a akai a Akuj anikalapatan, tosub elangir ngikwaasea napei alokwap tanang kidiama. Adukitoe ngadoket nabalany ngaarei nawas a akai a Akuj na anikalapatan, kamanakete ngamaniyae. Sodi kikobare anamaniyae ana alokwap ka na alokidiama.

⁸Engolik atamar adukitoe ni ikeuna eriamit akai a Akuj. Arai neni ewae lo a ngalup a ngakais ana edukuk ngatiaket ngauni, na ayakasi lokwaasea a akai a Akuj. Ariyan aoyau keng ka akitoe nakitemiet na arai ngamitae ngauni.

⁹Arai alangirir a awas ana anikalapatan ngamaniyae ngamitae ngaarei ka anus. Ayei nikoororon kiding ngamaniyae na eriamito akai a Akuj

¹⁰ka ngamaniyae a ngimurok. Arai abalanyany keng ngamitae ngatomon iriamit akai a Akuj.

¹¹Ayakasi ngidorin lu elomarere namaniyae na ngikwaasea. Ayei ekidor epei kwap akai a Akuj toyei loche kuju. Ewae lo a ngalup lo eriamit anikoororon, arai abalanyany keng ngamitae ngaarei ka anus.

¹²Esal a ewae alokooron alotoo akai a Akuj, ayei adukuoru na arai aoyau keng ngamitae ngatomwon-omwon ka ngakan tarai abalanyany ngamitae ngatomwon-uni ka ngakan. Arai alangirir a ngikwaasea keng ngamitae ngaarei ka anus iriamit.

¹³Kitem itwaan ngini nikalapatan akai a Akuj toriam erai ngamitae ngatomwon-kan. Napei alokamanakete akai a Akuj kitor nikoororon tanang too ni erai esal, arai ngamitae ngatomwon-kan.

¹⁴Ngaren akai a Akuj ka ewae lokoororon alowaitin kadaang, arai ngamitae ngatomwon-kan.

¹⁵Kitem ngesi aoyau a akai elosi too ka ni itoreeneo alokiding alowaitin kadaang, arai ngamitae ngatomwon-kan. Amaniyat na elomarere kai a Akuj, ka ni italeuno ta ni italeuno noi,

¹⁶esiritoe daang atapitae ngakito napei analup tanang lopukei. Arapitae ngipukei ngulu.

¹⁷Ngikwaasea lua lotooma akai a Akuj napei alokwap tanang kidiama ngidorin, aburuchiaritae a ngiboro alu ichietae

¹⁸alu araakasi ngingolea ka ngiborei lua ngabeben. Alunyitae ngingolea ka ngiborei lua ngabeben iwapasi anamaniyat kadaang. Ayakasi ngiborei ngulu ngireetin ngiarei-rei.

¹⁹Arai ereet lo akienyiarit loongol eka itwaan, tarai loche lo akienyiarit lokitoe alowae aloche eka engatuny. Ekoni neni awadaang alokwaasea a amaniyat

²⁰napei analup tanang kidiama ngidorin.

²¹Ariyan ngapirio na ngidorin a ewae alo italeuno. Ngaren ni elomarere lowae lo italeuno, ayei ibore ni ekoni

²²ekeno a ngakipeyos lo esubunitae a ngakito. Arai aoyau keng na alokidiama amita apei ka anus, tarai abalanyany amita apei. Ngapirio keng na ngiwaitin ka ewae lo a ngalup,[34] ta ngiwaitin keng, asubunitae daang a ngakito. Katolimok itwaan ngini ayong tama, “Emeesa logo ngesi eyei ngaren Ekapolon Akuj.”

²³Ayei ekidor losal a erot alo elomarere ni italeuno, toyei ekidor eche lorot lo elomarere ni italeuno noi.

²⁴Araakasi ngidorin ngiarei-rei, lu engaanar alokiding.

²⁵Echiekinitae ngingolea ka ngiborei lua ngabeben lodorin a ewae alo italeuno loger lo echiekinitere tani lokwaasea. Ayei akitoe na arapitere nikalapatan ekidor a amaniyat ana elomarere.

²⁶Ayakasi ngipukei lokwaasea a amaniyat kangina, nabo etisiritoe ngikwaasea a ngingolea.