Read turkana Esekiel 42 Bible Online

Esekiel 42 - turkana bible

Esekiel 42

¹Ani erumor katoriko itwaan ngini ayong nikalapatan, etoro lorot lo alokwap atolomasi nalaar na anikalapatan. Katoriko nadukuoru na ayei lowae lo alokwap akai a Akuj.

²Arai aoyau a adukuoru ana ayei kwap kangina ngamitae ngatomwon-kan tarai abalanyany ngamitae ngatomwon-arei ka ngakan.

³Alowae a epei akienyikina ka nikoororon ni arai ngamitae ngatomon alokwaas a akai a Akuj. Ani alowae aloche akienyiarit ni etoreeneo analaar ana anikalapatan. Adukitoe a ngadoket a ngauni, isiyotoritae na alokidiama naabor ana alokwap.

⁴Lowae lo alokwap a adukuoru kangina, ayei erot lo arai abalanyany keng ngamitae ngakan, tarai aoyau ngamitae ngatomwon-kan, toyei ekidor lowae ngolo.

⁵Adiding ngamaniyae na ayakasi nadoket na alokidiama adukuoru ngina akidwang na ayakasi nadoket na alokiding ka na alokwap, kainyo esiyotoritae nguna naabor.

⁶Ngamaniyae a ngadoket kadaang adukitoe ni ikeuna, peegangitae a ngapirio loger a ngakais anache analaar kangina.

⁷Ayei awas na anikalapatan ebakito ka ngamaniyae na ayakasi nalaar na anikalapatan. Epororit awas ngina ngamaniyae a ngamitae a ngatomwon-arei ka ngakan.

⁸Ngamaniyae na arekina lokwaas a alaar ana anikalapatan araakasi ngamitae ngatomwon-arei, taraakas ngamaniyae na arekina lokwaas a akai a Akuj ngamitae ngatomwon-kan.

⁹Ayei ekidor lo elomarere namaniyae nguna lowae loa lokide

¹⁰elomunio analaar ana anikalapatan. Lowae loa lokuju[35] akai a Akuj, ayei akai ache na ekwaan ka ngina diyete akai na eyei too, losal a akai a Akuj.

¹¹Ngaren ngamaniyae, ayei erot lo ekwaan ka lo ayei lowae lo alokwap. Ekwaan ngakitemiet kech ka eduke ta ngidorin.

¹²Ayei ekidor kwap ngamaniyae alokuju adukuoru, alowae alo alokide alo isiakinea awas.

¹³Katolimok itwaan ngini ayong tama, “Italeuno ngakais naarei nugu daang, na alokwap ka na alokuju. Neni ngesi elomarete ngimurok eloose ngaren Ekapolon Akuj akinyam ngakipeyos na italeuno. Neni ngesi ikachakinete ngimurok ngakipeyos na italeuno noi kainyo italeuno ngamaniyae nguna, ngakipeyos a ngalemet ka ngakipeyos na elemarere akisech ta na atachanot.

¹⁴Na elomareta ngimurok ni italeuno, nyepudorete kesi nikalapatan eringa nyebutuno ngiworui kech lusek asubeta etich kidongo neni kainyo italeuno ngiworui ngulu. Esakitae kesi ebutokinosi ngiworui ngiche eringa nyepudoro nikalapatan ni echunakina ngitunga.”

¹⁵Na arumorea itwaan ngini akitem tooma akai a Akuj, abu katoriko ayong kesitor lokidor lo alokide sodi kitem aro na anikalapatan.

¹⁶Tolem ngesi akitoe nakitemiet kitemio ewae lo alokide, arai ngamitae ngamiae ngaarei ka ngatomwon-kan.

¹⁷Kitem ngesi ewae lo alokwap a akitoe keng, arai ngamitae ngamiae ngaarei ka ngatomwon-kan.

¹⁸Sodi kitem ewae lo alokuju a akitoe keng, arai ngamitae ngamiae ngaarei ka ngatomwon-kan.

¹⁹Dio torei kitem ewae lo alotoo a akitoe keng, arai ngamitae ngamiae ngaarei ka ngatomwon-kan.

²⁰Kitem ngesi ngiwaitin luomwon daang. Ariyan ngiwaitin daang arai ngamitae ngamiae ngaarei ka ngatomwon-kan. Eriwokina awas ngina atiakit ngiboro lu etaleuno ka lupeetaleuno.