Read turkana Esekiel 43 Bible Online

Esekiel 43 - turkana bible

Esekiel 43

¹Ani erumor katoriko itwaan ngini ayong lokidor lo ekienyiarit kide.

²Engolik ayong akwangis a Akuj a Isirael ebuni alokide. Kirurumaun etoil a Akuj loger a ngitoroi a anam sodi kimau akwangis keng akwap.

³Engolik ayong akisingolikinet na ekwaan ka nakolong engolikini na abunio Akuj akinyasun Yerusalem. Ekwaan nabo ka akisingolikinet nakolong engolikini ayong alokwaas a angolol a Kebar, abu emasakin nalup tatap ereet ngalup.

⁴ Kitoru akwangis ngina lokidor lo alokide toloma kai a Akuj.

⁵Kekeu etau a Akuj ayong kayaa nalaar na alotooma, engolik akwangis a Akuj ileleba kai.

⁶Ani eringa itwaan ngini ewei alodiyete kang, eira ayong etoil a Ekapolon Akuj kesuruorikini alokai keng

⁷tama, “Itwaan, nege erai ekicholong kang a apolou, nege edokokinit ayong ngakejen kang, eboikinor kiding Ngisirael jik. Nyeringa nabo Ngisirael isurumete ekiro kang ngileech jik, kori nyeringa nabo ngikapolok kech isurumete ekiro kang ngileech ani ilipeta ngakujo ngache kori ani enukanakineta ngawat[36] a ngikapolok kech nege.

⁸Isibakito ngikapolok kech ngakilori kech ka nakang. Kisibaka ngapirio kech ka nakang, abe toliwor awas bon kitiakit ayong ka kesi. Esurumete kesi ekiro kang ngileech a ngakiro anakikadakinete esubete kesi. Kotere nguna, amunyari ayong kesi a angoit kang.

⁹Ejoikinit tokona kesi epalikinete akilipit ngakujo nache sodi tachadasi ngawat a ngikapolok kech anikang. Ani kesubakis nguna, eboikin ayong kiding kech jik.”

¹⁰Torubak Ekapolon Akuj ebala, “Iyong itwaan, kisisak Ngisirael ngakiro a akai a Akuj toyena lokojokon eger keng. Kimiek kesi kiruma ngileech kotere ngakiro naaronok asubete kesi.

¹¹Ani kiruma kesi ngileech kotere daang na asubete, kidodik kesi eger a akai a Akuj, ka eduke keng ta ngidorin keng lulomunet ka lupudoret, ka ekisikwaane keng ta eger lo erekinitere ngiboro daang. Kisisak kesi ngitalio a akai a Akuj daang ka ngakiro na iwapitae. Kigir ngakiro nguna daang kingolikineta kesi eger lo erekinitere sodi kiwapa ngitalio daang.

¹²Etal a akai a Akuj logo: Aro daang na iriamit akai a Akuj alokidiama emoru, erai ni italeuno.”

¹³Ngakitemiet a ekeno a ngakipeyos nugu, itemio loger lo etemere akai a Akuj. Ewae lo a ngalup a ekeno kiriam, echilitae ni itorete ngakipi, ni erai aoyau na ngalup ngasentimitae ngatomwon-kan tarai abalanyany ngasentimitae ngatomwon-kan, tarai aoyau na alokidiama ekeli lo a ekwaas ngasentimitae ngatomwon-arei ka ngakan.

¹⁴Ewae lo alokwap noi a ekeno napei alokidiama ewae lo esipor, arai aoyau na alokidiama amita apei. Ewae loche, abuaritae naabor alokeli ngasentimitae ngatomwon-kan kiriam, tarai aoyau na alokidiama ngamitae ngaarei. Ewae lo atupit ngolo, abuaritae naabor alokeli ngasentimitae ngatomwon-kan kiriam.

¹⁵Ewae lo alokidiama lo enomeenere ngakipeyos, arai aoyau na alokidiama ngamitae ngaarei. Ngaamwar na ajipito alowaitin aluomwon, aoyak epororito ewae loche alokidiama.

¹⁶Ariyan ngiwaitin lua lokidiama daang, araakasi ngamitae ngakan-kapei.

¹⁷ Ariyan tani ngiwaitin lua lokiding daang araakasi ngamitae ngakan-kaarei, toyei ekeli lowaitin lua nikalapatan, lo arai aoyau keng ngasentimitae ngatomwon-arei ka ngakan. (Arai abalanyany ani itorito ngakipi ngasentimitae ngatomwon-kan.) Ngadoket na adokanarere lokeno, ayakasi lowae lo alokide.

¹⁸Katolimok Ekapolon lo erai Ekapolon Akuj ayong tama, “Itwaan, topupok ngakiro nakalimokini ayong iyong. Ngitalio a ekeno a ngakipeyos lugu: Akolongit na itoweyere ekeno, kitaleu kinom ngakipeyos ka awatakin ngaakot a ngibaren alu ipeyeo.

¹⁹Ngilawi lumurok taraakas ngalesea a Sadok make kesi epote ngaren kang akisub etich kang. Adungu ayong Ekapolon lo arai Ekapolon Akuj nguna. Nak kesi emong losorokit kipeyeto toliwor akipeyos a akisech.

²⁰Ilemuni iyong ngaakot keng ngache kiwasak naamwar naomwon a ekeno, ka ngiwaitin lua lokiding, kisiriam ekeli keng daang. Eger ngolo ngesi itosegea iyong ka akitaleun ekeno a ngakipeyos.

²¹Ilemuni iyong emong lo ipeyeo erai akipeyos a akisech, kinom ani eseunitae anikalapatan akai a Akuj.

²²Ani akolongit na etupit ngina, ipeyoe iyong ekoroe lo emam ni ichwangakina toliwor akipeyos a akisech. Kitaleu ekeno a ngaakot a ekoroe loger lo itosegea ana emong.

²³Ani irumori akitoseg ekeno, kipeye emong lo emam ni ichwangakina ka emesek lo emam ni ichwangakina.

²⁴Yau kesi nia Ekapolon Akuj. Ipurupurakinete ngimurok amakat kidiama kech kepeyokis ayong erai akipeyos.

²⁵A ngirwa a ngikan-kaarei, ipeyoe iyong akolongit daang akine, ka emong ta emesek toliworos ngakipeyos a akisech. Ejoikinit daang eraakasi lu emam ni ichwangakina.

²⁶A ngirwa a ngikan-kaarei, itosegete ngimurok ekeno kitaleut kipeyoore.

²⁷ Adaunet a ngirwa alukan-kaarei, elomario nakolongit na ngakan-kauni, kepeyokinete ngimurok ayong ngakipeyos na inomio ka ngakipeyos a ekisil. Sodi katacham ayong esi daang. Ayong Ekapolon lo arai Ekapolon Akuj alimu nguna.”