Read turkana Esekiel 44 Bible Online

Esekiel 44 - turkana bible

Esekiel 44

¹Ani erumor katoriko itwaan ngini ayong katobua lokidor lo alokide akai a Akuj. Agolitoe ekidor ngolo,

²sodi katolimok Ekapolon Akuj ayong tama, “Idongi ekidor logo egolol, nyengaario, nabo emam itwaan itoruni lokidor logo kainyo etoruni ayong Ekapolon Akuj na arai Akuj a Ngisirael lokidor logo. Idongi egolol.

³Ekapolon lo epolokinit akwap ngesi bon epedori alomar tanyam akimuj keng na italeuno alongaren kang. Elomari ngesi ka apudor kitor lorot lo anamaniyat anaapolon, lo eyei lowae lo alotooma.”

⁴Ani erumor katoriko itwaan ngini ayong kesitor lokidor loa lokwap tanang ngaren akai a Akuj. Ani engolikini, engolik akwangis a Ekapolon Akuj ileleba kai a Akuj. Emasakin ayong nalup tojuk ereet ngalup,

⁵sodi katolimok Ekapolon Akuj ayong tama, “Itwaan, topupok lokojokon a ngaki kon, ka akienyikin lokojokon a ngakonyen kon. Topupok ngakiro daang nakalimokini ayong iyong alotalio a akai a Akuj, ta ngikichikichiket daang a etal. Toyen lokojokon ngitunga lu echamakinitae elomunete ka apudonor alokai a Akuj, ka ngitunga lu nyechamakinitae.

⁶“Tolimok Ngisirael lukechanak lugu atamar abala ayong Ekapolon lo arai Ekapolon Akuj kona, ee Ngisirael, totubosi ngakiro nakikadakinete na isubete esi daang.

⁷Isuruma esi akai kang ngileech ani imiekineta ngitunga a ngakwapea anache lu nyilengeritae elomunete kai kang esaa lo kepeyonokinere ayong nikatoronon ka ngaakot a ngibaren alu ipeyeo. Echwangakis ngitunga kang achamunet kang a ngakiro anakikadakinete esubete.

⁸Nyiyokiyete esi ngiboro kang lu italeuno pearai ngitunga lugelayek isiyokiyo.

⁹“Tokona bocha, alimu ayong Ekapolon lo arai Ekapolon Akuj atamar emam itwaan a akwap anache ni nyilengeritae, emam itwaan ni nyiwapit ngakiro kang ni elomari kai kang, nyelomari tani itwaan a akwap anache ni elomit kiding ngitunga kang Ngisirael.”

¹⁰Katolimok Ekapolon Akuj ayong tama, “Ngilawi lukolong kangerete ayong aapei ka Ngisirael luche, kilipa ngakujo kech nasubuna, erirae ayong kesi.

¹¹Eliworosi kesi ngikasubak etich alokai kang toweikis ngidorin ka akisub etich loche a akai kang. Earete kesi ngibaren lu elemunete ngitunga eraakasi ngakipeyos na inomio ka ngakipeyos nache ta akisub etich a ngitunga.

¹²Nakaneni, ani kona kolong aweikineta kesi akisilip Ngisirael ngakujo nasubuna, kilomakis Ngisirael nakisech, ekong ayong Ekapolon lo arai Ekapolon Akuj atamar erirae kesi jik.

¹³Nyesubete kesi etich kang eraakasi ngimurok kori nyeapiarete loboro kang lu italeuno kori nyelomarete ni italeuno noi. Pearai imiekinio kesi kitiro ngileech a ngakiro anakikadakinete esubete kesi.

¹⁴Aseu ayong kesi toweikis akai, tosuba etich a akai akang daang ka ibore cha daang ni ejoikinit esubio kaneni.”

¹⁵Tolim Ekapolon lo erai Ekapolon Akuj tama, “Nakaneni ngimurok a ekitela a Lawi lu eraakasi ngalesea a Sadok, lukolong edongete tosuba etich alokai kang emunokinito, ngirwa lu kangeritotor ayong Ngisirael luche, kesi epote ngaren kang tosuba etich kang kepeyokis ayong nikatoronon ka ngaakot a ngibaren alu ipeyeo.

¹⁶Kesi make elomarete kai kang tosuba etich kang alokeno kang a ngakipeyos ta akirik akilip alokai kang.

¹⁷Na elomuneta kesi lodorin a alaar ana alotooma, enapete ngiworui lukaanikak. Nyenapete kesi ngiworui lua ngajul a ngamesekin esaa lo esubeta etich analaar ana alotooma kori alokai kang.

¹⁸Enapete kesi ngapukoto nawarui ka ngiworui lu aabor, nabo nyenapete ngarubae sodi nyiinyinyirea.

¹⁹ Na epudoreta kesi nalaar na anikalapatan ni eyakasi ngitunga, ebutorete ngiworui lusek asubeta etich kiwaakis namaniyae na italeunitoe. Enapete kesi ngiworui ngiche kikachakis lu italeuno nyeewaneta ngitunga.[37]

²⁰“Nyebanyete ngimurok ngakies kech kori nyipitunete ngitim tooyaketa. Eirete kesi ngitim.

²¹Nyemasete ngimurok emuna na elomareta nalaar na alotooma.

²² Nyiusi emuron aberu na elakitae. Iusi ngesi apese Nasiraelit na nyepero ka ekile sek kori apuserut a emuron aloche.

²³“Itatamete ngimurok ngitunga kang akitiak ibore ni eseg ka ni nyeseg, ni italeuno ka ni nyitaleuno.

²⁴ Na enyounio eburas, etubete ngimurok ngakiro itemem ka ngitalio kang. Irichakinete kesi ngisukukui lu kelipitere ayong itemem ka ngitalio kang ta eger lo asaki ayong. Irichakinete kesi ngasabatoi kang kitaleut.

²⁵“Nyesakitae ngimurok eliworosi lu nyitaleuno kori akitap itwaan nikatoan. Kaneni dang, ani eliwor apakeng kori itiokeng, lokookeng kori nakookeng, lokaatokeng kori nakaatokeng na nyiusitae, epedori ngesi akitap.

²⁶Na italeunor ngesi torumor, ejoikinit idari ngirwa ngikan-kaarei.

²⁷Akolongit na elomarea ngesi nalaar na alotooma akai a Akuj tosub etich alokai a Akuj, ejoikinit ipeye akipeyos a akisech kotere ngesi ilope. Ayong Ekapolon lo arai Ekapolon Akuj alimu nguna.

²⁸“Emam ngimurok ibore irumete alo Isirael. Kerumete kesi ayong. Emam kesi ibore etiakakinio toliwor ikech, ayong arai ikech.

²⁹Enyamete kesi ngakipeyos a ngalemet, ka ngakipeyos na elemarere akisech, ka na atachanot ta ibore cha daang ni itegeliaritae alo Isirael kotere ayong.

³⁰Ngimurok elemarete ngalemet na ekingaren naajokak a ibore kadaang ani kepeyokinio ayong. Ani idorokinete ngitunga ngamugati, nakinae ngimurok amugati na ekingaren erai akipeyos sodi min apiaro kang nawiyei kus.

³¹ Nyenyamete ngimurok ikeny cha daang kori etiangit lo etoani bon kori lo earete ngitieng luche.”