Read turkana Esekiel 45 Bible Online

Esekiel 45 - turkana bible

Esekiel 45

¹Ani ekorakinio ngitela daang akwap, ejoikinit epewae etiakario toliwor aka Ekapolon Akuj. Eliwor aoyau keng ngakilomitae ngatomon ka ngaarei ta anus tarai abalanyany keng ngakilomitae ngatomon.[38] Eliwor ewae ngolo daang lo italeuno.

²Alotooma ewae ngolo, etiakunio ewae lo eriyan ngiwaitin daang erai ngamitae ngamiae ngaarei ka ngatomwon-kan, toliwor eka akai a Akuj. Isiriamio neni nikaloloman ni erai abalanyany keng ngamitae ngatomwon-arei ka ngakan.

³Etiakunio epewae a ewae alo italeuno kangolo, ni erai aoyau ngakilomitae ngatomon ka ngaarei ta anus tarai abalanyany ngakilomitae ngakan todukoe akai a Akuj, ni italeuno noi.

⁴Neni eliwor ni italeuno anakwap. Eliwor ika ngimurok a Akuj alu esubete etich a Ekapolon Akuj alokai keng. Neni epete ngakais kech ka ewae lo emini akai a Akuj.

⁵Ewae lo idongit eliwor eka Ngilawi alu esubete etich alokai a Akuj. Epete ngirerea lu elomete kesi neni.[39]

⁶Arumoret a ewae alo italeuno, totupak ewae eche lo erai aoyau keng ngakilomitae ngatomon ka ngaarei ta anus tarai abalanyany ngakilomitae ngaarei ka anus. Etiakario ewae ngolo min ere lo epedori Esiraelit cha daang akilom.

⁷Etiakakinio ekapolon a akwap ngalup. Napei alokukuoru alo alotoo a ewae alo italeuno tolot too tanang nanam a Mediterenian. Ani alokide elosi tanang losal a akwap, sodi toriyanikin aoyau keng ka aoyau a ngiwaitin alu etiakakinitae ngitela a Isirael.

⁸Eliwor neni ikeng alo Isirael. Nyeringa nabo ngikapolok kang etikiorete ngitunga kang, pearai imiekinete Ngisirael tolemasi akwap itemem ka ngitela kech.

⁹Tolim Ekapolon lo erai Ekapolon Akuj tama, “Etige ngikapolok a Isirael, etemokin robo! Kimiekisi amoitanut ka atikiorit luche. Tosuba na eriyan ka nguna etenooko. Tojongoto akitwarakinit ngitunga kang anakwap kech. Kalimok ayong Ekapolon lo arai Ekapolon Akuj esi nguna.

¹⁰ “Totinga ngakitemiet ka ngaratilio na eriyan.

¹¹“Eriyanikinosi epa na itemere ibore nikoonon ka bas na itemere ibore nialiwan. Omer[40] ngesi itemere. “Ikote ngakitemiet nguna nege: Omer apei eriyan ka epa ngatomon ka bas ngatomon.

¹²Ejoikinit ngakitemiet kus ikote nege: Gera ngatomwon-arei eriyan ka chekel apei. Chekel ngatomwon-kapei eriyan ka mina apei.

¹³Ejoikinit esi iwapete ngakitemiet nugu kotere ngakipeyos kus: Eliwor ngakanoi akitemiet apei anakan-kapei a epa alotooma omer. Toliwor erau akitemiet apei anakan-kapei a epa alotooma omer.

¹⁴Eliwor akimiet akitemiet apei anatomon a bas alotooma kor (eriyan kor apei ka bas ngatomon kori omer apei).

¹⁵Ilemunete esi amesek apei alotooma ngamesekin ngamiae ngaarei anawiyei a Ngisirael. Ilemunete esi ngakipeyos a ngalemet, ka ngakipeyos na inomio ta ngakipeyos a ekisil sodi kitomookere esi. Alimu ayong Ekapolon lo arai Ekapolon Akuj.

¹⁶“Ejoikinit ngitunga daang anakwap ipotorete ngakipeyos nguna nakis ekapolon a akwap alo Isirael.

¹⁷Eliwor etich a ekapolon kangolo alemun ngakipeyos na inomio, ka ngakipeyos a ngalemet, ka ngakipeyos a emuna kotere ngisukukui lu eanyungarere elap ka ngasabatoi ta ngisukukui luche a Ngisirael. Elemuni ngesi ngakipeyos a akisech, ka ngakipeyos a ngalemet, ka ngakipeyos na inomio ta ngakipeyos a ekisil tomookere Ngisirael.”

¹⁸Tolim Ekapolon lo erai Ekapolon Akuj, “Akolongit na ekingaren a elap alo ekingaren, ipeyoote esi emong losorokit lo emam ni ichwangakina kitaleunere akai a Akuj.

¹⁹Elemuni emuron ngaakot ngache a akipeyos ana akisech kangina, kiwasak nakito a ngidorin a akai a Akuj, ka ngiwaitin luomwon a ekeno a ngakipeyos ka nakito a ekidor a alaar ana alotooma.

²⁰ Akolongit na ngakan-kaarei a elap kangolo, tosubakis ngakiro napei nguna kotere itwaan daang ni asechi peiyechakinit kori ani peayenea, sodi kitaleunere akai a Akuj.

²¹“Akolongit na ngatomon ka ngoomwon a elap alo ekingaren, inyamete esi esukukuu a Adeparet. Inyamete esi a ngirwa a ngikan-kaarei ngamugati na emam ekitoe lo itubui.

²²Akolongit ngina ipeyoe ekapolon emong losorokit kotere ngasechesea keng ka ngitunga keng daang.

²³Alorwa alukan-kaarei a esukukuu kangulu, ipeyoe ngesi ngimongin lusorok ngikan-kaarei ka ngimesekin luapolok ngikan-kaarei lu emam ni ichwangakina. Akolongit apei, ipeye ngesi emong epei ka emesek epei. Ipeyoe ngesi tani ekoroe akolongit daang toliwor akipeyos a akisech.

²⁴Kotere emong cha daang ka emesek cha daang lo ipeyeo, iturukoori ngesi ka ngalitae ngauni a akimiet.

²⁵ “Akolongit na ngatomon ka ngakan a elap alo a ngikan-kaarei, na isiakinea esukukuu a ngalemet, ipeyoe ekapolon a ngirwa lukan-kaarei daang ngakipeyos napei nguna, kotere akipeyos a akisech ka na inomio ta na ngalemet ka akimiet.”