Read turkana Esekiel 46 Bible Online

Esekiel 46 - turkana bible

Esekiel 46

¹Ebala Ekapolon lo erai Ekapolon Akuj kona, “Egolio ekidor lo a alaar ana alotooma lo ingoliarit kide a ngirwa alukan-kapei alu esubere etich, nakaneni engaario akolongit na Sabato ta akolongit na eanyungarere elap.

²Elomuni ekapolon a akwap analaar ana anikalapatan toloma namaniyat naapolon na eyei lokidor sodi towo anakito a ekidor esaa lo ipeyooto ngimurok ngakipeyos keng na inomio ka na akisech. Ilipi ngesi Akuj kaneni alokidor dio topudo nikalapatan nabo. Imiekinio ekidor engaara tanang ebong.

³Ejoikinit ngitunga daang a akwap ilipete Ekapolon Akuj alongaren ekidor akolongit daang na Sabato ka na eanyungarere elap.

⁴“Akolongit na Sabato, eyauni ekapolon a akwap ngimesekin luuchik ngikan-kapei ka emesek epei lu emam ni ichwangakina toliworos ngakipeyos na inomio.

⁵Iturukuuni ngesi emesek ka ngakipeyos a ngalemet ngalitae ngatomon ka ngakan-kaarei ta anus, dio kituruku ngimesekin luuchik ka ibore nicha esaki ngesi. Ejoikinit ngesi iturukuuni akipeyos a ngalemet cha daang ka akimiet ngalitae ngauni.

⁶Akolongit na eanyungarere elap, ipeyoe ngesi emong losorokit lo emam ni ichwangakina ka ngimesekin luuchik ngikan-kapei ta emesek lo emam ni ichwangakina.

⁷Iturukuuni ngesi emong ka emesek daang, kituruku ka ngakipeyos a ngalemet ngalitae ngatomon ka ngakan-kaarei ta anus, dio kituruku imesek niichi daang ka ngakipeyos nacha esaki ngesi alemun. Ejoikinit ngesi iturukuuni ngakipeyos a ngalemet daang ka akimiet ngalitae ngauni.

⁸Epudori ekapolon nikalapatan kitor lorot losek alomunea.

⁹“Naeponeta ngitunga a akwap akilip Ekapolon Akuj alosukukui cha kadaang, ngini elomuni alokidor alo alokwap, itori lo alokuju epudori. Ani ngini elomuni alokidor alo alokuju, itori lo alokwap epudori. Emam itwaan epudori alokidor alosek alomunea pearai idiri jik ngaren.

¹⁰Na elomareta kesi tooma, tolomasi ka ekapolon, ani epudorete kirukosi ka ekapolon.

¹¹Ngirwa lua ngisukukui ka ngirwa lu erekinitae, eliworosi ngakipeyos a ngalemet ngalitae ngatomon ka ngakan-kaarei ta anus na iturukuunio ka emong kori emesek ka ngakipeyos cha daang na esaki itwaan akiturukuunio imesek. Ejoikinit ngakipeyos na ngalemet nguna iturukuunio ka akimiet ngalitae ngauni.

¹²“Naesakea ekapolon a akwap alemikin Ekapolon Akuj akipeyos na esaki ngesi ilope alemun, kerai akipeyos na inomio nginerin daang kori na ekisil, engakinio ngesi ekidor lo alokide alaar na alotooma. Ipeyoe ngesi akipeyos ngina loger lo ipeyoeneo akolongit na Sabato sodi togoloi ekidor epudori ngesi nikalapatan.”

¹³“Akolongit daang nataparach, ipeyokinio Ekapolon Akuj imesek nia ekaru a epei ni emam ni ichwangakina toliwor akipeyos na inomio nginerin daang. Ipeyeo akipeyos ngina akolongit daang.

¹⁴Iturukoorio ka ngakipeyos a ngalemet na eraakasi ngakiloi ngaarei a ngakiria ta akimiet alita apei na imorikinio ka ngakiria. Eliwor etal a ngakipeyos kanu ekajik.

¹⁵Imesek, ka ngakiria ta akimiet, ipeyonokinio Ekapolon Akuj ataparach daang jik.”

¹⁶Edungunit Ekapolon lo erai Ekapolon Akuj ebala, “Ani ketiakaki ekapolon a akwap lokookeng epei ngalup na eraakasi ngakeng erai ainakinet, eliworosi ngalup nguna kesi irumit edia ngolo anawi.

¹⁷Nakaneni ani ketiakaki ekapolon epei a ngikasubak etich keng ngalup na eraakasi ngakeng erai ainakinet, ebuario toliworos ngaka ekapolon na enangea ekaru lo ebuanarere.[41] Erai ngalup ngaka ekapolon. Talokookeng make epedorete akirum jik.

¹⁸ Nyejoikinit ekapolon a akwap edemari ngitunga ngiboro kech. Ngalup na etiakakini ngesi talokookeng kesi nakeng a ilope, sodi nyeeboliar ngesi ngitunga kang todemana ngalup.”

¹⁹Ani erumor katoriko itwaan ngini ayong namaniyae na ingoliarito kwap diyete ekidor lo alokuju alaar na alotooma. Eraakasi nguna ngamaniyae a ngimurok na italeuno. Katodod ngesi ayong wache alotoo ngamaniyae

²⁰dio katolimok tama, “Nege ngesi esakitere ngimurok itukulaunete akiring na ipeyeo erai ngakipeyos a akisech kori na atachanot, nabo kitaatana ngamugati, sodi nyiipudorere ibore ni italeuno cha daang namaniyat na anikalapatan towan ngitunga.”[42]

²¹Ani erumor katoriko ngesi ayong nalaar na anikalapatan kedodik ngiwaitin luomwon a alaar, ayakasi ngalaarin lowaitin luomwon.

²²Ayakasi ngilaarin luuchik lowaitin luomwon a alaar, arai aoyau a apei ngamitae ngatomwon-arei tarai abalanyany ngamitae ngatomon ka ngakan.

²³Ayakasi daang ngawasea na adukitoe a ngamoru eriamito toyakas ngikenoi lu adukitoe nawas.

²⁴Katolimok itwaan ngini ayong tama, “Ngikenoi lugu itukulaunieta ngikasubak etich a akai a Akuj ngakipeyos a ngitunga.”