Read turkana Esekiel 47 Bible Online

Esekiel 47 - turkana bible

Esekiel 47

¹Katobua itwaan ngini ayong lokidor a akai a Akuj. Aleleunito ngakipi alokwap ekidor eloose kide lowae lo engoliarit akai a Akuj. Aleleunito alokwap ewae lo alokuju akai a Akuj, kiporosi kuju ekeno a ngakipeyos.

²Katoriko ngesi ayong nikalapatan kesitor lokidor loa lokwap kesirimo nikalapatan lokidor lo anikalapatan lo ingoliarit kide. Aleleunito ngakipi alowae alo alokwap ekidor.

³Tolem itwaan ngini akitoe keng nakitemiet kitem ngamitae ngamiae ngakan kiwapak ingolol tolot kide katolimok ayong atamar ekek ngakipi, tananga ngakipi lotobolae kang.

⁴Sodi kitem ngesi ngamitae ngache ngamiae ngakan tanangut ngakipi nakungin kang. Kitem nabo ngamitae ngache ngamiae ngakan, tanangut ngakipi naabor kang.

⁵Kitem nabo ngamitae ngache ngamiae ngakan, totulukuko ngakipi kepiyo ayong akikekin. Totulukuk noi toliwor mati kilulumaar ekwakaye.

⁶ Katolimok ngesi ayong tama, “Itwaan, ingolik nugu a?” Ani erumor katoriko ngesi ayong lokeli a angolol.

⁷Ani anangi ayong neni, engolik ngikito lukaalak alokelio kadaang.

⁸Katolimok ngesi ayong tama, “Elelearito ngakipi lowae lo alokide kitoro nadipo a Yorudan tolomasi nanam a Amakat. Na enangeta nakipi nakaabarak a anam, tolilimiketo.

⁹Nicha elelearete ngakipi, pena ngitieng ngikitetio daang ka ngikolea. Itililimi angolol ngina ngakipi a anam Katoan. Nicha elelearete toyar ibore daang.

¹⁰Napei aloleleae a Engedi tanang lolelea a Eneglaim, epete ngikechiemak lokwaas a anam. Elokinete kesi ngipuutei kech tooko. Elalakearosi ngikolea kaneni totiata lua anam a Mediterenian.

¹¹Nakaneni ngakipi na ngayengiyengea ka ngataparin alokwaas a anam, nyitililimio. Kesi eliworosi edupuor a amakat.

¹² Erupunete ngikitetio daang a ngikito alokelio ka ngikwaasea a angolol. Nyeokete ngakui kech kori nyengopi ageor pearai ekoniunete ageor nakaabon elap daang kainyo eponito ngakipi kech alokai a Akuj. Eliwor ageor kech akimuj, toliwor ngakui ngakitedeket.”

¹³Tolim Ekapolon lo erai Ekapolon Akuj tama, “Lugu kesi eraakasi ngikukuorin a akwap ana etiakakinio ngitela lutomon ka ngiarei a Isirael. Etiakakinio ekitela a Yosep ngiwaitin ngiarei.[43]

¹⁴Totiaka eriyan. Ekongokini kolong ayong taapaakus atamar ainakini kesi akwap toliwor akech.

¹⁵“Alowae alo alokwap eteni ekukuor kide napei ananam a Mediterenian tanang lore a Esilon, tanang napak a Amas, tanang lore a Sedad[44]

¹⁶tanang lorerea a Berosa ka Sibiraim (eyakasi kiding akwap a Damasko ka Amas), tanang lore a Tikon (lo eyei lokukuoru a akwap a Auran).

¹⁷Isiakini ekukuor lo alokwap napei alo Mediterenian tanang lore a Enon, totiaka ngakwapea a Damasko ka Amas alokwap.

¹⁸“Isiakini ekukuor lo alokide alokuju, alokiding Damasko ka Auran, totiak angolol a Yorudan Isirael alotoo ka Gilead alokide, toeka tanang Tamar ananam a Amakat.

¹⁹“Isiakini ekukuor lo alokuju alokwap too, napei alo Tamar tanang lochwae a Kadech ka Meriba, toten kwap too kiwap ekukuor a Misiri ananam a Mediterenian.

²⁰“Anam a Mediterenian ngesi erai ekukuor alotoo, toten kwap tanang napak a Amas.

²¹“Tokorakisi akwap naga ngitela kus.

²²Eliwor akus jik. Ngitunga a akwap anache lu elomito kiding kus tourito ngide kane, etiakakinio kesi dang akwap. Itusubunio kesi Ngisirael nabo eramete kesi dang ekura aapei ka ngitela a Isirael, na etiakere akwap.

²³Itwaan a akwap anache dang, etiakakinio akwap alokiding ekitela lo elomit ngesi. Alimu ayong Ekapolon lo arai Ekapolon Akuj.”