Read turkana Esekiel 48 Bible Online

Esekiel 48 - turkana bible

Esekiel 48

¹Atiakio akwap loger logo itemem ka ngitela. Isiakini ekukuor lo alokwap napei ananam itorit Esilon tanang ni elomarere Amas, toeka tanang lore a Eron (lo eyei lokukuoru a Damasko alokwap ekienyikina ka Amas), napei alokide tanang too, eliwor ewae ngolo eka ekitela a Dan.

²Ewae lo etupit ngolo eliwor eka ekitela a Acher, napei alokide tanang too.

³Ewae lo etupit ngolo eliwor eka ekitela a Naputali, napei alokide tanang too.

⁴Ewae lo etupit ngolo eliwor eka ekitela a Manase, napei alokide tanang too.

⁵Ewae lo etupit ngolo eliwor eka ekitela a Epiraim, napei alokide tanang too.

⁶Ewae lo etupit ngolo eliwor eka ekitela a Reuben, napei alokide tanang too.

⁷Ewae lo etupit ngolo eliwor eka ekitela a Yuda, napei alokide tanang too.

⁸Ewae lo etupit ni atiakakinio ekitela a Yuda, itegeliario. Eliwor abalanyany keng ngakilomitae ngatomon ka ngaarei ta anus napei alokwap tanang kuju. Eriyan aoyau keng na alokide tanang too ka aoyau a ngiwaitin alu atiakakinio ngitela luche. Akai a Akuj ngesi edukokinio lowae lo itegeliaritae ngolo.

⁹Kiding ewae lo itegeliaritae ngolo, lo arai ngakilomitae ngatomon ka ngaarei ta anus tarai ewae loche ngakilomitae ngatomon,[45] italeunio toliwor eka Ekapolon Akuj.

¹⁰Etiakakinio ngimurok epewae a ewae alo italeuno kangolo. Napei alokide tanang too, eliwor ewae kech ngakilomitae ngatomon ka ngaarei ta anus. Ani napei alokwap tanang kuju, eliwor ngakilomitae ngakan. Edukokinio akai a Ekapolon Akuj kiding ewae ngolo.

¹¹Eliwor ewae ngolo eka ngimurok alu italeunitoe alu eraakasi ngalesea a Sadok, alu kolong asubete etich kang emunosi. Nyiwapa kesi ngakiro a Ngisirael aluche na asecheta loger a Ngilawi.

¹²Etiakakinio kesi ewae lo itegeliaritae lo ibakito ka Ngilawi, eliwor neni ni italeuno akidwang daang.

¹³Etiakakinio Ngilawi ewae lo itegeliaritae alokuju ewae lo echikakinitae ngimurok. Eliwor ngakilomitae ngatomon ka ngaarei ta anus, napei alokide tanang too. Toliwor ngakilomitae ngakan napei alokwap tanang kuju.

¹⁴Ewae lo itegeliaritae kotere Ekapolon Akuj ngesi ejok noi akidwang daang. Emam ewae ngolo lo epedorio agielar kori akilokony kori ainakin itwaan iche. Italeuno ewae ngolo nabo erai eka Ekapolon Akuj.

¹⁵Ewae lo itegeliaritae lo ideuna, lo erai ngakilomitae ngatomon ka ngaarei ta anus tarai ewae loche ngakilomitae ngaarei ka anus, nyitaleuno. Epedorete ngitunga akitiliwor neni ngirerea ka ngawiyei ta ngaroatin. Emini ere kiding neni.

¹⁶Eriyanete ngiwaitin a ere kangolo daang eliworosi ngamitae ngabunge ngaarei ka ngamiae ngaarei ta ngatomwon-kan.

¹⁷Epete ngaroatin lowaitin daang a ere na eraakasi abalanyany ngamitae amiat apei ka ngatomwon-arei ka ngakan.

¹⁸Ewae lo ideun arumoret a akiduk ere alokuju ewae lo italeuno, lo erai ngakilomitae ngakan tarai ewae loche ngakilomitae ngaarei ka anus alokide, tarai nabo alotoo ngakilomitae ngakan, ani ewae loche ngakilomitae ngaarei ka anus, ewae ngolo eliwor ngamanat a ngitunga alu elomito lore.

¹⁹Ngitunga daang lu esubete etich alore lua ngitela a Isirael daang, itaate ngalup nguna.

²⁰Etiae ani etemio alokiding ewae lo etegeliaritae, ariyan ka ngiwaitin daang araakasi ngakilomitae ngatomon ka ngaarei ta anus imorikinitae ka ewae lo eyei ere.

²¹Ewae lo idongit alowaitin kadaang alu italeuno ka lua ere, lo eriyan ngiwaitin daang eraakasi ngakilomitae ngatomon ka ngaarei ta anus napei alokide tanang too, ekienyikina ka ngiwaitin lu atiakakinio ngitela, eliwor ewae ngolo eka ekapolon a akwap. Ewae lo italeuno lo edukitoe akai a Akuj kiding,

²²ka ewae lo a Ngilawi ta ewae lo a ere, epete kiding ewae lo a ekapolon a akwap. Ani ewae lo a ekapolon a akwap emini kiding ewae lo a ekitela a Yuda ka ekitela a Benjamen.

²³Ani ngitela luche lu idongito napei alokide tanang too, eliwor ewae ngolo eka ekitela a Benjamen.

²⁴Ewae lo etupit ngolo eliwor eka ekitela a Simeon, napei alokide tanang too.

²⁵Ewae lo etupit ngolo eliwor eka ekitela a Isakar, napei alokide tanang too.

²⁶Ewae lo etupit ngolo eliwor eka ekitela a Sebulun, napei alokide tanang too.

²⁷Ewae lo etupit ngolo eliwor eka ekitela a Gad, napei alokide tanang too.

²⁸Ewae lo etupit Gad alokuju isiakini ekukuor alokuju too napei alo Tamar tanang lochwae a Kadech, napei alokwap too kiwapak ekukuor a Misiri tanang nanam a Mediterenian.

²⁹Tolim Ekapolon lo erai Ekapolon Akuj tama, “Eger ngolo ngesi etiakakinere ngitela a Isirael akwap na elemarete.”

³⁰Ngidorin a Yerusalem lugu: Alowae alo alokwap eliwor aoyau a awas ngamitae ngabunge ngaarei ka ngamiae ngaarei ta ngatomwon-kan. Ewae lo alokwap ngolo

³¹epete ngidorin nguuni lu eraakasi ekidor a Reuben, ka lo a Yuda ta lo a Lawi.

³²Eliwor aoyau a awas ana alokide ngamitae ngabunge ngaarei ka ngamiae ngaarei ta ngatomwon-kan. Epete ngidorin nguuni lowae ngolo lu eraakasi ekidor a Yosep ka loa Benjamen ta lo a Dan.

³³Eliwor aoyau a awas a ewae alokwap ngamitae ngabunge ngaarei ka ngamiae ngaarei ta ngatomwon-kan. Epete ngidorin nguuni lowae ngolo lu eraakasi ekidor a Simeon, ka loa Isakar ta lo a Sebulun.

³⁴Eliwor aoyau a awas ana alotoo ngamitae ngabunge ngaarei ka ngamiae ngaarei ta ngatomwon-kan. Epete ngidorin nguuni lowae ngolo lu eraakasi ekidor a Gad, ka lo a Acher ta lo a Naputali.

³⁵ Erai aoyau daang a awas alowaitin aluomwon a ere, erai ngamitae ngabunge ngakan-koomwon. Enyarao ekiro a ere napei tokona jik “Eyei Ekapolon Akuj nege.”