Read turkana Esekiel 5 Bible Online

Esekiel 5 - turkana bible

Esekiel 5

¹Tolim Ekapolon Akuj tama, “Itwaan, tolem ekileng lokakwanan, kitiliwo ebanyet tabanyarea akou kon, ka abokony ta ngitim kon daang. Ani erumor kitem ngitim kon a ngaratilio sodi totiak ngatiaket ngauni.

²Kinom atiaket apei alokiding ere, akolongit na edaunor akiriamit ere. Tolem atiaket apei kirimio ere anikalapatan itubonori a ekileng. Kialak atiaket nache lokuwam, esiwapak ayong ekileng kang.

³Kideu ngitim ngidikidio toinik lochilet a eworu kon.

⁴Tolem nabo ngidikidio alotim kangulu tachakak nakim kimiek tonom akim. Epetar akim anikech topetakin nakwap daang a Isirael.”

⁵Tolim Ekapolon lo erai Ekapolon Akuj tama, “Kingolik Yerusalem, ewaakinit ayong ngesi kiding ngakwapea daang, kiriama ngakwapea nache daang ngesi.

⁶Nakaneni abu Yerusalem tonger ngakitatamet kang nikaronon noi akidwang ngakwapea nache daang, tonger ngitalio kang noi akidwang ngakwapea na iriamito ngesi, towou akiwap ngakitatamet kang ka ngitalio kang.

⁷Tokona bocha Yerusalem, alimu ayong Ekapolon lo erai Ekapolon Akuj atamar, kona imoitanea iyong noi akidwang ngibukui luche lu kiriamito iyong, nabo iwou akiwap ngitalio ka ngakitatamet kang, nakaneni ibu kiwap ngitalio a ngibukui alu kiriamito iyong,

⁸ayong Ekapolon lo arai Ekapolon Akuj kalimok iyong atamar kanyoikinit ayong iyong. Kerirae ayong iyong ani iteeto ngibukui daang.

⁹Kotere ngakiro na aremokino ayong daang na isubi iyong, kerirae ayong iyong a eriras alo nyirirakina ayong nakanuan, nabo nyabongokini akirirare kongina.

¹⁰ Kotere nguna, enyamete ngikauriak ngide kech nabo enyamete ngide ngikauriak kech. Kerirae ayong esi, nabo lupiyayek apetari ayong lowaitin daang a akwap.

¹¹“Tokona bocha, kona araakar ayong Akuj na ayari, akiroit kang a Ekapolon alo arai Ekapolon Akuj. Kona inyasunea iyong akai kang a ngakiro anaaronok kikadakinete, kangeri ayong iyong emam ngisien.

¹²Atiaket apei a ngitunga kon, earete ngidekesinei luaronok ka akoro. Etoanikini atiaket apei lojie, ani atiaket nache, apetari ayong lowaitin daang a akwap erita a akwara.

¹³“Edaikin anyunyura kang ka angoit nikon loger ngolo, etoyon angoit kang anikon tama etau chuu. Toyena kesi atamar ayong Ekapolon Akuj engolik niaronon ani nyeraakatar kesi ngitunga lu emunoi.

¹⁴Ani eya nguna, ketiliwori ayong iyong Yerusalem alaireng, toliwor ngitunga daang lu itorunete neni, lu eponito anakwapea ana iriamito, toliwor kikianatar.

¹⁵“Yerusalem, na angoea ayong katonyunyurikin iyong, kitepenete iyong ngibukui daang lu kiriamito, kimenyasi. Itubulete ngakiro kon kesi nabo kikianatar kesi iyong.

¹⁶Atubori ayong akimuj kon, kitanyam akoro. Kipipilikini iyong[6] akoro loger a ngimalea a amod alukakwanak alu eraakasi ngikaarak iyong.

¹⁷ Kainuni ayong iyong akoro ka ngibuin lu earete ngide kon. Ayauni ngidekesinei ka akitu ta ejie kitaar iyong. Ayong Ekapolon Akuj alimu nguna.”