Read turkana Esekiel 6 Bible Online

Esekiel 6 - turkana bible

Esekiel 6

¹Katolimok Ekapolon Akuj ayong akiroit tama,

²“Itwaan, tokienyia lomoru a Isirael todwar ngakiro nugu anikech.

³Tolimok ngimoru a Isirael atamar kiirasi ngakiro a Ekapolon alo erai Ekapolon Akuj. Kiirasi ngakiro na asaki ayong Ekapolon lo arai Ekapolon Akuj alimokin ngimoru ka ngimukur, ka ngachukulei ta ngadipoe. Ameuni ayong akwara kinyasu ni ilipitotor ngitunga ngakujo nasubuna.

⁴Erimaunosi ngikenoi kus a ngakipeyos, tobwangae lu inomere emitina. Ngawat a ngitunga kadaang alu earakinio neni, echakakinio ngaren ngakujo kus.

⁵Enapakini ayong ngawat a Ngisirael alu etoakete ngaren ngakujo kech nasubuna. Ealari ayong ngakoyo kech esiriam ngikenoi a ngakipeyos.

⁶Inyasunio ngirerea lu elomete Ngisirael daang, tobwangabwangaarae ngikenoi kech lu ipeyonokinioro ngakujo nasubuna sodi kidongioto ngikenoi a ngakujo kech anasubuna esil, kinyasuna. Eyatario ngikenoi kech lukinomet emitina, tongopia ibore daang nikolong asubunete kesi.

⁷Etoakete ngitunga kus awadaang, ani lupiyayek, eyenunete atamar ayong arai Ekapolon Akuj.

⁸“Tani ikoni neni, ngirwa lu ialarotor esi lobukui, epete ngiche kus lu ebuchunosi alojie, emiekini ayong ngulu eyarete.

⁹Toliwor epewae kus lu epuunosi alojie, eyakasi lobukui luche, lukolong arikio kesi, ketamunete ayong. Ngirwa ngulu, atobilite ayong ngitai kech lu ebatarosi katoisikis ayong, kikokis ngimuduk, kibelos kilipa ngakujo nasubuna. Ekadanakinosi kesi kotere ngakiro naaronok daang asubete kesi.

¹⁰Eyenunete kesi atamar ayong arai Ekapolon Akuj. Nyalimunit ayong pas atamar asubea kesi ngakiro naaronok nugu.”

¹¹Ebala Ekapolon lo erai Ekapolon Akuj kona, “Taram ngakan! Topet ngalup a akeju! Kikalou tama, ‘Wae!’ Kotere ngakiro daang naaronok ka nakikadakinete na asubakis Ngisirael. Eari kesi ejie, ka akoro ta ngidekesinei.

¹²Ngini elona, edeakakin totoan. Ngini eapi, earakinio lojie, ani ngini epuun, taar akoro. Ekokini ayong adaikini angoit kang nikech neni.

¹³Eperete ngawat kech nakatoak ka ngakujo kech nasubuna, kiriama ngikenoi a ngakipeyos, pena lokenoi lu ilipitere ngakujo nasubuna ani ikeuna, ka kidiama ngimukur, ka naitae a ngimoru, kwap ekitoe loaliban ta ngichokei luapolok daang ta wadaang nikolong epeyonokinioto kesi ngakujo kech nasubuna. Sodi toyen itwaan daang atamar ayong arai Ekapolon Akuj.

¹⁴Ee robo, enyasuni ayong akwap kech. Etiliwori ayong akwap kech alaireng napei anariet ana alokuju tanang kwap lore a Ribila. Emam ni elomito Ngisirael ni ebuchar. Sodi toyen itwaan daang atamar ayong arai Ekapolon Akuj.”