Read turkana Esekiel 7 Bible Online

Esekiel 7 - turkana bible

Esekiel 7

¹Katolimok Ekapolon Akuj ayong akiroit tama,

²“Iyong itwaan, alimokinit ayong Ekapolon lo erai Ekapolon Akuj akwap a Isirael kona: Anang esal! Esal a akwap kadaang logo!

³“Isirael, anang tokona esal. Ingolikinete tokona ationis a angoit kang, kainyo kerirae ayong esi kotere na isubete. Nabo kerirae ayong esi kotere ngakiro kus daang nakikadakinete.

⁴Nyikijaluni esi akongu kang kori nyikisieniyete esi ayong. Nakaneni kerirae ayong esi kotere eboyor kus, keringa ngakiro nakikadakinete eyakasi nikus. Ngesi iyenuneta esi atamar ayong arai Ekapolon Akuj.”

⁵Ebala Ekapolon lo erai Ekapolon Akuj kona, “Epote naaronok etupasi! Ayoro, adolut!

⁶Adolu esal! Adolu esal! Ayoro, adolu!

⁷Esi ngitunga a akwap kana, abu amunyaro kus! Anang akolongit. Ee robo, anang akolongit a ekurikur, meere akolongit na imariteteere a alakara alokidiama ngimoru.

⁸“Anang tokona ni kabukokinea esi anyunyura kang, kesunyak angoit kang, atotub ngakiro itemem ka eboyor kus. Kerirae ayong esi kotere ngakiro kus daang nakikadakinete.

⁹Nyikijaluni esi akongu kang kori nyikisieniyete esi ayong. Nakaneni kerirae ayong esi kotere eboyor kus, eringa ngakiro nakikadakinete eyakasi nikus. Ngesi iyenuneta esi atamar ayong arai Ekapolon Akuj, nakarami esi.”

¹⁰Ayoro, adolu akolongit na kimunyarere esi! Amin amoitanut wadaang! Akulau ekinis.

¹¹Ariku amoitanut aronis. Emam tani ipei kus ni idongi, kori ngiboro kus lukaalak lu idiasitae, kori ebari kus. Emam itwaan anikus eringa eanyuni arimatoi kori ekipur.

¹²“Anang akolongit. Ee robo, aapuu akolongit na nyelakaror ekagielan kori ekagielaran, kainyo etikokin kesi daang anyunyura kang.

¹³Nyebuuni ekagielaran ibore ni agiela, tani kidong ngesi eyari, kainyo etikokin anyunyura kang kesi daang. Kotere nguna, nyebuunio ibore nisek agielari ngesi. Kotere aronis ngina, eyuun kainyo atikokin anyunyura kang itwaan daang.

¹⁴Erukini aburuch kitonyou ngitunga daang, nakaneni emam tani ipei ni elosi lojie, kainyo etikokin anyunyura kang ngitunga daang.

¹⁵“Eyei ejie nikalapatan, toyei edeke ka akoro tooma ere. Itwaan daang ni eyei nikalapatan a ere, earakinio lojie, ani itwaan daang ni eyei tooma ere, emunyari edeke ka akoro.

¹⁶Ani keyakasi ngitunga epuun, ematarosi lomoru loger a ngakurio ana eemito ngadipoe. Kigor itwaan daang kotere aronis keng.

¹⁷Elilimiyorete ngakan a ngitunga kadaang, tamarana ngakungin.

¹⁸Enapete kesi ngiguniae, ebulit noi. Ebanyario ngakies kech, kiruma kesi daang ngileech.

¹⁹Imasakinete kesi ngakwangae kech lorotin, kikok egolit kech asakatan. Nyeyuunete kesi ngakwangae kech ka egolit akolongit na abukunio ayong Ekapolon Akuj anyunyura kang. Nyimwokete kesi kori nyilelebikinete ngakwangae na egolit nakookies kech, kainyo ngiboro ngulu kolong elomakinete kesi naronis.

²⁰Enisatar kolong kesi asir kech pas, nakaneni tosubeta ngakujo kech nakikadakinete ka ngiboro lua ngileech. Ngakiro nguna etiliworea ayong ngiboro ngulu daang lu inyasuna anikech.

²¹“Ewaakini ayong ebarit kech nakan a ngitunga a ngakwapea anache tangatasi. Eremete ngirukooi ebari kech kinyasut.

²²Engoliari ayong wache sodi kinyasuneta kesi akai kang. Ebwangete ngirukooi tolomasi kinyasut.

²³“Echoliakini ayong ibore daang. Elelebun akitu nakwap, elelebun amoitanut lorerea.

²⁴Ayauni ayong ngibukui luaronok noi tolemasi ngawiyei kus. Atubori ayong ekinis a ngitunga kus alu a ngikilinga, kinyasunae ni ilipeeneta kesi.

²⁵Na enometa kesi ngakiro, tasaka ekisil nakaneni nyeanyunete.

²⁶Epote ngakiro naaronok kidokokinos nakiro nache naaronok. Ebuni akitu naaronon, ani eringa bu nache. Imaimayete esi ngikadwarak kitolimokineta ngakiro na aanyut. Engopikinete ngimurok a Akuj ngitalio itatamete ngitunga. Engopikinete ngikasukou ngakiro erikinioto ngitunga.

²⁷Ikalouni ekapolon tosutonok, elungakin ekatukon, ebuli ngitunga tamaranikis. Kasubea ayong esi daang na isubeta esi luche. Katubokini ngakiro loger lo itubonokineta esi luche. Kidodikinete esi nguna atamar arai ayong Ekapolon Akuj.”