Read turkana Esekiel 8 Bible Online

Esekiel 8 - turkana bible

Esekiel 8

¹Akolongit na ngakan a elap alo a ngikan-kapei, ekaru lo a ngikan-kapei lo kieniaritere sua nakwap nache, kibooyi ayong ka ngikasukou a Yuda alokai kang. Atipei, abu agogongu a Ekapolon alo erai Ekapolon Akuj katotikokin ayong.

²Ani engoliari, ataanyunga akisingolikinet a ibore ani ikwaan ka itwaan. Ewae lo alokwap lo esibit aabor, ekoni akim. Ewae lo alokidiama a akwaan keng napei anaabor, akwaikwai loger a asuat ananyang.

³ Abu ngesi kitorwaa ibore ni ekoni akan torwakin ngitim kang. Anakisingolikinet kangina, abu etau a Akuj kekeu ayong kidiama, kiding adis ka ngalup, sodi kayaa Yerusalem anakisingolikinet a Akuj. Kelomak ngesi ayong lokidor lo alotooma lo eteni lowae lo alokwap akai a Akuj, ni ayei akuj nasubuna na akadakinit Akuj.[7]

⁴Engolik ayong akwangis a Akuj a Isirael eyei neni, akwangis nasek engolikinit ayong anangolol a Kebar.

⁵ Katolimok Akuj ayong tama, “Itwaan, tokienyia kwap.” Ani akienyiari, engolik akuj nasubuna na akadakinit Akuj esipo alodiyete ekeno a ngakipeyos, ani elomunere lokidor.

⁶Katolimok Akuj ayong tama, “Itwaan, ingolik ba ngakiro na esubete kesi? Esubete Ngisirael ngakiro naaronok ketwarakinete ayong alokai kang ana italeuno! Nakaneni ingolikini iyong ngache naaronok noi.”

⁷Ani erumor kayaa lokidor a alaar ana anikalapatan. Ani akienyiari, engolik nikoororon anawas.

⁸Tolim ngesi tama, “Itwaan, toped awas.” Atoped ayong awas, atoriam ekidor.

⁹Katolimok tama, “Toloma kingolik ngakiro naaronok nakikadakinete na esubete kesi kaneni.”

¹⁰Sodi atoloma ayong engolik. Atapakinitae lowaitin a akai ngitorubei a ngimunio ka ngitieng luche lu etaleo akinyam,[8] lu elipito Ngisirael.

¹¹Ayakasi neni ngikarikok a Ngisirael ngitomwon-kaarei. Ayei tani Yaasania lokookeng a Chapan. Atingit ipei kech atartar nakinomet emitina, todirisite apuru a emitina kidiama.

¹²Katolimok Akuj ayong tama, “Itwaan, ingolik ba ngakiro na esubete ngikarikok a Ngisirael anaribu? Ilipito daang alokai ana ileleba ngakisikwaanet. Abe ebalasi, ‘Nyikitee Ekapolon Akuj ngoni! Aisiki ngesi akwap.’ ”

¹³Ani erumor katolimok Ekapolon Akuj ayong tama, “Ingolikini iyong kesi esubete naaronok noi akidwang nguna.”

¹⁴Sodi kayaa ngesi ayong lokidor lo alokwap akai a Akuj, engolik ngaberu igorosi esutonokinete kotere akitu a akuj anabe Tamus.[9]

¹⁵Katolimok ngesi ayong tama, “Itwaan, ingolik ba nguna? Eringa! Ingolikini iyong ngakiro naaronok noi akidwang nugu.”

¹⁶Sodi kayaa ngesi ayong nalaar na alotooma akai a Akuj. Diyete ekidor a akai, kiding ekeno a ngakipeyos ka ni itoreeneo, ayakasi ngikiliok ngitomwon-arei ka ngikan. Ebongokinito kesi akai ngakawa kech, kijuuruyete ingoliarito kide, ilipito akolong.

¹⁷Katolimok Ekapolon Akuj ayong tama, “Itwaan, ingolik ba nguna? Ebalasi ngitunga lua Yuda lugu kori epataka ngakiro daang naaronok esubete kesi kanege ka ekurikur lo apetakis nakwap a? Erubakinito kesi ketongoito ayong noi. Kingolik eger lo ketililieta kesi ayong noi.

¹⁸Kotere ngakiro nguna etikokin kesi anyunyura kang niaronon noi. Nyalakakini ayong kesi kori nyekesieniyete. Tani kegoronokis kesi ayong kesijika iremasi, nyeirari ayong ngakiro kech.”