Read turkana Esekiel 9 Bible Online

Esekiel 9 - turkana bible

Esekiel 9

¹Ani erumor eira ayong Akuj iremari ebala, “Taapuutu esi lu iriraate ere. Potu itingito ngiboro kus luaret.”

²Engolik ngitunga ngikan-kapei epote alowae alo a ekidor alo alokidiama, alo ingoliarit kwap, etingit itwaan daang iborosit keng niaret anakan. Arukito ka itwaan ni anapit eworu lokaanikan, etingit ibore ni igirio. Potu kesi daang towaa alokeno a ngakipeyos alo a asuat ananyang.

³Tonyou akwangis a Akuj a Isirael aloborei alu a ngabeben,*g** anisek ayei tolot lokidor a akai a Akuj. Tanyara Ekapolon Akuj itwaan ni anapit eworu lokaanikan ni atingit ibore ni igirio,

⁴ tama, “Kape kitor lore a Yerusalem etia ni etia, kigirak emachar loreetin a ngitunga kadaang alu eriabasi ka akichana kotere ngakiro naaronok daang na esubio alore.”

⁵Eira ayong Akuj elimokini ngitunga luche tama, “Kitoro lore iwapito itwaan en, taara ngitunga. Warasi nyiilakakis itwaan. Warasi nyikisien itwaan.

⁶Taara ngikasukou, ka ngisorok, ka ngaberu ta ngide. Nakaneni warasi nyiitap itwaan ni eyei emachar loreet keng. Kisiakisi kanege alokai kang.” Sodi kisiakis kesi alokasukou alu awaasi alongaren akai a Akuj.

⁷Tolimok Akuj kesi tama, “Kinyasutu akai kang. Kileleba ngawat nakatoak nalaarin. Kasiosi!” Apot kesi kisiakis akiar ngitunga alore![10]

⁸Ani erubakinito kesi akiar, edong ayong alopei. Emasakin ayong kwap tojuk ereet ngalup ekalou atama, “Wae, Ekapolon lo irai Ekapolon Akuj! Imunyari cha iyong Ngisirael lupiyayek ani ingoikinitor Yerusalem, a?”

⁹Tatachu Akuj tama, “Esubito Ngisirael ka ngitunga a Yuda ngasechesea nakationok noi. Elelebun ngaakot na abukosi kesi nakwap. Eleleba kesi Yerusalem ngakiro na nyeriyan, kainyo abe ebalasi, ‘Aisiki Ekapolon Akuj akwap, nabo nyikitee ngesi sua.’

¹⁰Nakaneni nyedepari akongu kang kesi kori nyekesieniyete kesi ayong. Asubakinea ayong kesi ngakiro na esubeta kesi luche.”

¹¹Ani erumor tobongu itwaan ni anapit eworu lokaanikan nia Ekapolon Akuj tolimok tama, “Asubak ayong loger lo kidungokinitor iyong.”