Read turkana Daniel 10 Bible Online

Daniel 10 - turkana bible

Daniel 10

¹Ekaru lo a nguuni araakar Korech ekapolon a Persia, apon kidodikinae Daniel akiroit. Belitechasa ngesi ekiro eche alimokinitae Daniel. Arai akiroit ngina aka iteni, nakaneni ationo akiyen.[10] Kisisakinae ngesi toyen anakisingolikinet.

²Ngirwa ngulu, ealolongi ayong Daniel a ngiukio a nguuni.

³Emam akimuj nakaabon na anyam ayong. Nyenyama akiring kori nyiira emuna lo epuritoe. Nyiwasakina ayong akimiet ngiukio luuni ngulu.

⁴Akolongit na ngatomwon-arei ka ngoomwon a elap alo ekingaren, awei ayong alokwaas a angolol anaapolon enyaritae Tigiri.

⁵Ani engoliari ayong, ataanyunga itwaan ni anapit ngiworui lukaanikak, tanapite aruba a egolit alo a akwap a Upas.

⁶ Amalimali akwaan keng loger a akabulutuneit ana enyaritae berili. Ekoni ereet keng akimileaunet, kikote ngakonyen keng ngakinwaket na enokete. Ngakan ka ngakejen keng, amalimalete loger a asuat ananyang ana ipusitae. Ekoni etoil keng echale a asepich a ngitunga.

⁷Ayong bon abu engolik akisingolikinet ngina. Ngitunga luche lu kirukitor ayong, emam ibore apot taanyungasi, nakaneni tobul kesi noi, tamataros akiduk.

⁸Apon kemiekin ayong alopei akienyikinit akisingolikinet nakitalari ngina, tolilimiyo akwaan kang. Topuseania ereet kang lokojokon, tosub meere lopalem kang.

⁹Ani eirari etoil keng, atadakakin nalup atoper a akook, erakar.

¹⁰Abu akan katorwakin ayong, kekeu atowo a ngakungin ka ngakan, emaranete.

¹¹Katolimok emalaikat tama, “Daniel, kimina iyong Akuj. Tonyou towo topupok lokojokon ngakiro nakesuruori ayong iyong, kainyo kameunitae ayong nikon.” Ani kesuruori ngesi ayong ngakiro nugu, atonyou ayong atamarani.

¹²Katolimok ngesi ayong tama, “Daniel, wara nyiiem. Eirari Akuj akilip kon napei kolong anakolongit ana ekingaren itiditeunor iyong alongaren keng tasak akiyen ngakiro. Akilip nakon ngina abunitor ayong.

¹³Emalaikat a akuj a Persia, ketepegi ayong a ngirwa a ngitomwon-arei ka epei. Nakaneni Mikael lo erai epei a ngimalaikae aluapolok, bu kengarak ayong. Emiek ayong ngesi kaina erukito ka emalaikat lo a akuj a Persia.

¹⁴ Abu ayong akiteyen iyong ngakiro na eanyunete ngitunga kon monan, kainyo erai akisingolikinet na ianyunga iyong aka ngirwa aluka monan.”

¹⁵Ani kelimu ngesi nguna kerumor, atokienyik ayong kwap, katokuruwo akiruorikin.

¹⁶Abu epei lo ekwaan ka itwaan tatap ngipon kang, atolimok ayong lo awei alo diyete kang atama, “Ee ekapolon kang, kating ayong nikaapilan kotere akisingolikinet naga, nabo alilimiyo akwaan kang.

¹⁷Ekoni ayong ekedalan lo ewei alongaren ekapolon keng. Ekokini ayong kiruoro ka iyong ai? Adaunosi ngikilinga kang, angop tani kona eangakini!”

¹⁸Ngolo ekwaan ka itwaan, katorwakin ayong nabo, sodi pena ayong ngikilinga.

¹⁹Katolimok tama, “Itwaan, kimina iyong Akuj lokojokon, kotere nguna, nyiiem. Kiboikin akaalimon. Togogonger nabo totitinyer.” Ani elimuni ngesi ngakiro nguna, abu ayong atotitinyer, atolimok atama, “Ekapolon kang, tolim ngakiro na isaki iyong alimun, kainyo kitogogong iyong ayong.”

²⁰Katolimok ngesi ayong tama, “Iyeni iyong ibore ni abunitor ayong nikon a? Nakaneni abongi tokona ayong akitijwore emalaikat lo itee Persia. Ani ketiji kerumor, ebuni emalaikat lo itee Giris.

²¹Nakaneni keteyeni ayong iyong ngakiro na igiritae nakitab na a Iteni. Emam iche ni kengarakini mati Mikael lo erai emalaikat lo kitee esi.