Read turkana Daniel 11 Bible Online

Daniel 11 - turkana bible

Daniel 11

¹“Ani alowae kang, ekaru lo ekingaren a ekapolon Dario, alo arai Emedit, abu ayong egang ka akitogogong Mikael.

²Eraakasi tokona ngakiro nakesisakini ayong iyong ngaka iteni.” Tama emalaikat, “Epolokinete ngikapolok ngiche nguuni Persia. Etupuuni kesi lo a ngoomwon lo ebarit noi akidwang luche daang. Ani egogonger ngesi noi kotere ebari keng, ichichiuni luche daang akitijikin apolou a Giris.

³“Ani erumor ebuni ekapolon lokajwon noi lo epolokini akwap nakaaloman noi, tosub ibore daang ni esaki ngesi.

⁴Tani ikoni neni, ngirwa lu eruunio agogongu keng noi, iealar apolou keng, totiakatiakaar lowaitin luomwon a akwap. Ngikapolok lu nyeraakasi ngalesea keng kesi ilunyokinosi nados keng topolokis. Nakaneni, nyikokini agogongu kech nakolong keng. Kainyo editunio apolou keng nakinae ngitunga lugelayek.

⁵“Egogonger ekapolon lo a Misiri. Nakaneni, epei a ngikarikok a ngasigerea keng, egogonger noi akidwang ngesi, nabo epoloor apolou keng noi.

⁶Adaunet a ngikaru a ngikos echamakinosi ekapolon a Misiri ka ekapolon a Siria. Itogogongio achamakin ngina a ekamurake, kipoto ekapolon a Misiri nakookeng kiut ekapolon a Siria. Nakaneni nyerubi achamakin ngina, kainyo eario aberu ngina, ka lokile keng, ka lokookech ta ngikasubak etich kech lukolong erukorete ka ngesi.

⁷Ngirwa ngulu, eliwor epei a ngiyenet a aberu kangina ekapolon. Itijikini ngesi ngasigerea a ekapolon a Siria toloma tooma awas nakaagongon, kidwang kesi.

⁸Iwoki ngesi ngakujo kech tobongorea Misiri. Imoriari ka ngiboro lukaalak a ngaropiyae lu eraakasi ngakwangae, ka egolit, lu edekonokinio ngakujo nguna. Nyeremi ekapolon lo alokuju ekapolon lo alokwap a ngikaru a ngikos.

⁹Ani ekisidi, eremi ekapolon a Siria akwap a Misiri, nakaneni elarakin tobong nakwap keng.

¹⁰“Echunakinete talokookeng a ekapolon a Siria ajore natikaalan tangaasi ejie. Eneteunosi kesi loger a akaale, toremo awas nakaagongon a Ngimisiri.

¹¹Ani engoi ekapolon a Misiri, tonyou tolot kitijik ekapolon a Siria. Echunakini ekapolon a Asiria ajore natiapolon, nakaneni idwangio kesi.

¹²Inisakin ekapolon a Misiri ani edwangea ekapolon a Siria. Eari ngesi ngasigerea nakaalak, nakaneni nyerubakini ngesi idwangeene ngimoe keng.

¹³“Ebongori ekapolon a Siria tochunak ajore nakaalan noi na idwangit nache kolong a ekingaren. Ani enangi ngirwa lu engaarea ejie, irukunete ka ajore nakaalan noi etingit ngiboro lukaalak lujiet.

¹⁴Ngirwa ngulu, engerete ngitunga lukaalak ekapolon a Misiri. Daniel, ngitunga ngiche lukamoitanak a akwap kon, engerete ekapolon a Misiri kiyookinor akisingolikinet naga, nakaneni idwangio kesi.

¹⁵Isiriami ekapolon a Siria ngasigerea keng ere lo a awas anakaagongon tolema. Nyeweikinete ngasigerea a Misiri ngesi. Tani lukajwok noi anikech, elilimiyorete.

¹⁶Esubea ekaremon a Siria kesi ngakiro nacha esaki asubea, emam itwaan eweikini ngesi. Ewei ngesi anakwap anakebusean, toliwor akwap ngina akeng.

¹⁷“Engaari ekapolon a Siria ajore erukito ka ngasigerea keng daang. Isilete ngesi ka emoit keng tachamakinos. Ipotori ngesi nakookeng kiutae, sodi kinyasunea apolou a emoit keng. Nakaneni tani kikok neni, elarakin.

¹⁸Ani ekisidi, eremi ngesi ngibukui lu elomito lokwaas a anam, kidwang. Nakaneni ekarikon a ngasigerea anagelayek, idwangi ngesi totubo ngiwog lukeng. Ee robo, elemario ekapolon a Siria nidikil kotere ngiwog.

¹⁹Ebongori ekapolon ngolo nawasea nakaagongok a akwap keng, nakaneni idwangio, toliwor esal keng ngolo.

²⁰“Etupuuni ekapolon eche ngesi, lo emeuni itwaan ni itubuki ngitunga echur kiatakinor ebari a akwap keng. Eario ekapolon ngolo adaunet a ngirwa a ngidikidio, nakaneni nyeario ani engoikinitotor ngitunga, kori nyeario alojie.”

²¹Torubak emalaikat isisaunit ngakiro nguna ebala, “Emini ekapolon eche Siria, lo erai itwaan niaronon noi ni nyejoikinit eliwor ekapolon. Ituumwokini ngesi ngitunga tolema apolou a amodeanut.

²²Itwaan daang ni itopegi ngesi, kerai tani ngasigerea kori emuron loapolon a Akuj, ipudaario, taarae.

²³Ingalae ngesi ngibukui luche tachamakinos ka ngesi. Isikokin ngesi togogonger, tani kepolokinit ebukut lo edit.

²⁴Eremi ngesi ewae a akwap lo eyei ebari, eringa nyelimokina itwaan. Esubi ngakiro na emam tani epei kata apakeng, kori taapaakeng lo asub nakanuan. Ani erumor ekorakini ngesi ngirukitos keng ebari ka ngiboro lu engatari alojie. Erekini ngesi alosit akirem ngawasea nakaagongok, nakaneni nyerubakini akikoanakin neni nikooyen.

²⁵“Kotere ekileenu echunakini ngesi ajore nakaalan kitijikinio ekapolon a Misiri. Enyouni ekapolon a Misiri kitijik ngesi erikit ajore nakaalan noi, tojwoko noi. Nakaneni idwangio ekapolon a Misiri, kainyo erekinio ngakiro nakingalaet ngesi.

²⁶Ngulu imujete akimuj keng naajokon, kesi inyasunete ngesi. Eario ngasigerea keng nakaalak, tomiatarae ajore keng.

²⁷Iboikinosi ngikapolok luarei ngulu kimuja awapei, tarai alotai kech, itamea ipei kech daang niche naaronok. Ingalasi kesi make. Tani kikokis neni, emam ibore eanyunete kesi kainyo eringa ngirwa lukolong arekinitae nyenanga.

²⁸Ebongori ekapolon a Siria nawi keng, etingit ebari daang lo angatari, esaki akinyasun eger lo elipitotor ngitunga a Akuj. Esubi ngesi ngakiro na esaki akisub, ani erumor tobongo nawi keng.

²⁹“Ani ekisidi, eremi ngesi Misiri nabo. Alotoru naga, egelaakearosi ngakiro nyikokinete nikolong sek.

³⁰Epote Ngiroma a ngatubwae anaapolok kitijikis ngesi tobul. “Ebongori ngesi engoit ileleba, tasak akinyasun eger lo elipitotor ngitunga a Akuj. Iwapi ngesi nguna elimokinete ngitunga lukolong angerete akilip ngina.

³¹Inyasunete ngasigerea ngache akai a Akuj. Etuborete ngakipeyos na inomio akolongit daang, sodi kitowaa Ekenyasunan Loaronon Noi.[11]

³²Itoboboe ngesi akituk kisoswa lu echwangakinete akilip. Nakaneni ngitunga lu eyenete Akuj kech, itopegete ngesi, nyiloilookinosi.

³³Ani lu eosok anikech, itoosunete luche. Tani ikoni neni, a ngirwa a ngikos, emunyario kesi a akwara ka akim, ka arikonot ta ademaro ebari kech.

³⁴Ani ngirwa lu earere kesi ngulu, eanyunete akingarakino nadiochichi. Ani lukaalak, imorikinosi ka kesi togeal ibore esakete.

³⁵ Eario ngitunga lukoosok ngiche, nakaneni ikiunosi ngitunga kotere akitu kech, kitaleunos, tarata luasegak, tanang akolongit na esal nakolong etiakunit Akuj.

³⁶“Esubi ekapolon a Asiria ngakiro nacha ejoikinito ngesi. Iwogakin ngesi kipuruun ebala edwangit ngesi ngakujo daang. Imenyi ngesi Akuj na idwangit ngakujo nache. Isikokin eboyor keng tanang ni eanyunea eriras a Akuj, kainyo ngakiro nakolong erekinitae, ejoikinit esubakinio.

³⁷Nyekachikini ekapolon ngolo akuj nakolong elipito taapaakeng kori akuj na eminasi ngaberu. Ejamuari ngesi ngakujo nache daang, kainyo etamari ngesi apolot noi akidwang ngakujo nguna daang.

³⁸Nakaneni eliwor ngesi lo erima akuj na itee ngawasea nakaagongok akidwang ngakujo nguna. Elemikini ngesi Akuj nakolong peelipito taapaakech egolit, ka akwangat, ka ngamoru nakaalak a ngaropiyae ta ebachit lokaalan a ngaropiyae.

³⁹ Ngitunga a akuj anagela kesi eyuunete ngawasea kech nakaagongok. Ani ngulu echamunete apolou keng, eliwor lu erima ngesi lokojokon noi. Itiliwori kesi ngikapolok, tokorak akwap toliwor ebachit kech.

⁴⁰“Ani na enangea esal, itijikini ekapolon a Misiri ngesi. Ebuakini ekapolon a Asiria ejie ngolo nikationon ipirakinit loger a ekuwam alo ipiripiri. Eneteari ngaurukukui na irito ngangolei ka ngikameak ngangolei, ta ngatubwae naapolok nakaalak. Eremi ngakwapea nakaalak toneteiar loger a akaale.

⁴¹Eremi tani akwap nakebusean taar ngitunga ngabunge nakaalak. Nakaneni ebuchunosi ngakwapea a Edom ka Moab ta ewae loapolon a Amon.

⁴²Ngirwa lu eremio ngesi ngakwapea nguna, nyebuchar tani akwap a Misiri.

⁴³Eliwor ebari a Misiri daang ekeng, egolit ka akwangat ta ngiboro luche kaalak a ngaropiyae daang. Ngitunga a Libia ka lua Kuch*g** iwapete etal keng.

⁴⁴Itubulete ngesi ngakiro na epote alo kide ka akwap. Ejii ngesi engoit ileleba tomunya lukaalak.

⁴⁵Ani eya nguna daang, itowei ngesi ngieman keng luapolok anakidingos a anam ka emoru lo edukokinitae akai a Akuj. Etoani ngesi emam tani itwaan ipei ni ingarakini.”