Read turkana Daniel 12 Bible Online

Daniel 12 - turkana bible

Daniel 12

¹Tolim emalaikat lo anapit ngiworui lukaanikak tama, “Ngirwa ngulu, etakanuni Mikael, emalaikat loapolon lo erai ngesi itee Isirael. Sodi pena ngichan luaronok noi lu nyepena nakwap napei apeneta ngibukui nakwap. Na enangea ngirwa ngulu, ngitunga daang a akwap kon lu igiritae ngirora kech nakitab a Akuj, eyuunio.

²Ngikaalak alusek atoaka, eyarunete. Eanyunete ngiche akiyar nakajik, ani ngiche taanyut ngileech nabo kimenyarae jik.

³Ani lukoosok, imaunete loger a adis. Ani lukolong etatamete luche akisub na eteniyete, imaunete jik loger a ngikanyer.”

⁴ Katolimok ngesi ayong tama, “Daniel togolok tokona akitab. Kirichak ngakiro nugu kainyo eraakasi ngamunonoe. Togol akitab taramak emachar tanang ngirwa lu esal. Ani eringa ngirwa ngulu nyenanga, ematarosi lukaalak ama ka ama, nabo iatakin aosou.”

⁵Ani erumor, abu ayong Daniel ataanyunga ngitunga ngiarei ewaasi alokwaas a angolol, ewei ipei alokwaas a epei a angolol, towei niche alokwaas aloche.

⁶Engit ayong itwaan ni ayei kuju angolol ni anapit ngiworui lukaanikak, atama, “Ori edaunotor ngakiro nakitubulete nugu?”

⁷ Kikea itwaan ni ayei kuju angolol ngini ngakan keng kidiama sodi kikong elimit ekiro a Akuj ana eyari jik. Eira ayong ngesi elimuni tama, “Eliwor ngikaru nguuni ka ngilapio ngikan-kapei. Adaunet a aboliaro a ngitunga a Akuj, tosubakina ngakiro nguna daang.”

⁸Eira ayong ngakiro na alimuni ngesi, nakaneni nyeyena ayong eger kech. Kotere ngakiro nguna, engit ayong ngesi atama, “Nakaneni ekapolon a, ikokinete daang esalunete ai?”

⁹Tatachu ngesi tama, “Daniel, kape tolot, kainyo imunonitae ngakiro nabo idaitae tanang enangi esal.

¹⁰Ikiunosi ngitunga lukaalak, kitaleunos tosegeta. Nyeyenunete luaronok ngakiro, pearai erubakinete aliwor luaronok noi. Lukoosok make kesi eyenunete.

¹¹Napei anakolongit ana etuborere ngakipeyos na akolongit ka daang, ngesi atamar napei anakolongit ana a Ekenyasunan Aloaronon Noi,[12] edaunosi ngirwa abunget apei ka ngamiae ngaarei ta ngatomwon-koomwon.

¹² Epiaritae noi lu idongete emunoi tanang ngirwa abunget apei ka ngamiae ngauni ka ngatomwon-uni ka ngikan edaunosi!

¹³“Ani iyong Daniel, toliwor lo kimunoi tanang losal. Tani kitoana iyong, iyaruni taanyu ebachit kon ngirwa lu esal.”