Read turkana Daniel 2 Bible Online

Daniel 2 - turkana bible

Daniel 2

¹Ekaru lo a ngiarei araakar Nebukadinesa ekapolon, abu ngesi kiruja. Kichanakin etau keng, kikoler ngesi.

²Todung ekapolon atamar tanyaraunae ngikekeriak, ka ngimurok, ka ngikasubak ta ngikelamalamak a akwap a Babilon, tolimokis ngesi atamar anukiro erujaunit ngesi. Pot kesi towaa alongaren ekapolon.

³ Tolimok ekapolon kesi tama, “Erujae ayong, nabo echanakin etau kang esaki akiyen eger a ngakiro ana erujae ayong.”

⁴Apot kesi tatachakis ekapolon a Ngaramaik[2] tamasi, “Ee ekapolon, ekapolon toyei jik! Tolimokinae sua ngakiro na irujae iyong, esisakisi sua iyong eger kech.”

⁵Tolimok ekapolon kesi tama, “Atiaku ayong atamar kitolimokis esi ayong ngakiro na erujae ka eger kech. Ani pekilimokis, enyilinyilaario nginerin a ngawat kus, toliworos ngawiyei kus asakatan.

⁶Ani kilimokis esi ayong ngakiro na erujae ka eger kech, kainakini ayong esi ngainakinet, kainak arimatoi naapolon. Tokona bocha, tolimokinae ayong atamar anukiro erujae ayong, ka eger kech.”

⁷Tatachakis nabo kesi ekapolon tamasi, “Kimiek ekapolon kitolimok sua ngikasubak etich keng ngakiro na erujae, esisakisi sua ngesi eger kech.”

⁸Sodi tolim ekapolon tama, “Iteni dir, ayeni ayong atamar isakete esi atinenikin nikooyen, kainyo iyenete esi atamar asubakini ayong ngakiro na alimu,

⁹atamar ani pekilimokis esi ayong eger a ngakiro ana erujae, eyei esi eriras epei bon lo kerirae ayong esi. Ichamakinosi esi akingalare ayong ka akiruor alioko alongaren kang, isakete atamar minio ngakiro kona ilochotor. Tolimokinae tokona ayong atamar anukiro erujae ayong, atoyenea atamar ipedorete esi alimokin ayong eger a ngakiro kanguna.”

¹⁰Tatachakis ngikoosok a akwap keng ngesi tamasi, “Emam itwaan anakwap ni kilimokini iyong ekapolon lo kirimae ngakiro na isaki iyong akiyen. Emam ekapolon, tani kerai lo epolot noi, tojwono, lo asak akiyen akiroit na ikoni naga alomurok, ka ngikekeriak, ka ngikelamalamak ta ngikapilak.

¹¹Ibore ni isaki iyong ekapolon lo kirimae, etiono noi emam itwaan kisubakinea iyong. Ngaye robo kerai ngakujo epedorete asubakin ngakiro na ikote nguna. Nakaneni nyirukeenete robo ngakujo ka ngitunga.”

¹²Kotere nguna, tongo ekapolon lokojokon noi, todung atamar tamunyarae ngikoosok daang alo Babilon.

¹³Apon todungunoe atamar taarae kesi daang aapei ka ta Daniel ka ngipaalon keng.

¹⁴Abu Daniel tolot nia Ariok, alo arai ekarikon a ngasigerea ana eteete ekapolon. Ariok sek alimokinitae atamar taar ngikoosok a Babilon. Kingit Daniel Ariok ngakiro a achwaanu toosokinite tama,

¹⁵“Nyo edungunitor ekapolon ngakiro a amoitanut kona?” Sodi Ariok kisisak Daniel ngakiro nguna.

¹⁶Tolot Daniel atipei nia ekapolon alimokin atamar kidarunae mono, taanyunea ngesi erot lo isisaunea eger a ngakiro ana erujae ekapolon.

¹⁷Tolot Daniel nawi tolimok ngipaalon keng Anania, ka Mikael ta Asaria ngakiro na asubakin.

¹⁸Tolimok Daniel kesi atamar kilipa Akuj na adis kidodiu ngisien, ka alimokin Akuj atamar kiwolu ngakiro namunonoe nguna, sodi nyear kesi aapei ka ngikoosok luche a Babilon.

¹⁹Apon ngakiro namunonoe nguna kiwolokinoe Daniel anakisingolikinet nakwaare. Sodi kipuruu Daniel Akuj na adis.

²⁰Tama Daniel, “Kipuroe ekiro a Akuj jik ka nabo jik, na erai aosou ka agogongu akeng.

²¹Epolokinit ngesi ngirwa ka ngikaru. Itiliwori ngesi itwaan ekapolon, ka alemar niche anapolou. Einanakini lukoosok aosou, nak lukachwaak achwaanu.

²²Iwoluni ngesi ngakiro na erapap namunonoe. Eyeni ngakiro na erapitae anaribu, ibooyete ngesi ka akicha.

²³Kepuruunit ayong iyong, katorima, Akuj kata apaakang. Kitaanyu iyong ayong aosou ka agogongu. Kidodik iyong ayong ngakiro na kisaki sua anikon, kainyo kiteyen iyong sua akiroit a ekapolon.”

²⁴Tolot Daniel nia Ariok, losek adungokinit ekapolon atamar taar ngikoosok a Babilon. Tolimok tama, “Nyiar ngikoosok a Babilon. Torikoroe ayong nia ekapolon, atolimok ngesi eger a ngakiro ana erujae ngesi.”

²⁵Atipei toriku Ariok Daniel nia ekapolon Nebukadinesa tolimok ekapolon tama, “Aanyu ayong epei a ngirikon alu eraakasi Ngisirael, lo kilimokini iyong ekapolon lo kirimae, eger a ngakiro ana irujae iyong.”

²⁶Tolimok ekapolon Daniel (lo enyaritae a echekiro Belitechasa) tama, “Ipedori iyong alimokin ayong ngakiro na erujae ayong ka eger kech a?”

²⁷Tatachak Daniel tama, “Ekapolon lo kirimae, emam ekooson, kori ekadwaran, kori ekekerian, kori emuron, kori ekesoman ngikanyer lo kilimokini iyong nguna.

²⁸Nakaneni eyei Akuj nadis na iwoluni ngamunonoe. Kitaanyu ngesi iyong, ekapolon lo kirimae ngakiro na monan esubakinosi. Kalimokini tokona ayong iyong ngakiro na irujae, ngakiro nakisingolikinio iyong ijotoe.

²⁹“Naijotoo iyong ekapolon lo kirimae, ibu kiruja ngakiro na monan epote. Akuj ngina iwoluni ngamunonoe, abu kidodik iyong ngakiro na monan esubakinosi!

³⁰Ani eliwor ayong, pekewolokinio ngamunonoe nugu ani aosio noi akidwang ngitunga luche lu eyarete. Erai kewolokinere, toyenea iyong ekapolon lo kirimae eger a ngakiro ana irujae, ka ngitamen kon.

³¹“Ekapolon lo kirimae, anakisingolikinet kon, ibu iyong taanyunga ekisikwaane loapolon noi ewei, achai tamalimali, kitubuli na ingolikinea.

³²Akou keng, arai egolit loasegan. Erarum keng ka ngakan, arai akwangat. Aabor keng ka ngikalokoi, arai asuat nanyang.

³³Ngakejen keng arai asuat nakirion, ani ngakichieket keng, araakasi epewae asuat nakirion, taraakas epewae echoto.

³⁴Ani eringa iyong ikienyikinit kimasun amoru natiapolon bon anakope. Kitel amoru ngina asuat nakirion ka echoto anakichieket a akisikwaanet, tobwang kiela.

³⁵Atipei abu asuat nakirion, ka echoto, ka asuat nanyang, ka akwangat ta egolit kialaros kikokis ngatunyeny anakirias ngirwa lu elemere ngamanat. Tokuta ekuwam nyiidong tani wadiochichi. Ani amoru na anangi akisikwaanet, toliwor emoru lotiapolon kilelebun akwap wadaang.

³⁶“Ngakiro na irujae iyong nguna. Kalimokini tokona ayong iyong ekapolon lo kirimae eger a ngakiro kanguna.

³⁷Ekapolon lo kirimae, irai iyong ekapolon lo ipolot noi alokapolok kadaang. Kitiliwo iyong Akuj a adis ekapolon, kitaanyu apolou, ka ationis ta arimatoi.

³⁸Kitiliwo ngesi iyong ekapolon a ngitunga kadaang, ka ngitieng daang ta ngikieny. Iyong irai akou a egolit.

³⁹Ekisidi kon, emini apolou ache na nyepolot loger anakon. Ani adaunet kangina, emini na ngauni na erai apolou a asuat ananyang, na epolokini akwap daang.

⁴⁰Ani erumor emini apolou na ngoomwon na egogong ikoni asuat nakirion. Ani kona palem ebwangabwangaa asuat nakirion ibore daang, ebwangabwangaari ngesi ka akiriedakin ngapolosio na ingarenete.

⁴¹Ibu iyong kingolik ngakichieket ka ngimoyo a ngakejen eraakasi epewae echoto, taraakas epewae asuat nakirion. Idodiunit ibore ngini atamar eliwor apolou ngina na etiakak ngaarei, egogonger epewae kikok asuat nakirion, loger losek ingolikinea iyong asuat nakirion imorikina ka echoto.

⁴²Ani kona araakatar ngimoyo lua ngakejen epewae asuat nakirion taraakas epewae echoto, idodiunit neni atamar egogonger apolou epewae, tapalagag epewae.

⁴³Ibu nabo iyong kingolik asuat nakirion imorikina ka echoto. Idodiunit ibore ngini atamar ngikapolok a apolou kangina, etamarete emorikisi ngitunga a ngawiyei kech kotere akiutanakin, nakaneni nyepedorete asuat nakirion akimorikin ka echoto.

⁴⁴Ngirwa lua ngikapolok kangulu, itowei Akuj a adis apolou na nyinyasunio kori na nyirumete ngitunga ngiche. Ebwangabwangaari ngesi ngapolosio nguna daang kiela, tasalut, kidong ngesi eyei jik.

⁴⁵Ibu iyong kingolik eger lo achakunor amoru bon anakope, kitel akisikwaanet na asubunitae a asuat anakirion ka nanyang, ka echoto, ka akwangat ta egolit. Kilimokinit iyong Akuj naapolon ngakiro na esubakinosi monan. Kesisak ayong iyong iyookino, ngakiro na irujae ka eger kech lo erai eka iteni.”

⁴⁶Toriedik Nebukadinesa tatap ereet ngalup, sodi todung atamar kipeyoe ngakipeyos ka alemun ngalemunet kotere Daniel.

⁴⁷Tolim ekapolon tama, “Iteni dir, Akuj kon erai Akuj a ngakujo, nabo erai Ekapolon a ngikapolok, tarai akewolunon a ngamunonoe, kainyo ipedo iyong akiwolun akiroit namunono naga.”

⁴⁸Abu ekapolon kitiliwo Daniel ekarikon, nak ngainakinet nakaalak noi naajokak, kitiliwo ngesi ekarikon a ewae alo anyaritae Babilon, ka akitiliwor ngesi ekaweikinan a ngikoosok kadaang alu a awi a ekapolon.

⁴⁹Kona alimokinea Daniel ekapolon ngakiro a Chadrak, ka Mechak ta Abedinego, abu ekapolon toseu kesi toweikis ngakiro a ewae alo anyaritae Babilon. Kidong Daniel ibooyi anawi a ekapolon.