Read turkana Daniel 4 Bible Online

Daniel 4 - turkana bible

Daniel 4

¹Tomea ekapolon Nebukadinesa akituk naga nia ngibukui, ka ngitela ka ngitunga a ngangajepa a nagelagelae kadaang anakwap, ebala, “Maata!

²Topupokisi eger a ngakiro anakatalarak, ka ngakitoodikinet nakailiilok nakedodik ayong Akuj na Epol Noi.

³Epolok noi ngakiro nakatalarak na kidodeanakini Akuj ngoni! Etioko noi ngakitoodikinet nakailiilok na esubi ngesi! Erai apolou keng akajik. Erubi apolou keng analesea kadaang.

⁴“Ayong Nebukadinesa, ebooyi niajokon alokai kang, ajakaanit alokai kang ana ekapolon.

⁵Eruja ayong akirujare naketubuli. Ani ajotoe, engolik ngakisingolikinet naketubulete.

⁶Atodung ayong atamar torikunoe ngikoosok a Babilon daang nikang, kedodikis ayong eger a ngakiro ana erujae.

⁷Apon torikunoe ngikekeriak, ka ngimurok, ka ngikapilak, ka ngikesomak ngikanyer, atolimok kesi ngakiro na erujae, nakaneni tokuruwo kesi akisisakin ayong eger kech.

⁸Ani ekisidi tolom Daniel (ekiro keng eche ngesi Belitechasa, lo erai ekiro a akuj kang). Eyei etau a ngakujo[4] ana italeuno nikeng, atolimok ayong ngesi ngakiro na erujae atama,

⁹‘Ee Belitechasa, ekapolon a ngikekeriak, ayeni ayong atamar eyei etau a ngakujo ana italeuno nikon, nabo iyeni iyong ngakiro namunonoe daang. Akiroit na erujae ayong naga.[5] Tolimokinae ayong eger keng ngesi nyo.’

¹⁰“Ngakiro na erujae akou kang ajotoe ayong kesi nugu, na engoliarea ayong, engolik ekitoe lotikooyen noi eyei kiding akwap.

¹¹Torup ekitoe ngolo talangirir, tanang alemu keng nadis, toliwor itwaan daang anakwap itee.

¹²Ebuseak ngakui keng, arait ageor egononoe, tooma keng ayei akimuj na itemokin ngitunga daang anakwap. Eanganarete ngitieng a moding alotorube keng, toduko ngikieny ngakais kech naten keng, sodi tadak ibore ni eyari daang ageor keng.

¹³“Ani eringa ayong etami ngakiro a akisingolikinet kangina, engolik ayong ngolo italeuno, lo itee akwap, ebuni anadis.

¹⁴Tolim irema tama, ‘Kitelo ekitoe, totubo ngaten keng. Tararaasi ngakui, kiealasi ageor. Kimiekisi ngitieng kipungaros alokwap keng, toporosi ngikieny anaten keng.

¹⁵Nakaneni kimiekisi atorom analup, ekodakina asuat nakirion ka nanyang. Kimiekisi eperete ka nginyia anaro. “ ‘Kimiekisi ngakop kitapapala itwaan ngini. Kimiekisi ngesi kiruko ka ngitieng alonyia.

¹⁶A ngikaru a ngikan-kaarei, kimiekisi ngitamen keng nyeerata lua itwaan, pearai tarata lua etiengit.

¹⁷Eraakasi nugu ngakiro na adungunete ngulu italeuno, lu iteete akwap. Tokona bocha, kimiekisi ngitunga awadaang toyena atamar Akuj na Epol Noi, eyei agogongu anapolosio kadaang a ngitunga, nabo ipotori ngapolosio nguna nak itwaan cha daang ni esaki ngesi, tani ngitunga lu nyeyenikinitae.’

¹⁸“Ngakiro na erujae ayong nugu. Tokona bocha Belitechasa, tolimokinae ayong eger kech. Emam ngikoosok kang lu kalimokinete ayong, nakaneni ipedori iyong, kainyo eyei etau a ngakujo[6] ana italeuno nikon.”

¹⁹Daniel lo anyaritae ekiro eche Belitechasa, abu toriangakin iirari ngakiro nguna, totinenik nyiruorikina. Tolimok ekapolon ngesi tama, “Belitechasa, wara ngakiro na erujae ayong ka eger kech nyikiteriangakis iyong.” Tatachak Belitechasa tama, “Ekapolon lo kirimae, arai bo tarai ngakiro na irujae iyong ka eger kech ngaka ngimoe kon dang, meere na eraakasi ngakon!

²⁰Ibu iyong kingolik ekitoe lokooyen noi lolangir, enangito ngaten keng nakooyak nadis. Etee itwaan daang anakwap ekitoe ngolo.

²¹Ebuseak ngakui keng, nabo alal ageor keng noi etemokino akitan ngiborei daang. Eanganarete ngitieng a moding alotorube keng, toduko ngikieny ngakais kech naten keng.

²²“Ekapolon lo kirimae, iyong ngesi ekitoe ngolo! Ipoloor iyong noi igogonger. Ipoloor iyong inangi nadis, ani apolou kon epetakin akwap wadaang.

²³Ani erumor ibu iyong ekapolon kingolik ngolo itee akwap, ngolo italeuno, etiyaun anadis tama, ‘Kitelo ekitoe kinyasu, nakaneni kimiekisi atorom analup. Tokodakis asuat nakirion ka nanyang kiriam, kimiekis kaneni anaro ani eyakasi nginyia. Kimiekisi ngakop kitapapala itwaan ngini, nabo kimiekinae kiruko ka ngitieng a moding a ngikaru a ngikan-kaarei.’

²⁴“Ekapolon kang, eger robo a ngakiro ana irujae iyong ngesi logo. Ngakiro nguna adungu Akuj na Epol Noi atamar esubakinosi anikon.

²⁵Kitwarakinio iyong alotunga, kiruko ka ngitieng a moding. Idaka iyong nginyia loger a emong, kitapapala ngakop akwaan kon. Iboikin iyong loger ngolo a ngikaru a ngikan-kaarei, ani adaunet a ngikaru kangulu, iyenuni iyong atamar Akuj na Epol Noi ngesi eyei agogongu anapolosio kadaang a ngitunga, nabo ipotori ngesi apolou nak itwaan cha daang ni esaki ngesi.

²⁶Akiroit na adungunio atamar kimiekinae atorom ka ngaten keng analup, erai eger keng atamar kibuakinio iyong apolou kon na iyenea atamar Akuj na Epol Noi, ngesi bon epolokinit akwap daang.

²⁷Kotere ngakiro nguna, ekapolon lo kirimae, kiira ngakiro nakalimokini. Toisik akisech kon ka aronis kon, tosub nguna eriyan ka akidodiun ngisien alotunga alu ichiakiaritae. Epedorio ngikaru kon lua ajako akitalal!”

²⁸Apot nguna daang tosubakin ani a Nebukadinesa.

²⁹Adaunet a ngilapio a ngitomon ka ngiarei, alosi ekapolon Nebukadinesa alokidiama akai keng alo Babilon,

³⁰abu tama, “Kingolik mono cha iyong Babilon! Ere kang loapolon lokolong aduki ayong a ngikilinga kang, ka akibuseanu ta arimatoi.”

³¹Ani eringa ekapolon iruorikinit, totiyaun etoil anadis tama, “Ee ekapolon Nebukadinesa, kiira akiroit nakang naga. Alemar apolou anikon!

³²Kitwarakinio iyong ani eyakasi ngitunga! Irukete iyong ka ngitieng a moding anachokor, tadak nginyia loger a emong! Iboikin iyong loger ngolo a ngikaru a ngikan-kaarei, ani adaunet a ngikaru kangulu toyen atamar Akuj na Epol Noi ngesi eyei agogongu anapolosio kadaang a ngitunga, nabo ipotori apolou nak itwaan cha daang ni esaki ngesi.”

³³Apot ngakiro nguna kiyookinos atipei ani a Nebukadinesa. Kitwarakinae ngesi alotunga toliwor edak nginyia loger a emong. Kitapapala ngakop a adis akwaan keng, tooyaketa ngajul a akwaan keng tabata ngakopir a egole, ani ngimaagor tooyaketa tabata lua ngikieny.

³⁴Tolim Nebukadinesa tama, “Ani adaunet a ngikaru alukan-kaarei kangulu, engolia ayong kidiama nadis, katobongok ayong aosou kang. Abu epuruu Akuj na Epol Noi, na idwangit ibore daang, ka akidodiun arimatoi ani eyei ngolo eyari nakajik. Epolokini ngesi jik, erubi apolou keng analesea kadaang.

³⁵Itee ngesi ngitunga daang a akwap atamar eraakasi ngipasiek. Esubi ngesi na esaki aloborei alu a adis, ani alotunga alu eyakasi nakwap, emam ni epedori akitopeg ngesi, kori emam ni ingisi tama, ‘Nyo isubi iyong?’

³⁶“Ani napei kabongokinio ayong aosou kang, katobuakin tani arimatoi, ka aruonu ta akibuseanu a apolou. Kepeyout ayong ngikapolok a arieng kang ka ngikajakaanak. Apon katobuakin apolou kang, ataanyu arimatoi naajokon noi akidwang nakolong sek a ekingaren.

³⁷“Tokona bocha, ayong Nebukadinesa, epuruunit ka akikut ta arima Ekapolon Akuj a adis. Iyookino ibore daang ni esubi ngesi, eriyan, nabo itiditeuni ngesi itwaan daang ni iwoga.”