Read turkana Daniel 5 Bible Online

Daniel 5 - turkana bible

Daniel 5

¹Akolongit apei abu ekapolon Belichasa kipeyou abunget apei a ngitunga alu araakasi ngikajakaanak nakimuj, nabo tamata ka ngesi emuna aapei.

²Ani eringa emaase, todung ekapolon Belichasa atamar tolemunae ngiboro lua egolit ka lukwangae, lukolong alemuni ekapolon Nebukadinesa lo arai apakeng alokai a Akuj alo Yerusalem. Tolim Belichasa atamar yaunae ngiboro ngulu tamaasa ngesi ka ngikapolok a arieng keng, ka ngaberu keng, ta ngapesur keng a ngabwes.

³Apon ngiboro lua egolit, ka akwangat ngulu yaunae atipei alokai a Akuj alo Yerusalem. Tamaasa ekapolon, ka ngikapolok a arieng keng, ka ngaberu keng, ta ngapesur keng a ngabwes.

⁴Tamata emuna ikusete ngakujo kech na asubunio alogolit, ka akwangat, ka ngasua nanyangayek, ka nakirionok, ka ngakito ta ngamoru.

⁵Nipei bore ngini, tatakanu akan a itwaan alosiep a akai igiri ngakiro losiep a akai a ekapolon, ni enwakunit akicha a ngakinwaket lokojokon. Kingolik ekapolon akan ngina igiri.

⁶Abu amuny a akwaan a ekapolon topuseania, toriangakin ngesi tolilimiyosi nginerin a akwaan keng sodi tamaranikis ngakungin.

⁷Kikalou ekapolon irema, tanyarau ngikekeriak, ka ngimurok ta ngikesomak ngikanyer. Ani epote, tolimok ekapolon ngikoosok lua Babilon ngulu tama, “Itwaan cha daang ni isomakini ngagiran nugu kesisak ayong eger kech, itanapio ngiworui lupusiek-arengak, toinikinae irikot a egolit lomosiring, ani erumor kitiliworoe ekapolon lo a nguuni anapolou.”

⁸Apon ngikoosok a ekapolon daang tanyaraunae, nakaneni tokuruwo kesi akisomare ngagiran nguna kori akisisakin ekapolon eger kech.

⁹Kotere ni abulitor, abu amuny a ekapolon Belichasa topuseania noi, kialolongo ngikapolok a arieng keng.

¹⁰Ani iirari itiokeng a Belichasa echale a ekapolon ka ngikapolok a arieng keng, toloma kai na emujere tama, “Ayoro ekapolon, agasi atamar toyei! Wara ngatameta kon nyikichan iyong, nabo wara akwaan nyeepuseania.

¹¹Eyei itwaan napolou kon ni eyei etau a ngakujo ana italeuno. Ngirwa lu araakar apakon ekapolon, arai itwaan ngini nikebe a akou toos, tochwaana, loger a ngakujo. Apakon Nebukadinesa, aseunit ngesi topolok ngikekeriak, ka ngimurok, ka ngikapilak ta ngikesomak ngikanyer.

¹²Enyaritae itwaan ngini Daniel. Nakaneni elochit apakon ekiro keng anyarit Belitechasa. Erai ngesi itwaan niajokon a etau, eos, tochwaana anakitenun ngakiro na irujao, ka akisisaun ngakitadapet, ta angichun ngakiro nakaagongok. Kimiek ngesi tanyaraunae kedodik iyong eger a ngagiran kanguna.”

¹³Esaa ngolo, torikunoe Daniel ngaren ekapolon, kingit ekapolon ngesi tama, “Iyong kinyaritae Daniel, lo irai epei a ngirikon alu kolong arikuni apakang alo Yuda a?

¹⁴Eira ayong atamar eyei etau a ngakujo ana italeuno tooma kon, nabo ebeyo ekebe iyong akou, toos, tarai lo ichwaana noi.

¹⁵Ngikoosok ka ngimurok na arikunere nege esakio kisomata ka akisisaun eger a ngagiran kanu, apot tokuruwo.

¹⁶Abu eira atamar ipedori iyong akisisaun eger a ngakiro ka angichun ngakiro nakaagongok. Ani kisoma iyong ngagiran nugu tolim eger kech, kitanapio iyong ngiworui lupusiek-arengak a ekapolon, kitanap erikot a egolit alomosiring, nabo iliwor ekapolon lo a nguuni anapolou kana.”

¹⁷Tatachak Daniel Balichasa tama, “Toting ngakon inakinet kori kipoto ebachit kon nak itwaan iche. Tani ikoni neni ekapolon, kesomakini ayong iyong ngagiran nguna, ketenik eger kech.

¹⁸Ee ekapolon, Akuj na Epol Noi ngesi kolong etaanyuni apakon Nebukadinesa apolou, ka ekipur, ta akibuseanu.

¹⁹Kotere apolou na etaanyunio ngesi, apot ngitela daang, ka ngibukui ta ngitunga a ngangajepa a nagelagelae toema tamaranikis. Apedori Nebukadinesa akiar itwaan daang ni esaki ka akimiekin itwaan daang ni esaki akimiekin. Ani itwaan ni esaki akikeun, kitiliwo ngini ekapolon. Ani itwaan ni esaki ngesi atiyaun anapolou, totiyau.

²⁰Nakaneni ani elomakini ngesi ekinis, kichananer toliwor iwoga, apon ngesi tolemarae alokicholong keng a apolou, ka ajakaanut keng.

²¹Kitwarakinae ngesi alotunga, kisikwaanae aosou keng ka na etiengit, kiruko ka ngisikiria a moding, toliwor edak nginyia loger a emong. Kitapapala ngakop a adis akwaan keng, tanang eyenuni atamar Akuj na Epol Noi ngesi epolokinit ngapolosio a ngitunga, nakaneni eseuni ngesi itwaan ni esaki ngesi, nak apolou.

²²Ani iyong Belichasa, irai lokookeng, ibu nyiitiditeun tarai cha iyeni ngakiro nguna daang.

²³Ibu iyong kitopen Ekapolon a adis, ani iyaunea ngiboro a akai a Akuj tamasea emuna, iyong aapei ka ngikapolok a arieng kon, ka ngaberu kon ta ngapesur kon a ngabwes. Nabo kipuruut esi ngakujo na esubunitae anakwangae, ka egolit, ka ngasua nanyangayek, ka nakirionok, ka ngakito ta ngamoru. Ngakujo na nyiteete, kori nyepupete, kori nyeyenete ibore. Ani Akuj na erai nakan keng eyei akianget kon, nabo nikeng eyakasi ngirotin kon daang, towou iyong akidodikin arimatoi!

²⁴Ngakiro nguna ameunea Akuj akan akigir ngagiran nguna.

²⁵“Ngagiran na egirio kesi nugu: MENE, MENE, TEKEL ka PERES.

²⁶Eger a ngakiro kanguna ngesi logo: MENE ngesi atamar emarun. Emaru Akuj ngirwa a apolou kon etasalu.

²⁷TEKEL ngesi atamar apotis. Kitem iyong anaratilio ayen atamar emam iyong apotis.

²⁸ PERES ngesi atamar akitiak. Atiakakin apolou kon Ngiamed ka Ngipersia.”

²⁹Anipei kaneni, todung ekapolon Belichasa atamar kitanapae Daniel ngiworui lupusiek-arengak a ekapolon ka erikot a egolit alomosiring. Tolimunoe atamar eliwor Daniel ekapolon lo a nguuni anapolou.

³⁰Nakwaare a akolongit kangina, taarae ekapolon a Babilonia lo anyaritae Belichasa.

³¹Abu ekapolon Dario lo arai Emedit tolema apolou, eraakasi ngikaru keng ngitomwon-kapei ka ngiarei.