Read turkana Daniel 6 Bible Online

Daniel 6 - turkana bible

Daniel 6

¹Totiaku ekapolon Dario atamar aseuni ngikapolok a ngiwaitin a akwap amiat apei ka ngitomwon-arei topolokis akwap keng.

²Toseu nabo ngikapolok ngiche nguuni, arai Daniel epei aluuni kangulu. Asakitae luuni ngulu topolokis ngikapolok a ngiwaitin a akwap nyeetoniarea ibore idio anakwap.

³Apon toyenae atipei atamar ejok Daniel noi akidwang ngikapolok luche daang, kainyo ayei etau loajokon nikeng. Tasak ekapolon aseun ngesi topolok akwap daang.

⁴Ngikapolok luche ngulu, apot tasaka akiroit na itingakinete Daniel kitongolopeta kotere ngakiro a apolou, nakaneni nyeanyuna kesi ni itoroneta ngesi kori ibore idio ni esechit ngesi, kainyo arai Daniel itwaan ni emunoi. Amam ibore asechit ngesi nabo amam tani ni echwangakinit.

⁵Tolimut ngitunga ngulu tamasi, “Emam ibore kipedori ngoni akitingakin Daniel etongolopeta, ngaye kerai ngakiro a etal a Akuj keng.”

⁶Apot kesi toloto aanyun ekapolon tamasi, “Ekapolon Dario, kigasi atamar toyei jik!

⁷Sua daang lu kipolokinit akwap kon, lu kirai ngikaweikinak, ka ngikapolok a ngiwaitin a akwap, ka lu etupito ngulu ta ngikapolok luche, kichamakin atamar todung iyong akiroit, ani erumor kingolik atamar iwapitae lokojokon. Todung atamar a ngirwa a ngitomwon-uni, emam itwaan ilipa ibore anakuj a adio kori anitwaan a idio, mati iyong ekapolon lo kirimae. Itwaan cha daang ni nyiwapi etal logo, echakakinio nadui a ngingatunyo.

⁸Tokona bocha ekapolon Dario, todung akiroit ngina taramak emachar kon nyiilochere, itemem ka etal a Ngiamed ka Ngipersia lo nyilocheeneo.”

⁹Kongina bocha, abu ekapolon Dario taramak emachar keng nakiroit na adungunit ngina.

¹⁰Na ayenea Daniel atamar aramakin emachar nakiroit na adungunitoe ngina, abu tolot kai keng. Kidiama akai keng, ayei amaniyat na akienyikinito ngipukei keng Yerusalem. Toriedikeene Daniel kaneni kilip Akuj ngakilipet ngauni akolongit apei, ebuakinit alakara. Kilipeene ngesi loger lopalem sek ilipeenea, engaarit ngipukei a amaniyat keng.

¹¹Apot ngitunga ngulu tochunun torukaut Daniel ilipit imaimai Akuj keng.

¹²Sodi pot kesi nia ekapolon kirirata Daniel kotere ngakiro a etal kangolo tamasi, “Ayoro ekapolon Dario, ikwa nyiramakinit iyong emachar atamar a ngirwa a ngitomwon-uni, emam itwaan tani ipei ni echamunio ilipit ibore iche, akuj ache, kori itwaan iche mati iyong bon ekapolon lo kirimae a? Ikwa pealimunitoe atamar itwaan ni nyiwapi etal logo echakakinio nadui a ngingatunyo a?” Kiik ekapolon tama, “Ee, abeyo neni, itemem ka etal a Ngiamed ka Ngipersia lo nyilocheeneo.”

¹³Tolimokis kesi ekapolon tamasi, “Daniel lo erai epei a ngirikon a akwap a Yuda, nyikirima iyong ekapolon, kori nyiwapit akiroit na idunguni iyong taramak emachar kon. Ilipeene ngesi ngakilipet ngauni akolongit apei.”

¹⁴Ani iirari ekapolon ngakiro nguna, kialolong noi. Tasak erot lo eyuunea Daniel. Kirichakin akisak erot ngolo tanang akolong edooyori.

¹⁵Tochunun ngitunga ngulu nia ekapolon Dario tolimokis tamasi, “Ayoro ekapolon, toyen atamar emam etal kori akiroit na edungunio cha daang a Ngiamed ka Ngipersia na epedorio akiloch na edungunio ekapolon.”

¹⁶Abu ekapolon Dario todung akiroit, torikunoe Daniel tachakakinae nadui a ngingatunyo. Tolimok ekapolon Daniel tama, “Akuj kon na isubi iyong etich keng jiik, kimiek kitoyuu.”

¹⁷Apon yaunae amoru kiwaakinae nakituk a adui kangina. Taramak ekapolon emachar keng a ilope, ka lo a ngikapolok a arieng keng, sodi nyeebunio itwaan iche tasak ayuun Daniel.

¹⁸Ani erumor tobongo ekapolon kai keng kikoler akwaar kiiya engerit akimuj. Emam ibore iche nikitalakaret ngesi apon yaunae nikeng.

¹⁹Ani echili nanyang, tonyou ekapolon Dario tolot nadui a ngingatunyo.

²⁰Ani enanguni diyete adui, kikalou ngesi tanyara Daniel tama, “Daniel, ekasuban etich a Akuj ana eyari! Abu Akuj na isubi iyong etich keng jiik kitoyuu iyong alongatunyo a?”

²¹Tatachak Daniel ngesi tama, “Agasi atamar toyei iyong lokirimae jik!

²²Ameuni Akuj kang emalaikat togol ngakituk a ngingatunyo nyakawan ayong. Asubi ngesi kongina kainyo ayeni atamar emam ibore asechit ayong alongaren keng, nabo emam tani ibore kon echwangakinit ayong, ekapolon lo kirimae.”

²³Abu ekapolon talakar noi. Todung ngesi atamar kiriunae Daniel anadui. Kiriunae emam ibore kewan, kainyo egieno ngesi Akuj keng.

²⁴Todung ekapolon atamar kirumunae lusek eriraate Daniel, tachakakinae kesi ka ngaberu kech ta ngide kech naduon a ngingatunyo. Ani eringa kesi tani nyedo kwap adui, apot ngingatunyo kikamut kesi torwakinos tobilibilaasi ngakoyo kech.

²⁵Abu ekapolon Dario kigir abarua, kigirak ngitela daang, ka ngibukui ta ngitunga a ngangajepa anagelagelae anakwap kadaang, ebala, “Maata!

²⁶Adungunit ayong atamar ngitunga daang anapolou kang, echamit emaranikinete tokera Akuj a Daniel. Erai ngesi Akuj na eyari, na erubi jik. Nyinyasunio apolou keng. Emam apolou keng esal.

²⁷Eyuuni ngesi ka alakun, esubi ngakitoodikinet nakailiilok ka nakatalarak anadis ka akwap. Ayuuni ngesi Daniel nyear ngingatunyo.”

²⁸Sodi kisikokin Daniel ngirwa lua apolou a Dario ka ekapolon Korech lo a Persia.