Read turkana Daniel 7 Bible Online

Daniel 7 - turkana bible

Daniel 7

¹Ekaru lo ekingaren a ekapolon Belichasa alo a Babilon, kiruja Daniel, kingolik ngakisingolikinet ejotoe. Kigir ngesi ngakiro na erujae, eraakasi nugu eger a ngakiro kadaang ana erujae ngesi.

²Anakisingolikinet ana engolikini ayong nakwaare, abu ataanyunga ngikuwamea nguomwon aponito alowaitin aluomwon a adis, itukulaunito anam naapolon.

³Tonyout ngitieng luomwon luapolok ananam, agelaana epei kech daang peekwaan ka loche.

⁴ Ekwaan lo ekingaren ka engatuny, toyakas ngabeben na ekote na egole. Ani eringa ayong etee, torutoroe ngabeben keng, kikeunae ngesi towo a ngakejen a ngaarei loger a itwaan. Ani erumor nakinae aosou na itwaan.

⁵Ekoni etiengit lo a ngiarei ebu loliwo lo awei a ngamuroi. Ekeuna alowae a epei. Ayakasi ngamaran ngauni nakituk keng, akonyit ngesi a ngikel. Tolimokinae ngesi kona, “Tonyou, tanyam akiring nakaalan.”

⁶ Arumoret kanguna, ani eringa ayong etee, ataanyunga etiengit eche. Ekoni etiengit ngolo eris, ayakasi ngabeben ngoomwon na ekote na ikeny kaku keng, toyakasi ngakies ngoomwon. Ainakinitae ngesi apolou.

⁷Arumoret kanguna, anakisingolikinet kang ana akwaar, ataanyunga ayong etiengit lo a nguomwon lo kitubuli tarai lokaagongon ationon. Ayakasi ngesi ngikel lusua apolok, lu iriadarea ibore nicha eari tanyam, ani erumor kipudaa. Agelaana ngesi alotieng aluche uni ani ayakatar ngaamwar ngatomon.

⁸ Ani eringa eseme ngaamwar nguna, ataanyunga iimwara iche erupunit anaamwar anache tomon. Arupunit iimwara ngini anisek adotunere ngaamwar nache uni ka ngatoroma kech. Ayakasi iimwara ngini ngakonyen na ikote na itwaan, ka akituk na eruoro ngakiro na ngiwog.

⁹ Ani eringa ayong akienyikinit, kiwaakinae ngikicholongo a apolou neni, tolem lo eyari napei kanuan epei a ngikicholongo kangulu kiboikinor. Akwangak ngiworui keng kea, ani ngitim a akou keng akwaikwayete loger a ngajul a ngamesekin. Ekicholong keng a apolou, arai asarae a akim, araakasi ngakejen a ekicholong akim na enoki.

¹⁰ Toleleu angolol a akim alokicholong kangolo. Tosuba ngabunge nakaalak etich keng, towaa ngamilionio alongaren keng. Kiboikinos ngikatubok ngakiro, apon tangaarae ngakitabea.

¹¹Abu ayong atokienyia kotere echale a ngakiro anaapolok ewojor iimwara niichi kiwoga. Ani eringa akienyiarit, taarae etiengit lo a nguomwon, tachakakinae akwaan keng nasarae a akim sodi kinyasunae.

¹²Todemarae ngitieng luche apolou kech, ani kesi ngikulepek, kimiekinae mono eyarete.

¹³ Anakisingolikinet ana akwaar, ataanyunga lo ekoni itwaan ebunit nikang iriamito ngidowon. Tolot ngesi nia alo eyari napei kanuan, torikunoe ngaren keng.

¹⁴Nakinae ngesi apolou ka akibuseanu ta agogongu, sodi ngitela, ka ngibukui, ta ngitunga a ngangajepa anagelagelae, tosuba etich keng. Erai apolou keng akajik, nyesaluni. Nyinyasunio apolou keng.

¹⁵Ani eliwor ayong Daniel, abu etau kang toriangakin nabo kechan ayong ngakiro a ngakisingolikinet.

¹⁶Ataapia ayong ni ayei epei alu awaasi alongaren Akuj, engit eger a ngakiro kanguna kadaang. Abu ngesi katolimok ayong eger a ngakiro kanguna.

¹⁷Tama, “Ngitieng luapolok omwon lugu, eraakasi ngikapolok nguomwon epote anakwap.

¹⁸ Nakaneni erai ngitunga a Akuj ana Epol Noi, einakinio apolou. Epolokinete kesi apolou ngina nakajik.”

¹⁹Atasak ayong akiyen lokojokon dir eger a etiengit alo a nguomwon, alo agelaana noi alotieng aluche. Arai ngesi lo kitubuli, lo iriadari ibore ni eari tanyam. Araakasi ngikel keng asuat nakirion, taraakas ngimaagor asuat nanyang. Ngikel lukeng ngulu, erianakinea ngesi ibore nia eari, ani nipiya kipudaa.

²⁰ Asaki ayong nabo akiyen eger a ngaamwar anatomon ayakasi nakou keng, ka eger a iimwara aniichi ani arai na asakea arupun, todotunos nache nauni. Ayakasi iimwara ngini ngakonyen ka akituk na ewogar. Arai ngesi na kitubuli noi akidwang nache daang.

²¹Ani eringa ayong akienyikinit, kitijik iimwara niichi ngitunga a Akuj kidwang.

²² Nakaneni bu ngolo eyari napei kanuan totubok ngitunga a Akuj ana Epol Noi ngakiro. Abu tanang ngirwa lu aanyuneta ngitunga a Akuj apolou.

²³Kesisak ngesi ayong kona, “Etiengit lo a nguomwon, erai apolou na ngoomwon emini nakwap. Egelaaner ngesi anapolosio anache kadaang. Irikari akwap daang, kipudaa, ka abilibilaar.

²⁴ Ani eliwor ngaamwar natomon, alotooma apolou naga, epote ngikapolok ngitomon. Ani erumor totupuu kesi eche, lo nyikwaan ka lukolong engarenete, kidwang ngesi ngikapolok ngulu.

²⁵Imenyi ngesi Akuj na Epol Noi, ka akituburun ngitunga keng. Tasak akiloch ngirwa a ngisukukui, ka ngitalio a Akuj, topolok ngitunga a Akuj, a ngikaru a nguuni ka ngilapio ngikan-kapei.

²⁶Nakaneni iriamiriamio nitubet ngakiro, todemarae ngesi apolou keng, kikisarae ka akinyasun jik.

²⁷ Agogongu ka apolou ta akibuseanu a ngapolosio kadaang anakwap, einakinio ngitunga a Akuj ana Epol Noi. Erubi apolou kech jik, toliwor ekapolon daang esubi etich ka akiwap ngakiro kech.”

²⁸Esal a akiroit kana ngesi logo. Ayong Daniel abu katobul noi atopuseania, nakaneni ewaak ayong ngakiro nguna lotau.