Read turkana Daniel 8 Bible Online

Daniel 8 - turkana bible

Daniel 8

¹Ekaru lo a nguuni lo araakar Belichasa ekapolon, abu ayong Daniel ataanyunga akisingolikinet ache.

²Anakisingolikinet kana, ayei ayong Susa, ere loapolon a akwap a Elam. Awei alokwaas a angolol a Ulai.

³Ani engoliari, ataanyunga emesek ewei alokwaas a angolol. Ayakasi emesek ngolo ngaamwar nakooyak ngaarei, aoi apei noi, nabo arupuni ekisidi anache.

⁴Engolik emesek ngolo igumonor too, ka kwap, ta kuju. Emam etiengit apedori aweikin ngesi kori abuchar anajwonu keng. Toloma emesek ngolo ekinis ka akisub nacha asaki ngesi.

⁵Ani eringa etamanari eger a ngakiro kanguna, bu ekoroe alo too, kibirun peetapit ngalup. Kiding ngakonyen keng ayei aamwara naapolon noi.

⁶Tolot nia emesek alo a ngaamwar anaarei, alosek engolikini ayong ewei alokwaas a angolol. Tonyunyurikin ekoroe emesek kitijik niationon.

⁷ Engolik ayong ekoroe irudar lomesek. Angoikinit ngesi emesek ngolo lokojokon noi, sodi kitijik a ngikilinga keng kadaang tobil ngaamwar a emesek naarei. Tongopik emesek kona eweikini ekoroe. Tadakak ekoroe ngesi kwap kipuda, tongop ikayuunan.

⁸Kinisakin ekoroe ngolo noi. Ani ikileenikini ngesi, tobil aamwara keng naapolon. Toruput anados keng ngaamwar ngoomwon na ilereete, ingoliarito lowaitin luomwon a akwap.

⁹Ani eyei apei a ngaamwar kanguna, torup iimwara iche nidiochichi, kisikokin topoloor ingoliarit kuju, ka kide ta akwap nakebusean.

¹⁰Topoloor aamwara ngina noi tanang najorei a adis, sodi tachaku alokiding kech ngikanyer epewae kwap kipuda.

¹¹Kimakou aamwara ngina noi kiwoganak tani ekarikon a ngajorei ana a adis. Abu totubo ngakipeyos nasek epeyonokinio ekarikon a ngajorei ngolo akolongit daang, ka akinyasun akai a Akuj.

¹²Kotere asechanu, kiwaakinae ngitunga a Akuj nagogongu a aamwara kangina, aapei ka ngakipeyos na inomio akolongit daang. Tachakunae akilipit na iteni kwap. Nyekuruworo ngesi ngakiro na asaki asubakin.

¹³Ani erumor eira ayong ngolo italeuno isuruori loche. Kingit erukitos keng ngesi tama, “Erubakinete ngakiro a akisingolikinet kana ikote nege tanang ori? Ipudao ngasigerea na adis ka akai a Akuj tanang ori?”

¹⁴Eira ayong loche etachuni ebala, “Erubakinete ikote neni peipeyoo ngakipeyos ngabunge ngaarei ka ngamiae ngauni, naka ebong ka na ataparach. Ngirwa ngulu, emam itwaan ipeye ngakipeyos nataparach ka ebong. Ani erumor kitaleunoe akai a Akuj kikok nipalem sek.”

¹⁵Ayong Daniel na engolikinea ngakiro nguna, ani eringa asaki akiyen eger kech, atipei abu ibore ni ekoni itwaan towo alongaren kang.

¹⁶Eira ayong etoil a itwaan enyar anangolol a Ulai ebala, “Gaburiel, kisisak itwaan en eger a akisingolikinet.”

¹⁷Bu Gaburiel towo alo diyete kang. Katobul ayong lokojokon atadakakin kwap. Katolimok ayong Gaburiel tama, “Itwaan, toyen atamar eraakasi ngakiro a akisingolikinet kangina ngaka ngirwa alu a esal.”

¹⁸Ani eringa ngesi kesuruori ayong, erakar ayong alokwap. Nakaneni katorwakin ngesi ayong ketonyou.

¹⁹ Ani erumor katolimok tama, “Topupok, kedodikinit ayong iyong ngakiro na esubakinosi kotere angoit a Akuj. Eraakasi ngakiro a akisingolikinet kangina ngaka ngirwa alu a esal.

²⁰“Emesek lo itee iyong eyakasi ngaamwar ngaarei, eraakasi ngikapolok a Media ka Persia.

²¹Erai ekoroe apolou a Giris. Erai aamwara naapolon eyei kiding ngakonyen keng, ekapolon keng lo ekingaren.

²²Aamwara na abila toruput ngaamwar ngoomwon anados keng, eger keng atamar etiak apolou ngina toliwor ngapolosio ngoomwon. Nakaneni nyegogongerosi ngapolosio nguna loger a apolou ana ekingaren.

²³“Ani eapikini ngapolosio nguna adaun, na eronearor akisech kech noi, emini ekapolon lo ebilakinit esingir, tomodeana.

²⁴Eliwor ngesi lo a agogongu anaationon. Eyauni nginyas luketubulok, nyekuruworete ngesi ngakiro na esubakini daang. Emunyari ngesi ngitunga lu eyenikinitae, ka lua Akuj.

²⁵Kotere amodeanut keng, epetakin engalas wadaang, iwogakin ngesi ilope alotau keng. Emunyari ngesi ngitunga lukaalak peichikichikit sek. Itijikini ngesi ekapolon lo idwangit ngikapolok luche daang, nakaneni emunyario ngesi, meere a agogongu ana erai aka itwaan.

²⁶Ngakiro a akisingolikinet a ngakipeyos ana a ataparach ka naka ebong na tokona kisisakin iyong eger kech, eraakasi ngaka iteni. Nakaneni kidaa, kainyo eraakasi ngamunonoe, nabo etinenikinete ngirwa lukaalak nyesubakina.”

²⁷Ayong Daniel, apot ngakiro katonom atodeakakin a ngirwa a ngikos. Ani erumor atonyou ayong atosub etich a ekapolon. Nakaneni keteriangak ayong akisingolikinet ngina, katokuruwo akiyen eger keng.