Read turkana Osea 1 Bible Online

Osea 1 - turkana bible

Osea 1

¹ Akiroit naga alimokini Ekapolon Akuj Osea, lokookeng a Beeri, ngirwa lu araakatar Usia, ka Yosam, ka Aas ta Esekia ngikapolok a Yuda, tarai Yeroboam lokookeng a Yewach ekapolon a Isirael.

²Kisuruor Ekapolon Akuj Osea na ekingaren tolimok tama, “Kape kuut aberu namalaat, toureta ngide lu iwapete elote keng. Aloger alopei kangolo kangero ngitunga kang ayong, aliworosi ngimalaae.”

³Sodi kuut Osea aberu na anyaritae Gomer, nakookeng a Diblaim. Topoti ngesi kidou idia ni ekingaren.

⁴Tolimok Ekapolon Akuj Osea tama, “Tolimok ekiro be ‘Yesireel’ kainyo aapuu ni eriraa ayong ekapolon a Isirael, kotere ngitunga lukolong aari apaakeng Yeu alo Yesireel. Atubori ayong apolou a Yeu.[1]

⁵ Akolongit ngina, abili ayong akwara a Isirael anadipo a Yesireel.”

⁶Topoti Gomer nabo kidou ikoku nipese. Tolimok Ekapolon Akuj Osea tama, “Tolimok ekiro be ‘Nyeminae’ kainyo nyeringa ayong nabo aminakini Ngisirael, kori nyarimakini kesi jik.

⁷Nakaneni aminakini ngitunga a Yuda. Ayong Ekapolon Akuj na arai Akuj kech ayuuni kesi, meere a ejie a ngimalea a amod, kori a ngakwaaras, kori a ngangolei, kori a ngikameak ngangolei.”

⁸Ani eonikini Gomer ikoku ngini, abu topoti nabo kidou idia.

⁹Tolimok Ekapolon Akuj Osea tama, “Tolimok ekiro be ‘Meere ngitunga kang’ kainyo meere esi ngitunga kang, nabo nyarai ayong Akuj kus.”

¹⁰Elalakearosi Ngisirael totiata asinyen a anam na nyimarun, kori nyitemio. Nikolong abalar Akuj kesi, “Meere esi ngitunga kang,” elimokini tama, “Iraakasi esi ngide a Akuj ana eyari!”

¹¹ Imorikinio ngitunga a Yuda ka lua Isirael wapei, sodi toseut ekarikon kech epei. Ikeunosi kesi anakwap kech tajakaana. Ee robo, epoloor akolongit a Yesireel.