Read turkana Osea 10 Bible Online

Osea 10 - turkana bible

Osea 10

¹Ikote Ngisirael emusabib lo erait. Na iatakinor ajako kech, kiatakin ngikenoi a ngakipeyos dang. Na iatakinor akimuj nakwap, kitojokae ngapirio kech nakilipet dang.

²Eliokoko ngitai kech, kotere ngakiro nguna, kimiekisi kimadasi ibore ni esakete. Ebwangi Ekapolon Akuj ngikenoi a ngakipeyos kech, sodi kinyasu ngapirio kech.

³Etamarete tokona kesi, “Emam sua ekapolon, ani kiwounitor akiker Ekapolon Akuj. Ani bo dang, nyo adikino ekapolon kisubakinea sua?”

⁴Ingamangamasi kesi ngakiro pas, ikongete ngikong ka ngachamunet napasiek. Ngakiro na eriyan, etiliwosi na nyeriyan, aruput loger a edoan alokaaran alomana.

⁵Ngitunga a ere a Samaria emaranikinete kotere itaok ni egolit alo Besel. Ikalounete kesi ka ngimurok lu esubete etich a akuj kangina, ikalounete kotere ekipur keng lo angopia.

⁶Edakario akuj nasubuna ngina Asiria, toliwor ekod a ekapolon aloapolon. Isurumio Isirael ngileech kotere akuj keng nasubuna.

⁷Iwokorio ekapolon kech loger a ikitoe ani ilebolebo anakipi.

⁸ Ngaitae na ilipeenere alo Apen,[9] ni ilipeeneta Ngisirael ngakujo nasubuna, inyasunio. Erupunete ngiikwa ka edoan alokenoi kech a ngakipeyos. Etamarete kesi ngimoru, “Kidae” tamasi ngimukur, “Toukunos nikosi!”

⁹ Ebala Ekapolon Akuj kona, “Etige Isirael, napei alorwa a Gibea, irubakinit iyong jiik isecheene. Kidoli iyong ejie alo Gibea.

¹⁰Etijikini ayong ngikasechak lugu, erira kesi. Imorikin ngibukui kitijikis kesi sodi kirirae kesi kotere ngasechesea kech nakaalak.

¹¹“Ekoni kolong Isirael itaok ni itatamitae ni amina akipudaun ngikinyam. Sodi atoinik ayong akitoe lomosiring keng, etusub ngesi etich loationon. Echili Yuda ngalup, ikusakini Isirael ngalup.

¹² Atama ayong, ‘Tochil ngalup, kitak ateneanut, tolem ageor a amina ana nyedaun. Anang ni kisakunea iyong ayong, Ekapolon Akuj kon abu katobukok ayuuno.’

¹³Nakaneni ibu iyong kitak aronis, tolem ngakiro na nyeriyan, tanyam ageor a alioko kon. “Kona igienor iyong ngaurukukui[10] kon, ka alalau a ngasigerea kon,

¹⁴ebuni ejie lotunga kon. Inyasunio ngawasea kon nakaagongok daang. Ikokini akolongit nakolong enyasunea ekapolon Chalman ere a Besaribel alojie, kiriedarae ngide kata itiokech totoaka.

¹⁵Isirael, nguna kesi esubakinosi anikon kotere naaronok na isubak iyong. Napei cha isiakinea ejie, etoani ekapolon a Isirael.”