Read turkana Osea 11 Bible Online

Osea 11 - turkana bible

Osea 11

¹ Ebala Ekapolon Akuj kona, “Nakolong araakar Isirael ikoku, amina ayong ngesi, epud alo Misiri erai lokookang.[11]

²Nacha anyaraa ayong ngesi, tachadar ngesi anikang. Epeyonokinete ngitunga kang Baal kinomanakis ngakujo nasubuna emitina

³Tarai ayong kolong etatami Isirael akichiakakin. Atadak ayong kesi a ngakan kang,[12] nakaneni nyeyena kesi atamar etangalekini ayong kesi.

⁴Atorik ayong kesi a ngisien ka amina. Atadak ayong kesi atatapak natorobu kang, atokudokin etan kesi.

⁵“Ebongorete kesi nakwap a Misiri, epolokini Asiria kesi, kainyo awout kesi abongun nikang.

⁶Ekulauni akwara alorerea kech, tobwanga ngasua ngidorin kech, tomunya kesi anawasea kech ana edukitoe.

⁷ Atiakut ngitunga kang arear anikang, isikalouni kesi eegos lo iwokito, nakaneni emam itwaan ikeuni anikech.

⁸“Isirael, ekokini ayong kajali iyong ai? Ekokini ayong kaisikini iyong ai? Ekokini ayong kamunyari iyong loger lokolong amunyarea Adma ai? Ekokini ayong kasubea iyong nguna kolong asubea Seboiim ai? Itimete etau kang ngakiro nguna! Etiono amina kamina ayong iyong!

⁹Nyekerirae ayong iyong a angoit kang. Nyamunyari ayong Isirael nabo. Kainyo arai ayong Akuj meere itwaan. Ayong na etaleuno, kirukit ka iyong. Nyabuni ayong nikon amunyar iyong.

¹⁰“Kewapakinete ngitunga kang ayong na erurumakinea ayong loger a engatuny, ani a ngimoe kech. Ikirukiruunosi ngide kang alo too potu nikang.

¹¹Epote kesi alo Misiri ekerete tamaranete loger a ngikieny. Potu alo Asiria loger a ngakurio. Abuuni ayong kesi nawiyei kech. Ayong Ekapolon Akuj alimu nguna.”

¹²Ebala Ekapolon Akuj kona, “Keriam Ngisirael ayong kotere alioko a amodeanut. Eringa ngitunga a Yuda kangerito ayong, nabo nyakamunosi ayong, Akuj na etaleuno.