Read turkana Osea 12 Bible Online

Osea 12 - turkana bible

Osea 12

¹Napei iwalarea tanang ebong, esubete Ngisirael ngakiro napasiek, na ikote akiyok ekuwam. Iasete kesi alioko ka amoitanut. Achamakinosi ka Asiria, kiwoko akimiet nagielara Misiri.”

²Isuburae Ekapolon Akuj ngitunga a Yuda. Irirae ngesi Isirael itemem ka elote keng. Etachakini ngakiro na esubete kesi.

³ Apaakech lobe Yakobo elekasi ka lokaatokeng Esau anakook a itiokech. Ani epoloe kileka ka Akuj.

⁴Abu ngesi kisilek emalaikat kidwang, kigor ngesi esaki apiaro a emalaikat. Kiriamun ngesi ka Akuj alo Besel, kisuruor Akuj ngesi[13] kaina.

⁵Ekapolon Akuj Namerikanyer, enyaritae ekiro keng Ekapolon Akuj Namerikanyer.

⁶Tokona bocha esi, tobongutu kingarakisi Akuj kus. Kirichakisi amina ka ngakiro na eriyan. Kidara Akuj kus inaikinito.

⁷Ebala Ekapolon Akuj kona, “Eraakasi Ngisirael ngimuchurus lu nyemunoi, eminasi akichiekiar luche a ngakitemiet ana alioko.

⁸Ebalasi kesi, ‘Tarai kibarit sua, kibaruni sua ngikulepek ebari kosi.’ Nakaneni ebari ngolo daang, nyepedori akitach akisech kech.

⁹ Ayong Ekapolon Akuj na arai Akuj kus, nakolong kepuduni esi alo Misiri, ketolomi esi loeman nabo, loger lokolong ilomitotor anariet, ngirwa lu abunio ayong nikus.

¹⁰“Esuruori kolong ayong ngikadwarak, esuruor a ngakitadapet, etalala ngakisingolikinet kech, esitoru ngakisingolikinet lokadwarak.

¹¹Ani keyei akisech Gilead, iteni etuborio. Ani keringa ngimongin ipeyeo alo Giligal, ngikenoi kech lukipeyoet, ikokinete ngamoru na etukokina naroatin.”

¹² Adokini kolong apaakosi Yakobo tolot nakwap a Mesopotamia. Tosub etich kaina taanyunea aberu. Kiyok ngamesekin kotere aberu.

¹³Ameari Ekapolon Akuj ekadwaran toyuu Ngisirael alo Misiri. Tochoikin kesi kotere emalaikat.

¹⁴Etongoa Ngisirael Ekapolon Akuj noi, ejoikinit kesi eario kotere akisech kech. Irirae Ekapolon Akuj kesi kotere ngileech lu ainut ngesi.