Read turkana Osea 13 Bible Online

Osea 13 - turkana bible

Osea 13

¹Arai kolong na iruorikinea Epiraim, tamaranikis ngitunga. Epuroi ngesi alo Isirael. Nakaneni tosecha ngitunga kilipa Baal, kotere ngakiro nguna, etoakete.

²Arubakis kesi esechete, esubete ngakisikwaanet na itokeianario, ngakujo na esubunitae a ekunonoonu, tosubunae anakwangae. Kichieunae daang a ekunonoonu a ngitunga. Ani erumor tamasi kesi, “Kipeyonokisi ngakujo nugu! Tominakisi ngitak lugu!”

³Kotere ngakiro nguna, ikokinete kesi eloch lo a ataparach, kori ikokinete ngakop na engopiarete nataparach. Ikokinete ekuwam lo ekutario anapieset, kori apuru na itoruni lopuke.

⁴Ebala Ekapolon Akuj kona, “Arai ayong Ekapolon Akuj na arai Akuj kus, nakolong kepuduni esi alo Misiri. Nyiyenete esi Akuj ache pearai ayong. Emam esi ekayuunan eche pearai ayong.

⁵ Ayong kolong kayeni esi anariet, anakwap ana akamu.

⁶Nakaneni ani inyakunete esi, kimwoko tajakaana, ipot esi kinisakinos sodi tojongoto akitamunit ayong.

⁷Kotere nguna, ekokini ayong anikus engatuny, katoperu alorot loger a eris.

⁸Katikokin ayong esi loger a ebu, alo edemaritae ngitak keng. Angarakakiari ayong ngatorobwo kus. Kanyami ayong esi loger a engatuny, katonyilinyili loger a ebu.

⁹ “Ee Ngisirael, kamunyari ayong esi! Ngae epedori akingarakin esi?[14]

¹⁰Aliwae tokona eyei ekapolon kus, bu kitoyuu esi? Aliwae eya ngikarikok kus daang aponere aikin esi? Ngulu kolong ibalasi esi, ‘Nakinae sua ekapolon, nakinae sua ngikarikok.’

¹¹ Kalungak ayong esi ngikapolok, atolema kesi a anyunyura kang.

¹²“Ingadaaritae akisech a Isirael, imarunitae aronis keng.

¹³Ikoni ngesi ikoku ni nyeos ni ewouni apudun anakook a itiokeng.

¹⁴ Alemikini ayong kesi ariwo nyeelomareta lokatoak a? Ayuuni ayong kesi anakitu a? Ee akitu, yau[15] ngakiro kon naaronok! Ee akwap a ngikatoak, yau nginyas kon! Emam ayong ibore eringa kesieni.

¹⁵Tani kekilikil Isirael loger a atiriwae, ameuni ayong ekuwam lo a akide, lo ekutuni anariet, kitoon echwaa a Isirael, kijiwa ngileleae keng, tolema ibore keng daang niajokon.

¹⁶Itiri Samaria eriras keng, kainyo kangeri ngesi ayong Akuj keng. Eario ngitunga keng alojie. Etubitubiyo ngide kech luuchik, topuonoroe ngaberu kech na epotiyete.”