Read turkana Osea 14 Bible Online

Osea 14 - turkana bible

Osea 14

¹Wae, Ngisirael, tobongutu nia Ekapolon Akuj ana erai Akuj kus. Kidaka esi akisech kus.

²Tobongutu nia Ekapolon Akuj, tolimokis ngesi ngakiro nugu, “Tolema akisech kosi daang, tacham akilip kosi. Kipuro sua iyong loger lokolong kilimunio.

³Nyepedori Asiria ayuun sua, nabo nyikiyuunete sua ngangolei. Nyeringa sua kitamari ngiborei lu kisubi sua ‘Eraakasi lugu ngakujo kosi.’ Nikon eanyuneta ngikokiok ngisien.”

⁴Ebala Ekapolon Akuj kona, “Etangalekini akiitiit a ngitunga kang, aminakini ayong kesi lokojokon, kainyo adaun angoit kang anikech.

⁵Ekokini ayong ani a Ngisirael ngakop, ekilikiluunete kesi loger a aturot. Ilijarosi ngaten kech nalup loger a ngikito a Babilon.

⁶Eliarito ngaten, ibusekearosi loger a ngikito a akimiet, tokukunyuut loger a ngichekereng a Lebanon.

⁷Ebongunete kesi pena lotorube kang. Ekilikiluunete loger a amana, taraa ageor loger a emusabib. Ekukunyuunete loger a emuna a Lebanon.

⁸Etige Isirael, nyo kon[16] ngakujo nasubuna? Ayong katachanakini esi ngakiro ka akitere esi. Ekoni ayong edome lokaliban, nikang itorunit ageor kus. Nikang ebunitor apiaro kus daang.”

⁹Itwaan nicha eos daang, eyenuni ngakiro nugu. Itwaan daang nicha echwaana, toyen ngakiro nugu. Etenooko ngirotin a Ekapolon Akuj, iwapito lu etenooko kesi, toyareta. Nakaneni ilegeunete lukasechak tadakasi, ani nyemisitotor.