Read turkana Osea 2 Bible Online

Osea 2 - turkana bible

Osea 2

¹Tanyarata talokaatokus, “Ngitunga kang” ani tanakaatokus tanyarata “Emina Ekapolon Akuj.”

²Kimaimaa itiokus, kimaimaa kainyo nyerai ngesi aberu kang, nyarai ayong lokile keng. Kimaimaa sodi tapalik emalaanu tapalik elomit keng.

³Ani kemam abutori ngiboro keng kidong emuner loger lokolong edounere. Etooni ayong ngesi loger a ariet, esikwaanik ka akwap na iwari niamonan, etaari ngesi akure.

⁴Nyekesieniyete tani ngide keng, kainyo auriunio alomalaanu.

⁵Kainyo erai itiokech amalaat, ee robo, ngina kolong apotiuni kesi esubi ngileech. Alimuni ngesi alope tama, “Alosi nia ngiminan kang, kesi kainanakinete akimuj ka ngakipi, ka ngajul a ngamesekin, ka ngiworui, ka akimiet ta emuna.”

⁶Kotere nguna, eriwokini ayong ngiikwa lorot keng. Adukokini awas eratakinea ngesi, sodi nyeanyunea ni itori.

⁷Iwapakini ngesi ngiminan keng, nakaneni nyedoli. Esakari ngesi kesi nakaneni nyeanyuni. Ani erumor elimuni tama, “Abongori lokile lokolong kang a ekingaren. Kainyo ajok kolong ayong kaina akidwang tokona.”

⁸Peayeni ngesi atamar ayong kolong ainanakini ngesi ngikinyam, ka emuna, ka akimiet, ka ngakwangae daang ta egolit lo elipitor ngesi Baal.

⁹Tokona bocha, ngirwa lua ngalemet, abuari ayong ngikinyam kang, ka emuna, ta ngajul a ngamesekin, ka ngiworui lu adikino erapete amunerer keng.

¹⁰Abutori ayong ngiboro keng, emiek emuner anakonyen a ngiminan keng. Emam itwaan eyuuni ngesi anakan kang.

¹¹Atubori ayong ngisukukui keng lua ekaru, ka lua ngilapio ta lua Sabato. Atubori ngikiriamisea lua agata keng daang.

¹²Enyasuni ngimusabib keng ka ngimeyana lukolong abalar ngesi, “Ibore en katachitotor ngiminan kang.” Etiliwori ngesi amoni kirikasi ngitieng a moding.

¹³Erirae ayong ngesi kotere Baal, kainyo enomanakini ngesi Baal emitina, sodi tanap ekababaat ka asir, kiwapak ngiminan keng katachaka ayong. Ayong Ekapolon Akuj alimu nguna

¹⁴Kingolik a, ayaari ayong ngesi nariet, sodi emaima kaina, esuruor ngakiro a aminatoi.

¹⁵ Abuakini ayong ngesi ngamusabib kaina sodi etiliwo adipo a Ngichan ekidor a akigieno. Kesuruori ngesi ayong kaina loger lokolong kesuruorea esorokana, ngirwa lu apudunio alo Misiri.

¹⁶Akolongit ngina, kanyarae ngesi ayong “Lokile kang” nyeringa nabo kanyarae “Baal kang.”

¹⁷Atubori ayong ekiro a Baal anakituk keng jik.

¹⁸Akolongit ngina, kichamakin ayong ka ngitieng a moding, ka ngikieny lu eporito ta ngiborei lu eliato analup. Abili ayong akau ka akwara atotubo ejie anakwap. Kemiek esi ibooyete a ekisil akaalimon.

¹⁹Isirael, kaneri ayong iyong jik. Kaneri a ateneanut ka ngakiro na eriyan, ka amina na nyedaun ta ngisien.

²⁰Kaneri ayong iyong a amuno, kitoyen atamar arai ayong Ekapolon Akuj.

²¹Akolongit ngina, eirari ayong ngakilipasinei a ngitunga ka na a Ngisirael. Elakakini adis ngakipi todoto nalup.

²²Ekoniunete ngalup ngalemet, ka emuna ka akimiet.

²³ Ewaakini ayong kesi nakwap, tarata lu isikokina. Aminakini lukolong abeyo, “Nyeminae.” Ani lukolong abeyo “Meere ngitunga kang” atamari, “Iraakasi esi ngitunga kang” sodi tamasi kesi, “Irai iyong Akuj kosi.”