Read turkana Osea 4 Bible Online

Osea 4 - turkana bible

Osea 4

¹Ee Ngisirael, kiirasi akiroit a Ekapolon Akuj. Isuburae Ekapolon Akuj ngitunga lu elomito nakwap ebala, “Emam amuno ka amina anakwap. Nyeyenio Akuj anakwap.

²Eyei akikong ka akingalare, ka akiar, ka akoko ta elomit. Eatakin asechanu, idoko aaranu naaranu.

³Igoro robo akwap esutonokini, emunyarosi daang lu elomito nakwap ka ngitieng a moding, ka ngikieny lu eporito, tani ngikolea a anam.”

⁴Ebala Ekapolon Akuj kona, “Tochoite iyong itwaan isuburae ngitunga, wara nyiikilak ngitunga, kainyo esi ngimurok ketongolopi.[2]

⁵Akwaar ka apaaran itwapitwapete esi aapei ka ngikadwarak kus. Amunyari ayong Isirael na erai itiokus.

⁶Amunyar ngitunga kang ani nyekayeneta ayong. Ani aloger ingerioto esi akiyen ayong, kanger ayong esi nyiiliworosi ngimurok kang. Ani aloger kimuriakinea esi etal a Akuj kus, kemuriakinete ayong dang ngide kus.

⁷“Nacha eatakinotor ngimurok, kiatakin akisech kech dang anikang. Elochi ayong ekipur kech toliwor ngileech.

⁸Abarakis kesi nakisech a ngitunga kang. Esakete kesi ngitunga tosecha noi.

⁹Kotere nguna, eanyunete ngimurok eriras lopei eanyunete ngitunga. Erirae ayong kesi kotere elote kech, etatach naaronok nakolong asubete.

¹⁰Imujete kesi nakaneni nyimwokete. Esubete emalaanu nakaneni nyeureasi talalaketa. Kainyo aisikis kesi Ekapolon Akuj, ajoiki kesi emalaanu.”

¹¹Ebala Ekapolon Akuj, “Emuna longorot ka lokitetet ngesi adema ngitunga kang aosou!

¹²Ingisete ngitunga kang akitoe ngakiro, aburo elimokini kesi ngakiro na esakete. Etooliyo emalaanu kesi, aisikis Akuj kech aliworosi ngimalaae.

¹³Ipeyoote kesi anaitae a ngimoru, kipeyoto alokidiama ngimukur, ka kwap ngichokei luapolok lu eliarito ngaten kainyo ejok ngitorubei kech! “Kotere ngakiro nguna, arata tanakookus ngamalaae, arata ngaterak kus ngakalomak.

¹⁴Tarai nyerirae ayong tanakookus kotere emalaanu kech, kori nyerirae ngaterak kus kotere elomit kech, kainyo esi ngikiliok ngikulepek ipudonorete ngamalaae na eyakasi ni ilipitere.[3] Nabo ipeyoote ka kesi ngakipeyos a ngakujo anagelayek. Emunyario ngitunga lu emam aosou.

¹⁵“Ee Isirael, tani bo kilomarit lomalaanu wara Yuda nyeeloma nakisech ngina. Tochoite ilomari akilip alo Giligal, kori nyiilot Betapen,[4] kori nyiikong kaina alokiro a Ekapolon Akuj ana eyari.

¹⁶Ichanaka Ngisirael loger a ngisikiria alukaturonok. Apedori tokona ayong akitan kesi loger a ngimesekin aluuchik anachokor a?

¹⁷Emorikinosi Ngisirael ka ngakujo nasubuna. Kimiekisi kesi make.

¹⁸Aliworosi ajore a ngikelewak, talakaros alomalaanu, tojoikis ngileech akidwang arimatoi.

¹⁹Iwokorio kesi tosub ekutarit ekuwam, sodi kiruma ngileech kotere ngakipeyos kech na ipeyonokineta ngakujo nagelayek.