Read turkana Osea 5 Bible Online

Osea 5 - turkana bible

Osea 5

¹Esi ngimurok, kiirasi nugu! Ngisirael, topupokisi! Esi lua awi a ekapolon, topupokisi! Totubo ngakiro eriyan. Iliworosi esi eloit alo Misipa, epuute lo epetakinitae moru a Tabor.

²Iliworosi akipany nakooyen alore a Aawoi, nakaneni kerirae ayong esi daang.

³Ayeni ayong Isirael, nyedukit Isirael anikang. Aliwor ngesi amalaat, nyitemokino ngitunga keng kelipete ayong.”

⁴Ngakiro naaronok esubete ngitunga, etengero kesi abongun nia Akuj kech. Atingia emalaanu kesi, nyeyenete kesi Ekapolon Akuj.

⁵Ekinis a Ngisirael alimo kesi. Ilegeuniyete ngisech kech kesi tadakaros, edakarosi aapei ka ngitunga a Yuda.

⁶Eyaanarete kesi ngisipaan a ngamesekin ka ngaatuk asakarea Ekapolon Akuj, nakaneni nyeanyunete ngesi, kainyo aisiki ngesi kesi.

⁷Nyeliworo kesi lu emunoi ani a Akuj, kainyo eraakasi ngide kech ngika elomit. Tokona bocha, ngisukukui kech lua elap emunyarete kesi ka ngamanat kech.

⁸Tokutakisi aamwara a ejie alo Gibea! Tokutakisi aburuch alo Rama! Tarama elii alo Betapen![5] Ngitunga a Benjamen, tolomasi lojie!

⁹Eliwor Isirael alaireng akolongit na a eriras. Ngisirael, esubakinosi nugu dir!

¹⁰Ebala Ekapolon Akuj kona, “Esiyotoosi ngikarikok a Yuda ekukuoru a akwap abukokini ayong kesi anyunyura kang loger a ngakipi.

¹¹Ichiekiaritae Isirael, etikioritae anitubet ngakiro, kainyo aneikina ngesi ngakiro napasiek.

¹²Ekoni ayong ngakimam ani a Isirael, ekoni ajeme ani a Yuda.

¹³“Na engolikinea Isirael edeke keng, kingolik Yuda ngajemei keng, abu Isirael tolot Asiria atamar kengarak ekapolon loapolon, nakaneni nyitojoka ngesi kesi, kori nyitangalekino ngajemei kech.

¹⁴Agirakina ayong Isirael ka Yuda loger a engatuny. Ayong ilope atubonori kesi eala emiek kaneni. Ani eurukukuyori ayong kesi, emam itwaan eyuuni kesi.

¹⁵“Abongori ayong nipalem kang, tanang elimorete akisech kech, katasaka ayong. Tokona ngon mati ketinga ngichan, ngesi isiakineta akisak ayong.”