Read turkana Osea 6 Bible Online

Osea 6 - turkana bible

Osea 6

¹Ebalasi ngitunga, “Potu, kapana atobongosi nia Ekapolon Akuj! Kainyo kiwan ngesi ngoni sodi kitangalekinio. Kiram ngesi ngoni sodi toenea ngajemei yok.

²Adaunet a ngirwa a ngiarei, kisikwaruni ngesi ngoni. Ani akolongit na ngauni, kiteyaru, sodi atoyareta alongaren keng.

³Potu atoyena Ekapolon Akuj, erichakinos lokojokon atoyena ngesi. Erai abunere keng niyok aka dir loger a abaiaret. Ebuni niyok loger a akiru, ee robo, loger a akiru ana a ngirupei ana itapapali ngalup.”

⁴Nakaneni ebala Ekapolon Akuj, “Anukiro kasubakinea esi Isirael ka Yuda? Amina kus anikang, ikoni edou lo ataparach, ikoni eloch lo engopiari nataparach.

⁵Kotere ngakiro nguna, ameu ayong ngikadwarak atotuborea kesi. Amunya ayong kesi a ngakiro a akituk kang. Ilereete ngakiro na asaki ayong.

⁶ Kainyo asaki ayong amina na nyedaun, meere ngakipeyos a ngibaren. Asaki esi kitoyena ayong, akidwang akipeyonokin ngakipeyos na inomio.

⁷“Ani napei anangeta kesi nakwap a Adam, tosecha achamunet nakichamakin ka kesi. Nyeliworo kesi lu emunoi kaina.

⁸Erai Gilead ere a ngikasechak, ka ngikaarak.

⁹Echunakina ajore a ngimurok loger a ngirukooi alu edukito eperunito itwaan. Earete ngitunga eloose Chekem ni italeunitoe. Ee robo, nguna daang iyechakinito!

¹⁰Engolik ayong ibore niti kitubuli alo Isirael. Aliworosi ngitunga lu nyitaleuno ani ilipitotor ngakujo nagelayek.

¹¹“Ani eliwor esi ngitunga a Yuda, atiaku ayong akolongit nakeriraa esi dang, kotere nguna isubete.”