Read turkana Osea 7 Bible Online

Osea 7 - turkana bible

Osea 7

¹“Nacha asakea akitajakaan ngitunga kang Isirael, Nacha asakea akitangalekin edeke kech, kileereu aronis a Isirael, ka ngasechesea na esubete kesi. Ingalasi kesi make, ebwangete ngakais tokokoa, nabo etubonokin ngitunga alorotin tokokoa.

²Nakaneni nyitamunete kesi jik atamar etamunit ayong ngakiro kech daang naaronok. Nakaneni eriama ngasechesea kech kesi, tarai etee ayong kesi.”

³Ebala Ekapolon Akuj kona, “Italakanarete ngitunga ekapolon a ngakiro kech anaaronok esubete, kitalakasi ngikarikok a ngakiro anaaronok ana etukosi.

⁴Eraakasi kesi daang ngikalomak. Erirae arem kech loger a akim alokeno, ana imiekini akepon akikuny tanang ni idorokinio amugati.

⁵Akolongit a esukukuu a ekapolon, kilewa emuna ngesi ka ngikarikok luche, kitabangaania emuna kesi.

⁶Toriraut[6] kesi a ngakiro ana etukosi loger a ekeno. Tonok angoit kech akwaar kiiya, ani iwalari toliwor asarae.

⁷“Kotere arirau a angoit kech, taara ngikapolok kech. Aar kesi ngikapolok kech daang a ngapei-pei, nakaneni emam tani itwaan ipei ni kelipi ayong jik.”

⁸Ebala Ekapolon Akuj, “Ikote Ngisirael amugati na nyibelukwaaritae, igienosi kesi ngitela lu iriamito kesi.

⁹Nyeyenete kesi atamar ademasi ngibukui kesi ngikilinga, nyeyenete atamar apena ngakorwo nakies kech.

¹⁰Ekinis a Ngisirael ngesi alimo kesi, tarai nyebonguno kesi nikang a Ekapolon Akuj ana arai Akuj kech.

¹¹Ikoni Isirael akuuri. Ebangaana ngesi itwangi. Enyarit ngesi Misiri jiik, tokeri nia Asiria!

¹²Nakaneni apetakini ayong epuute esurum kesi eloose loger a ngikieny. Erirae ayong kesi kotere naaronok esubete.[7]

¹³“Oitiakoi! Abe etioko nginyas eanyunete kesi, kainyo kaisikis ayong! Emunyario kesi, kainyo kangero kesi ayong! Adikino ayong ayuuni kesi, nakaneni kamodito kesi ayong.

¹⁴Nyekegoronokinete kesi ayong a ngitai kech, pearai iremasi kimasanakin nalup, loger a ngitunga alu nyeyenete Akuj. Esakete kesi ngikinyam ka emuna na ilipeta, edungudungosi loger a ngitunga alu nyeyenete Akuj. Kangerito kesi ayong!

¹⁵Ayong kolong etopolouni kesi etogogong, tarai kanyoikinito ayong anaaronok.

¹⁶Areasi kesi nia Baal, ikwaan kesi ka akau na emagul. Eario ngikarikok kech alojie kotere ekiwog a ngakituk kech. Ekianatar Ngimisiri kesi.”