Read turkana Osea 8 Bible Online

Osea 8 - turkana bible

Osea 8

¹Ebala Ekapolon Akuj, “Tokutakisi aburuch! Atikokin ngimoe akwap kang loger a ngataruk! Kainyo ngitunga kang, echwangakis achamunet kang.

²Kegoronokinete kesi ayong ebalasi, ‘Akuj kosi, kiyeni sua Ngisirael iyong,’

³tarai angero kesi naajokak. Kotere ngakiro nguna, irisete ngimoe kesi.

⁴“Aseunete kesi make ngikapolok, nyitoruno nikang. Toseut ngikarikok peayeni ayong. Tolemut ngakwangae kech ka egolit, tosubuneta ngakujo nasubuna, na inyasunete kesi ngikulepek.

⁵Ekoe Samaria, aremokino ayong itaok ni egolit ni ilipit iyong. Ketililito kesi ayong. Ori epalikineta kesi akilipit ngakujo nasubuna.

⁶Esubunit Esiraelit akuj na nyerai Akuj. Itaok ni egolit ni ilipitae alo Samaria, ebwangio kielar!

⁷Ani itakinete kesi ekuwam, elemete ekuwam lo ipiripiri. Ngikinyam lu nyielarete, nyekoniunete akimuj. Arai tokoniu dang, kenyamito ngitunga a akwap anache.

⁸Elikor Isirael ekwaanikin ka ngibukui luche, ekok agulu nabwangang.

⁹Esubi Isirael ngakiro keng a ilope loger a asikiria anakaturonon. Alot ngesi Asiria akingarakino. Atach ngibukui luche kiyokiyoto ngesi.

¹⁰Tani bo kegielara kesi lobukui, achunakini ayong kesi atipei erira. Eriabakinosi kesi nikaapilan na ichiekiarea ekapolon a Asiria kesi.

¹¹“Kona adukioto Ngisirael ngikenoi a ngakipeyos lukaalak lu elemarere ngasechesea, alalaketa ngikenoi lu itosechete kesi.

¹²Arai kolong egir ayong ngitalio lukaalak kotere ngitunga lugu, kengerito tamasi ngigelayek.

¹³Eminasi kesi akipeyore ngakipeyos, ipeyoote akiring ani erumor tanyama. Nakaneni ayong Ekapolon Akuj nyalakara kotere kesi. Etamuni tokona ayong akisech kech, erira kesi kotere ngasechesea kech. Abuari ayong kesi Misiri toliworos ngikedalak kaina!

¹⁴“Aduko Ngisirael ngakais a ngikapolok, emuriak kesi Akasubunan kech. Aduko ngitunga a Yuda ngirerea lua ngawasea. Nakaneni ameuni ayong akim tonomia ngirerea ngulu, ka ngawasea kech nakaagongok.”