Read turkana Osea 9 Bible Online

Osea 9 - turkana bible

Osea 9

¹Ee Ngisirael, warasi nyiilakarosi! Nyiichurokis loger a ngibukui aluche. Iliworosi esi lu nyikimunoi, ingero esi Akuj kus. Iminakis esi agialanot loger a amalaat, awadaang anidaet ngakanoi.

²Nyeringa ngitunga eanyunete akimuj anidaet ngakanoi ka nichiet emuna. Engopikini kesi emuna lokitetet.

³Nyidongete kesi nakwap a Ekapolon Akuj, pearai ebongorete Misiri, tanyama akimuj na italeo akinyam alo Asiria.

⁴Anakwap anagela kangina, nyelemikinete kesi Ekapolon Akuj ngakipeyos a emuna, kori nyitalakarete ngakipeyos kech Ekapolon Akuj. Ikokini akimuj kech na ngapunyas. Itwaan daang nicha enyami toliwor ni nyitaleuno. Eliwor akimuj kech aka akoro kech bon, nyeyaario kai a Ekapolon Akuj.

⁵Anukiro isubakinete esi na enangea ngirwa a esukukuu, akolongit a akimuj anakaalan a Ekapolon Akuj?

⁶ Tani kepetarosi kesi tobucharos aloriras, echunakini Misiri kesi tonuk Mempis kesi. Ebari kech lo a ngakwangae, eliwor aka ngirega, ani ngawiyei kech, torup edoan kimuk.

⁷Apot ngirwa a eriras, toriamut ngitunga atachanot a ngakiro ana asubete. Eanyuni Isirael nguna na esubakinotor! Kotere alalau a ngasechesea kus, ka amoitanut kus, ibalasi esi, “Ebangaana ekadwaran, itwaan ni erikit etau a Akuj, ekoporito ngikerep.”

⁸Kameunit Akuj ayong arai ekadwaran, ekilak ngitunga keng Ngisirael. Tarai nicha etori ayong daang, kilokakinito esi ayong loger a ikeny. Nakwap a Akuj a alope ngesi iremitotor esi ekadwaran keng.

⁹ Enyasunosi kesi lokojokon kotere naaronok esubete, loger lokolong asubete alo Gibea.[8] Itamuni Akuj aronis kech, kirira kesi kotere ngasechesea kech.

¹⁰ Ebala Ekapolon Akuj kona, “Aanyuni kolong ayong Isirael, loger lo eanyunere ngamusabib anariet. Engolikini kolong ayong taapaakech, loger lo egiparere ngameyana na ekoniunete ekingaren. Nakaneni ani epote kesi moru a Peor, kisiakis akilip Baal. Tarata kesi lukikadakinete loger lopei a ngakujo ana eminasi kesi.

¹¹Eporori ekipur a Isirael loger a ikeny. Engopi akidounun alo Isirael, nyeringa nabo ngaberu epotiyete, nyeringa ngide epotiunio!

¹²Tani kitanut kesi ngide, alemari ayong nyeesidong tani ipei. Oitiakoi! Abe etioko nginyas eanyunete na aisikinea ayong kesi!”

¹³Engolik ayong ngide a Isirael irikao. Ejoikinit Isirael erikori ngide keng ni earere.

¹⁴Ekapolon Akuj, nyo atamari tosubakinea kesi? Kitokolupan kesi! Kitoonik ngisikin kech!

¹⁵Ebala Ekapolon Akuj kona, “Esiakini aronis kech daang alo Giligal. Inaa kolong aremokinor ayong kesi jik. Kotere ngakiro naaronok asubete kesi, eritari ayong kesi anakwap kang. Nyeringa nabo aminakini kesi jik. Ngikapolok kech daang kangero ayong.

¹⁶Ekok Isirael ekitoe lo etel, lo aoniyosi ngaten na alokwap, nyeringa ekoniuni ageor. Tani keureta kesi ngide, aari ayong ngide kech lu eminae.”

¹⁷Engeri Akuj kang ngitunga keng, kainyo nyiirara kesi ngakiro keng. Eliworosi ewowooto alokiding ngibukui.