Read turkana Yoel 2 Bible Online

Yoel 2 - turkana bible

Yoel 2

¹Tokutak aburuch, taram eli, alo Sion emoru a etal. Tamaranikisi ngitunga daang a Yuda! Kainyo aapuu akolongit a Ekapolon akuj.

²Eliwor akolongit a aribu nabo kidiisikinite, epete ngidowon nabo kirioner akwap chuch! Ebuni ajore nakaalan a emaase, loger a aribu ana epetakin lomoru, elal ajore na emaase ngina noi nabo etiono, emam ibore iche ekok neni nakanuan, nakaneni emam nabo iche ni ikokini neni.

³Enyami emaase ngolo ngikito loger a akim. Ikoni akwap alongaren kech amana a Eden, ikoni akwap anaabor kech ariet nakoonon. Emam ibore ebuchi kesi.

⁴ Ikwaan kesi ka ngangolei, nabo ekerete loger a ngangolei ana ejie.

⁵Ani na eporioto kesi tananga naitae a ngimoru, ikoni erue kech lo a ngakejen a ngaurukukui ana irito ngangolei, eruosi kesi loger a nginyia alu enomit akim. Erekina kesi loger a ajore anakaalan ana esukit ejie.

⁶Ebuli ngitunga na ingolikineta kesi, esechasi ngitunga daang ngireetin.

⁷Eloose kesi ngaren loger a ngitunga alu ejwoko, edokete kesi ngawasea loger a ngasigerea. Erubakinito daang eloose ngaren nakaneni nyereasi alorot,

⁸kori emam lo epedori akinang loche elosi epei kech daang iwapit erot keng, nakaneni emam ibore iratakini kesi.

⁹Ematarosi kesi lore, ekerete anawasea, edokete ngakais sodi tolomasi kitoro lopukei a ngakais loger a ngikokolak.

¹⁰ Emaranikini akwap na eapuuneta kesi, emaranikini tani adis. Eribokini akolong ka elap, nabo tojongoto ngikanyer akicha.

¹¹Ikeuni Ekapolon Akuj ngakiro na edungokini ngasigerea keng. Elalak ngasigerea na iwapito ngakiro keng, nabo etioko. Eliwor akolongit a Ekapolon Akuj naketubulon! Ngae epuun akolongit ngina?

¹²Ebala Ekapolon Akuj, “Tani tokona tolunga ngasechesea kus dir, tobongut nikang, ironeenete akimuj ka akigoro ta akialolong.

¹³Kikokisi ngitunga lu ibeleto ngitai kus, idodiunito akialolong kus, nyitemokino akichil ngiworui bon.” Tobongutu nia Ekapolon Akuj ana erai Akuj kus. Ejakaana ngesi nabo erai na a ngisien, nyengoyeene ngesi atipei, nabo iyoonokini ngakichikakinet keng, esaki ngesi jiik arimakin ngasechesea, meere akirirare.

¹⁴Kori robo epedori Ekapolon Akuj na erai Akuj kus akiloch ngakiro keng, sodi kitopia esi kiinak akimuj nakaalan, tolemikineta esi ngesi ngakiria ka emuna.

¹⁵Tokutakisi aburuch alomoru a Sion, tolimokisi ngitunga atamar torono akimuj, nabo tolimokis atamar kiriama wapei!

¹⁶Kisiriamariama ngitunga daang wapei, kisiriamariama kesi lokiriam a Akuj, yautu ngikasukou, kisiriamariama ngide, ka luuchik lu enakete. Tani ngitunga lu been aringa iutasi, ejoikinit eisikinete ngakais kech pot.

¹⁷Kimiekisi ngimurok lu esubete etich a Ekapolon Akuj alokiding ekeno a ngakipeyos a Akuj anikalapatan akai a Akuj, kikalout. Kimiekisi kilipa tamasi, “Torimak ngitunga kon Ekapolon Akuj. Tochoite ichamuni ngibukui luche kimenyete sua, sodi kitokianatar ebalasi, ‘Nyaani Akuj kech?’ ”

¹⁸Sodi tominak Akuj akwap keng, torimak ngesi ngitunga keng.

¹⁹Tatachak Ekapolon Akuj kesi tama, “Kainakini tokona ayong esi ngakiria, ka emuna ta akimiet, sodi kimwoko. Nyeringa nabo ngibukui luche kimenyete esi jik.

²⁰Etwarakini ayong emaase lo abuni alokwap, atachada nialonan anikus. Etwarakini ayong ngiche kech toloto nariet. Itwarakinio ngajorei na ingarenete tolomasi nanam a Amakat. Ani ngajorei na isidiyete, itwarakinio tolomasi nanam a Mediterenian. Ebosunete ngawat kech nakatoak. Enyasuni ayong kesi kotere ngakiro daang na kisubeta kesi esi.

²¹“Esi ngalup, warasi nyikibul, nakaneni talakaros sodi tarama elale, kotere ngakiro daang na kisubea esi Ekapolon Akuj.

²²Esi ngitieng, warasi nyikibul, elibito ngaroatin, akoniut ngikito ageor, nabo alalaketa ngameyana ka ngamusabib.

²³“Talakaros robo ngitunga a Sion, talakaros kotere ngakiro daang na kisubea esi Ekapolon Akuj na erai Akuj kus. Kiinu ngesi esi akiru na a ngirupei[1] na itemokino, kiinu ngesi esi akiru na a ngakiporosea na isiauni akiram ka na erami ekisidi.

²⁴Ilelebun ngimomwa lojemu lu eramere, nakaneni ilelebun emuna ka akimiet loboro.

²⁵Kabuakini ayong esi ibore daang nikolong erikari emaase anamanat kus. Ayong kolong ameuni ajore kang nikus.

²⁶Ianyunete tokona esi akimuj nakaalan tanyama kimwoko. Ipuruunete esi Ekapolon Akuj na erai Akuj kus, na kisubea esi ngakiro naajokak noi. Nyeringa ngitunga kang imenyio nabo jik.

²⁷Sodi toyena esi Ngisirael atamar ayei ayong kiding kus, nabo toyena atamar ayong Ekapolon Akuj, ngesi arai Akuj kus, emam Akuj ache. Nyeringa ngitunga kang imenyio nabo jik.”

²⁸ “Ani ekisidi, abukokini ayong itwaan daang etau kang, edwarete ngide kus lusapa ka lupesur. Irujaate ngikasukou kus, taanyungasi ngisorok kus ngakisingolikinet a Akuj.

²⁹Ngirwa ngulu, abukokini ayong etau kang tani lokasubak etich kus lukiliok ka luberu.

³⁰“Nakaneni asubi ayong ngakitoodikinet nakailiilok anadis ka akwap daang, epete ngaakot ka akim ta apir a apuru.

³¹ Isirionio akolong chuch, erenger elap puu kikok ngaakot, eringa akolongit naationon noi naketubulon a Ekapolon Akuj nyenanga.

³² Nakaneni ani itwaan ni ilipi enyarit ekiro a Ekapolon Akuj, eyuunio. Loger lo alimunio Ekapolon Akuj kona, ‘Epuunosi ngitunga ngiche alo Yerusalem, eyuunosi ngitunga lu aseuni ayong.’ ”