Read turkana Yoel 3 Bible Online

Yoel 3 - turkana bible

Yoel 3

¹Ebala Ekapolon Akuj kona, “Abuuni ayong ajokis a Yuda ka Yerusalem, ngirwa ngulu ka akolongit ngina,

²esiriamiriami ngibukui daang, sodi ayau kesi nadipo a Eriras. Erirae ayong kesi kaina kotere ngakiro daang na asubeta kesi ngitunga kang. Apetasi kesi Ngisirael nakwapea nagelayek, sodi totiakanakinos kesi akwap kang Isirael.

³ Eleto kesi ngisigira esakete akiyen atamar, ngae anikech itiliwori ngitunga kang ngirikon keng. Agielarete kesi ngide lusapa togieleta ngamalaae, ani lupesur togieleta emuna lo epuritoe.

⁴“Nyo tokona isakete esi asubea ayong, esi Tiro ka Sidon, ta ngiwaitin daang a akwap a Pilistia? Eyei ibore kang isakete esi akitach a? Ani kitach, katachakini ayong esi atipei!

⁵Kainyo ilemasi esi ngaropiyae kang ka egolit, nabo iyaasi ebari kang nakais a ngakujo kus.

⁶Igielasi esi ngitunga a ngirerea a Yuda ka Yerusalem, igielakis Ngigirik ani isaketa achadar kesi anakwap kech.

⁷Abuuni tokona ayong kesi anakwapea ana kolong igielarete esi kesi. Kasubea ayong esi ngakiro nakolong isubeta esi kesi.

⁸Agielari ayong talokookus ka tanakookus, atogielak ngitunga a Yuda. Egielakinete kesi ngitunga a Sabea, lu eraakasi ngitunga a akwap ana elona noi. Ayong Ekapolon Akuj alimu nguna.

⁹“Tolimokisi ngibukui akiroit naga, ‘Tonyoutu lojie, tanyarautu ngikiliok lukajwok, tochunakisi ngasigerea kus daang tonyout toloto!

¹⁰ Kitiaka ngasua nakiteat toliworos ngilengea lujiet, ani ngilengea lulemet ngamanat, kipenae toliworos ngakwaaras. Ejoikinit tani nipalag etamari, ‘Arai ayong ekajwon.’

¹¹Potu atipei ngibukui daang, tochununos alowaitin kadaang sodi atochunakinos nadipo.’” Tomeu kare Ekapolon Akuj ajore kon bu kitiji kesi.

¹²“Ejoikinit ngibukui daang enyounete, sodi potu nadipo a eriras. Eboikin ayong Ekapolon Akuj inaa, erira ngibukui daang lu echununa alowaitin kadaang.

¹³ Eroko kesi noi, totubosi kesi loger a ngimomwa alu etubio na elemere ngamanat. Tochiutu loger a ngamusabib ana echiyo anibore anichiet emuna ileleba, tanang emuna lo epuritoe ipichun tobukor.”

¹⁴Eyakasi ngasepicho a ngitunga nadipo a eriras. Neni ngesi eapuunea akolongit a Ekapolon Akuj.

¹⁵Eribokini akolong ka elap, sodi tojongoto ngikanyer akicha.

¹⁶ Irurumae Ekapolon Akuj alomoru a Sion, ikeari etoil keng alo Yerusalem, emaranikinete akwap ka adis. Nakaneni Akuj erai akaean a Ngisirael, nabo iyoki ngesi ngitunga keng.

¹⁷“Sodi toyena esi Ngisirael atamar ayong arai Ekapolon Akuj na arai Akuj kus. Eboi ayong alo Sion, alo erai emoru kang lo etal, Eliwor Yerusalem ere a etal, nyeringa nabo ngitunga a ngakwapea anache elemarete ere ngolo jik.

¹⁸“Ngirwa ngulu, ilelebun emuna lomoru, nabo toleleta ngakile alomukur. Epete ngakipi nakaalak nangololin daang a Yuda. Eleleuni eitanit alokai a Ekapolon Akuj, sodi tolelek adipo a Ngiwo.

¹⁹“Eliwor Misiri ariet, nabo toliwor Edom aro pas, kainyo etijiete kesi ngitunga a akwap a Yuda, sodi taara ngitunga lu amam ibore asechito.

²⁰Nakaneni ibooyete ngitunga alo Yuda ka Yerusalem nakajik,

²¹ebusi ayong ngaakot alo aario. Nyemiekini lu esechito. Nakaneni eboikin ayong, Ekapolon Akuj moru a Sion.”