Read turkana Amos 1 Bible Online

Amos 1 - turkana bible

Amos 1

¹Eraakasi ngakiro nugu ngaka Amos alo arai epei a ngikeyokok a ere a Tekoa. Ngikaru ngiarei eringa arikirikokin a akwap, kidodik Akuj Amos ngakiro nugu kotere Isirael, ngirwa lu araakar Usia ekapolon a Yuda, tarai Yeroboam lokookeng a Yoach ekapolon a Isirael.

² Tolim Amos tama, “Irurumae Ekapolon Akuj alo Sion, egiro etoil keng alo Yerusalem. Aono achokor, aoko nginyia alomoru a Karimel.” Siria

³ Ebala Ekapolon Akuj kona, “Kona esecheeneta ngitunga a Damasko jiik, nyabuari ayong eriras kech, kainyo epudaarete kesi ngitunga a Gilead a amoitanut.

⁴Kotere ngakiro nguna, ameuni akim kai a ekapolon Asael, sodi enom ngawasea nakaagongok a Benadad.

⁵Abwangabwangaari ayong ngidorin a Damasko, atolema ngitunga lu ibooyete anadipo a Apen ka ekapolon a Beseden. Erikio ngitunga a Siria tarata ngirikon anakwap a Kir.” Pilistia

⁶ Ebala Ekapolon Akuj kona, “Kona esecheeneta ngitunga a Gasa jiik, nyabuari ayong eriras kech, kainyo ewokorete kesi ngitunga etia ni etia, togielasi lotunga a Edom toliworos ngikedalak.

⁷Kotere ngakiro nguna, ameuni ayong akim nawasea a Gasa, tonomia ngawasea keng nakaagongok.

⁸Ekisari ayong ngitunga lu elomito lore a Achidod, ka lu epolokinito ere a Achikelon. Erirae ayong ere a Ekiron, emunyario Ngipilisti lupiyayek daang.” Tiro

⁹ Ebala Ekapolon Akuj kona, “Kona esecheeneta ngitunga a Tiro jiik, nyabuari ayong eriras kech, kainyo arikete kesi ngitunga etia ni etia togielasi lotunga a Edom, nyiitamut kesi achamunet a ekaitotoonu nakolong ekongete kesi.

¹⁰Kotere ngakiro nguna, ameuni ayong akim nawasea a Tiro tonomia ngawasea keng nakaagongok.” Edom

¹¹Ebala Ekapolon Akuj kona, “Kona esecheeneta ngitunga a Edom jiik, nyabuari ayong eriras kech, kainyo erisete kesi talokaatokech[1] a ngakwaaras, emam ngisien. Totinenik angoit kech eyei, ee robo, torubak anyunyura kech jik.

¹² Kotere ngakiro nguna, ameuni ayong akim lore a Teman. Enomi ayong ngawasea nakaagongok a Bosira.” Amon

¹³ Ebala Ekapolon Akuj kona, “Kona esecheeneta ngitunga a Amon jiik, nyabuari ayong eriras kech, kainyo apuonorete kesi ngaberu na epotiyete na alomito Gilead alojiesinei alu asaketa anyaar ngikukuorin kech.

¹⁴Kotere ngakiro nguna, ameuni ayong akim nawasea a Raba, tonomia ngawasea keng nakaagongok. Emini echale akolongit na ejie, toneteun ejie loger a ekuwam aloapolon.

¹⁵Erikio ekapolon kech aapei ka ngikarikok keng.”