Read turkana Amos 2 Bible Online

Amos 2 - turkana bible

Amos 2

¹Moab Ebala Ekapolon Akuj kona, “Kona esecheeneta ngitunga a Moab jiik, nyabuari ayong eriras kech, kainyo enomete kesi ngakoyo a ekapolon a Edom toliworos ekuron. Apot nyeeriakas ekasian ngolo.

²Kotere ngakiro nguna, ameuni ayong akim nakwap a Moab, sodi enom ngawasea nakaagongok a ere a Kerios. Etoakete Ngimoab alochale a ejie, alokiding akirema ka erue a aburuch.

³Atubori ekapolon alokiding kech ataar ngikarikok a akwap daang.” Yuda

⁴Ebala Ekapolon Akuj kona, “Kona esecheeneta ngitunga a Yuda jiik, nyabuari ayong eriras kech, kainyo angero kesi etal a Ekapolon Akuj, nyirichakina ngakitatamet keng. Etooliyosi ngakujo na alioko kesi, nakolong ewapito taapaakech lungorok.

⁵Kotere ngakiro nguna, ameuni ayong akim nakwap a Yuda, tonomia ngawasea nakaagongok a Yerusalem.”

⁶Ebala Ekapolon Akuj kona, “Kona esecheeneta Ngisirael jiik, nyabuari ayong eriras kech, kainyo agielanarete kesi ngulu etenooko, lu akuruwori akitach ngamichae kech. Egielanarete lukebootok lu akuruwo akitach ngaropiyae a ngamuk.

⁷Ipudaate kesi lukebootok loger a apua. Ijukarito lu ichanasi alorot. Iteperete ekile ka apakeng akedalan apei, ani aloger kangolo, kinyasut ekiro kang lo italeuno.

⁸ Eperete kesi alokenoi a ngakipeyos kadaang, topetakis ngiworui lu edemunitae ngikebootok idaritere tatacheta ngamichae. Alotooma akai a akuj kech, emaase kesi emuna lo idiaunete alotunga alu earito ngamichae kech.

⁹“Tarai kolong amunyari ayong Ngiamor kotere kesi. Ngiamor lu aoyak loger a ngichekereng togogong loger a ngichokei. Enyasu ayong ageor alokidiama ka ngaten na ngalup.

¹⁰Kepuduni kolong ayong esi alo Misiri, katorik anariet a ngikaru a ngitomwon-omwon sodi tolemareta akwap a Ngiamor.

¹¹ Aseuni kolong ayong talokookus ngiche toliworos ngikadwarak, ani ngisorok kus ngiche toliworos lu ikongito akitaleun[2] ani a Akuj. Peekote neni dir Ngisirael a?”

¹²“Nakaneni ngitunga lu ekongito akitaleun ani a Akuj, ipot esi kitamata emuna, dio todungokis ngikadwarak tamasi, ‘Nyiidwar.’

¹³“Kingolikisi, katikokini ayong esi nalup, loger a aurukuk ana inuito ngalemet.

¹⁴Edolio tani lukapiranak, elilimiyorete lua ngikilinga, nyeyuunosi tani lukajwok.

¹⁵Nyeweikini ekajwon a ngimalea a amod. Nyeyuun tani ni epirana, kori nyeyuun tani ni emeat angole.

¹⁶Tani asiger nakaadengan alokiding luche lukajwok, echakakini ngiboro nalup tamatar akolongit ngina. Ayong Ekapolon Akuj alimu nguna.”