Read turkana Amos 3 Bible Online

Amos 3 - turkana bible

Amos 3

¹Ee Ngisirael, topupokisi akiroit naga, na alimu Ekapolon Akuj kotere ebukut lokolong epuduni ngesi alo Misiri.

²“Esi make kayeni ayong alobukui a ngakwapin kadaang. Kotere ngakiro nguna, kerirae ayong esi kotere aronis kus daang.

³“Enyounete ngitunga ngiarei alotoru peetukito sek akiriamun a?

⁴Irurumakini engatuny anamoni peirumunit ibore a? Ingoorakini itaok a engatuny ani eurenea peirumunit ibore a?

⁵Isurumi eloit ikeny peelokakinitae a? Edetakin eloit peisurumit ibore a?

⁶Ekutakinio aburuch a ejie alore peemito ngitunga a? Epote ngakiro naaronok lore peerai Ekapolon Akuj emeunit a?

⁷Iteni Ekapolon lo erai Ekapolon Akuj, nyesubakini ngakiro nyidodikina ngikadwarak, lu eraakasi ngikasubak etich keng.

⁸Na irurumakinea engatuny, ngae nyeemi? Na iruorikinea Ekapolon lo erai Ekapolon Akuj, ngae nyedwari?”

⁹Tolimokisi lu elomito nakais a ngikapolok alo Achidod ka Misiri kona, “Tochunakinos lomoru lu iriamito akwap a Samaria, kingolikis ekurikur lo eyei neni, ta ngitunga lu ichiekiaritae kaneni.”

¹⁰Ebala Ekapolon Akuj kona, “Nyeyenete ngitunga lugu akisub ngakiro na iyookino. Ngiboro lukokoa ka lu edemunitae ngitunga kesi ilelebito nakais kech naapolok.

¹¹Kotere ngakiro nguna, iriamete ngimoe akwap kech, tobwanga ngawasea kech nakaagongok, sodi tokokoa ngakais kech naapolok.”

¹²Ebala Ekapolon Akuj kona, “Eger lo ekopunio ekeyokon ngakejen a ibarasit ngaarei, kori echilet a akit a ibarasit anakituk a engatuny, eger lopei ngolo eyuunere Ngisirael lupiyayek lu elomito Samaria. Ngisirael lu tokona ileteletasi alokicholongo aluapolok ajokak.”

¹³Ebala Ekapolon Akuj na irai Akuj Namerikanyer, “Kiira sodi kichikichik ngalesea a Yakobo,

¹⁴ atamar akolongit na eriraa ayong Ngisirael kotere ngasechesea kech, enyasuni ayong ngikenoi a ngakipeyos lu eyakasi Besel. Etuborio ngaamwar a ngikenoi tachakakin nalup.

¹⁵Ayatari ngakais na akiporo aapei ka na akamu. Eukorio ngakais na itokorianitae a ngikel a etom. Inyasunio ngakais naapolok daang. Ayong Ekapolon Akuj alimu nguna.”