Read turkana Amos 5 Bible Online

Amos 5 - turkana bible

Amos 5

¹Ee Ngisirael, kiirasi akiroit naga nakaeonokini ayong esi egoro:

²Adakar, nyeringa enyouni, Isirael na ikwaan ka apese. Emiekin eperi analup, angop itwaan itonyouni.

³Ebala Ekapolon lo erai Ekapolon Akuj, “Ere a Isirael lo emeari ngasigerea abunget apei lojie, ebongunete ngasigerea amiat apei. Ani lo emeari ngasigerea amiat apei, ebongunete ngitomon.”

⁴Isuruori Ekapolon Akuj Ngisirael ebala, “Tasakae ayong sodi toyara.

⁵Nakaneni nyikisakasi ayong Besel, nabo nyiilomasi Giligal kori nyiituborosi toloto Beer-cheba, kainyo erikio ngitunga a Giligal, nabo eliwor Besel pas.”

⁶Tasaka Ekapolon Akuj toyara, nyeenganyunor loger a akim tomunya Ngisirael. Tonomia ngitunga a Besel tongop itwaan itudunge.

⁷ Wae! Ibatasi esi ngakiro na eriyan adwaraketa ekokis apid, ipudaasi nguna etenooko!

⁸Ekapolon Akuj asubi ngikanyer, tosub ngakanyer ka ngikaremok. Ibelukaanari ngesi aribu nakirion toliwor ataparach, kitiribok apaaran toliwor akwaar. Enyaraununi ngakipi a nganamea, tobukok nakwap. Enyaritae ngesi Ekapolon Akuj.

⁹Isimiliaununi nginyas totikokin lua ngikilinga, kinyasu ngawasea kech nakaagongok.

¹⁰Iremito esi itwaan ni ikilaari ngakiro na nyeriyan, iremito itwaan ni iruoro iteni.

¹¹Ipudaasi esi lukebootok idemasi ngalemet kech. Todukito ngakais a ngamoru ana ibesitae. Kotere ngakiro nguna, nyilomete esi nakais na iduko esi a ngamoru ana ibesitae, kori nyimaase emuna a ngamanat anaajokak a ngimusabib ana itakinito esi.

¹²Kainyo ayeni ayong alalau a ngasechesea kus ka aronis a ngasechesea kus. Esi lu iboliatar lu etenooko, tolemete ibore nikidiakitere, toreasi lua ngichan anakiro ana eriyan.

¹³Kotere ngakiro nguna, ililingi itwaan ni echoikina ngirwa ngulu, kainyo eliworosi ngirwa luaronok!

¹⁴Tasaka naajokak toyareta, meere naaronok. Sodi kirukioto esi ka Ekapolon Akuj Naationon loger lo ibalatar kirukit.

¹⁵Toremokinos naaronok, tominakis naajokak. Kirichakisi nguna eriyan alokesio. Tokona ngon, Ekapolon Akuj Namerikanyer, isieniyete Ngisirael lupiyayek.

¹⁶Ebala Ekapolon Akuj Namerikanyer, “Emini akiutere lowaitin daang a ere, etamario alorotin kadaang a ere, ‘Oitiakoi kare! Oitiakoi kare!’ Enyaraunio tani ngiketak kigoro, aapei ka ngikunonoi a akigoro.

¹⁷Emini akiutere namanat a ngimusabib daang. Esubakinosi nguna daang na etorunio ayong kiding kus.” Alimu Ekapolon Akuj nguna.

¹⁸Wae, abe etioko ngakiro eanyunete ngitunga lu imuit akolongit a Ekapolon Akuj! Nyo kiinuni esi akolongit a Ekapolon Akuj? Erai aribu, meere akicha.

¹⁹Ikwaanikin ka itwaan ni ematara alongatuny ani eringa kituturiakin ebu! Kori ikwaanikin ka itwaan ni elomuni kai, ani eringa egongakin losiep a akai, tokony emun!

²⁰ Akolongit a Ekapolon Akuj, eyauni aribu, meere akicha. Irioner akolongit ngina, nyimauni akwangis.

²¹Ebala Ekapolon Akuj kona, “Aremokino ayong ngikiriamisea lua akilip kus, kakadakinito ayong nyakajoikinito.

²²Tani kilemikis esi ayong ngakipeyos kus na inomio ka ngalemet, nyachamuni ayong. Ani ngibaren luatumak ipeyoenete esi eraakasi ngakipeyos a ekisil, nyengolikini jik.

²³Tachadasi echale a ngieosio kus anikang, nyapupokini erue a ngagitae kus.

²⁴Nakaneni kimiekisi ngakiro na eriyan toleleta loger a ngakipi. Ani ateneanut tolele loger a angolol ana ileleba.

²⁵“Ee Ngisirael, ayakasi kolong sek ngakipeyos kipeyonokinete esi ayong ngikaru lutomwon-omwon anariet a?

²⁶Totinga tokona ngakujo kus na isubakis esi, nabe Sakus na erai ekapolon ka Kaiwan na erai akuj nakanyerit.

²⁷ Kotere ngakiro nguna, ketiliwori ayong esi ngirikon kitorikor yaaye Damasko.” Ekapolon Akuj na enyaritae Akuj Namerikanyer alimu nguna.