Read turkana Amos 8 Bible Online

Amos 8 - turkana bible

Amos 8

¹Kedodik ayong Ekapolon lo erai Ekapolon Akuj ngakiro nugu. Engolik ayong akikap a ageor.

²Kengit ngesi ayong tama, “Amos nyooni itee iyong?” Atatachu ayong atama, “Akikap a ageor.” Sodi katolimok Ekapolon Akuj ayong tama, “Adolu esal[5] a ngitunga kang a Ngisirael. Nyeringa nabo ayong alakakini kesi nyirira.

³Akolongit ngina, ilochosi ngieosio a akai a ekapolon[6] toliworos akiutere. Epetakinosi ngawat nakatoak wadaang. Echakario nikalapatan ekiilingat.”[7]

⁴Topupokisi esi lu ibato ngakan, tasakete amunyar ngikebootok anakwap,

⁵ibalasi, “Kori edaunor esukukuu a ngirwa alu eanyungarere elap, atogielareta ngikinyam yok. Ori edaunor akolongit a Sabato esiakisi egielit yok? Sodi engalata ngitunga a ngakitemiet ana alioko, elocho ngakitemiet engalaata ngikagielak.

⁶Atogielasi ngakanoi ngadikidio a ngaropiyae anakaalak. Atasakutu ngikebootok ngidi lu epiyo akitach ngamichae kech, lu epiyo akitach tani ngamuk nadetae, atogiela kesi toliworos ngikedalak yok.”

⁷Ekong Ekapolon Akuj ngina iwogar Isirael, ebala, “Iteni, nyekemuriakinete ayong ngakiro na esubete kesi.

⁸Kotere nguna, erikirikokini akwap, tosutonok itwaan daang ni eyei nakwap. Emaranikini akwap daang, ekurupupuuni sodi todipaar nabo loger a angolol a Nili alo Misiri.”

⁹Ebala Ekapolon lo erai Ekapolon Akuj kona, “Akolongit ngina, etodooyori akolong naparan lotingilan etiribok akwap naparan.

¹⁰Elochi ngisukukui kus tarata asutonokin, elochi ngieosio kus daang tarata akigoro. Ketanapi esi ngiguniae anaaborin, sodi ketulur. Kesikwaanikini esi ka ngikauriak lu igorosi ani atoanea idia ni idounitoe erai ipei bon. Eliwor akolongit ngina aka apipilu tanang losal.

¹¹“Eponito ngirwa lu ayaunea ayong eron a akoro nakwap. Meere robo akoro a akimuj kori meere akure a ngakipi, pearai nakiiraret ngakiro a Ekapolon alo erai Ekapolon Akuj.

¹²Elomarete ngitunga awowoot napei ananam a apei tanang nache, napei alokwap tanang kide. Eliworosi ateni ama, ateni ama, esakete akiroit a Ekapolon Akuj, nakaneni nyeanyunete.

¹³“Akolongit ngina, iridakinete ngisorok lukiliok ka luberu lu ekilikilete kotere akure.

¹⁴Ngulu ikongete a ngakujo a Samaria ebalasi, ‘Ekong tani Akuj a Dan,’ kori ‘Ekong tani Akuj a Beer-cheba,’ edakarosi ngitunga ngulu nyenyounete nabo.”