Read turkana Amos 9 Bible Online

Amos 9 - turkana bible

Amos 9

¹Engolik ayong Ekapolon Akuj ewei alokwaas a ekeno a ngakipeyos. Tolim ngesi tama, “Taram ngakies a ngapirio a akai a Akuj sodi tamaranikis ngatoroma, toukok ngapirio nguna nakies a ngitunga. Ani ngulu idongete ataar a akwara nyeebuchar tani ipei, nyeepuun tani ipei.

²Tani keboka ngapanya toloto lokatoak, edoli akan keng kesi tout. Tani kedokasi nadis, atiyauni ayong kesi.

³Tani keduka anaita a emoru a Karimel, asakari kesi erum kaina. Tani keduka kesi anituluk a anam, adungokini emun loapolon a anam tokony kesi.

⁴Tani keriko ngimoe tarata ngirikon, adunguni atamar taarae a akwara. Ayong cha ka kesi jik anaaronok, meere anaajokak.”

⁵Ekapolon Akuj Namerikanyer, etapi ngalup torikirikokis. Kikalout daang lu elomito neni. Ekurupupuuni akwap daang todipaar nabo loger a angolol a Nili alo Misiri.

⁶Edukit Ekapolon Akuj awi keng nadis, tarap akwap a adis. Echunanakini ngesi ngakipi a nganamea sodi tobukok nakwap. Enyaritae ekiro keng Ekapolon Akuj!

⁷Ebala Ekapolon Akuj kona, “Ngisirael, nyo kitiakit esi ka ngitunga a Kuch*g** anikang? Pekelong epuduni ayong Ngipilisti alo Kirete, epud ngitunga a Siria alo Kir, loger lo kepudunio esi alo Misiri a?

⁸Kingolik a, iteete ngakonyen a Ekapolon alo erai Ekapolon Akuj, iteete apolou a Isirael nakasechan. Enyasuni ayong ngesi tongopia anakwap. Nakaneni nyamunyari ngalesea a Yakobo daang.

⁹“Kingolik a, adunguni ayong akiroit, eakaekak Isirael alokiding ngibukui, loger a ngikinyam anapieset atolema luaronok daang.

¹⁰Ngikasechak daang alotunga kang, eari akwara, ngulu kesi lu ebalasi, ‘Nyikiriamun ka naaronok.’ ”

¹¹ Ebala Ekapolon Akuj kona, “Enangi akolongit na etonyounio ayong apolou a Daudi na ikoni akai na aukor. Adukokini ayong ngikwaasea keng, atobuak loger. Adukokini ayong tobong loger lokolong keng a angorot.

¹²Sodi tolemareta Ngisirael akwap a Edom nasek edongit, ka ngibukui daang lukolong araakasi ngikang.” Ekapolon Akuj alimu nguna, nabo esubakini nguna.

¹³Ebala Ekapolon Akuj kona, “Eponito ngirwa lu ekokioto ngikinyam atipei akidwang ngirwa lulemet. Ekokete ngamusabib nakaalak noi na engopi tani kona echiunere emuna. Idokudokuun emuna lokitetet alomoru alu erupunitotor ngimusabib, eleleuni emuna ngolo alomukur.

¹⁴Abuakini ayong ngitunga kang Ngisirael ekeny kech, toduko kesi nabo ngirerea lukolong enyasuna tokitetenuut, sodi toloma neni. Itakinete kesi ngamanat a ngimusabib tamata emuna kech. Itakinete ngamanat tanyama ngalemet.

¹⁵Adupakini ayong ngitunga kang nakwap kech, nyeringa kesi nabo editunio anakwap ana kolong ainakini ayong kesi.” Ekapolon Akuj na erai Akuj kus alimu nguna.