Read turkana Obadia 1 Bible Online

Obadia 1 - turkana bible

Obadia 1

¹ Ngakiro na adwari Obadia nugu. Eraakasi ngakiro na alimuni Ekapolon lo erai Ekapolon Akuj kotere Edom. Kiira ngoni ngakiro na ayaunio ani a Ekapolon Akuj. Ameun emeanara lobukui, ebala, “Tonyoutu! Tonyoutu etijikisi Edom!”

²Isuruori Ekapolon Akuj Edom ebala, “Ayoro, ketiditeuni ayong iyong alobukui, kimenyario daang iyong.

³Kingal iyong ekinis kon, idukit ere loapolon natabab nakaagongok, ilomit iyong kidiama lomoru, sodi tolim alotau kon tama, ‘Ngae katiyauni ayong nalup?’

⁴Tani kiporonori kidiama loger a egole, tosub idukit akai lokanyer, katiyauni ayong iyong.

⁵“Na eponeta ngikokolak nakwaare, ikwa nyelemanarete ibore ni esakete bon a? Na engerioto ngitunga ngamusabib, ikwa nyimianakinete ngapei-pei a? Ani iyong, kimunyasi ngimoe kon pil.

⁶Ngalesea a Esau, kikokoe esi, kidemar ebari kus!

⁷Kingalata esi ngikibaket kus daang, kiritasi kesi esi anakwap kus. Kitijikis esi ngitunga lu ngoon ichamatar, ngipaalon lu ngoon imoreta esi atubwa, kesi kilokakis esi eloit, ebalasi, ‘Etor bo aosou kech ai?’

⁸“Akolongit na eriraa ayong Edom, amunyari ngikiliok keng lukoosok, enyasu aosou kech daang.

⁹Ee Teman, ebuli ngikiliok kon lukajwok, sodi taarae ngasigerea daang a Edom.

¹⁰“Kotere amoitanut kus ani kata lokaatokus[1] ngalesea a Yakobo, kititingio esi ngileech kikisar anakwap jik.

¹¹Ipotu esi tachadakinos akolongit na ewoketa ngimoe ebarit kech, tobwanga ngitunga lugelayek ngidorin kech tokorakinos ebarit a Yerusalem. Ipotu esi kikwaanikinos ka ngimoe ngulu.

¹²Peachamitae esi ichurosi kotere ngichan a talokaatokus alu a Yuda. Peachamitae esi ilakarosi kotere akolongit na nginyas kech. Peachamitae esi ikianatar kesi anariaba kech.

¹³Peachamitae esi ilomunete lore a ngitunga kang akolongit na aanyunitotor ngakiro naaronok.

¹⁴Peachamitae esi iwaasi ani ichiereta ngirotin akirumun lu esakete akisii. Peachamitae esi ipotorete lu apuunosi nakis ngimoe kech akolongit a ariaba kech.

¹⁵“Aapuu akolongit na atubio ayong Ekapolon Akuj ngakiro a ngibukui kadaang. Ngakiro na isuba esi kesi kisubere esi dang. Kibongokinete esi ngakiro na isubete.

¹⁶Ngitunga kang, kona imaasa esi ibore niadwaran alokopo a eriras alomoru kang alo italeuno, emaase ngibukui daang lu kiriamito esi, emaase kesi kitereterokinos engobarete tosub pekeyakasi kolong.

¹⁷“Epete ngide lu epuunosi moru a Sion, eliwor neni ni italeuno. Elemarete ngitunga a Yakobo akwap na erai akech.

¹⁸Ikokinete ngitunga a Yakobo akim, ee robo, ikokinete ngitunga a Yosep asarae. Emunyarete kesi ngitunga a Esau, loger lo enomiarea akim ngatunyeny. Enomiarete kesi tomunyasi, emam ngitunga epuun alotunga a Esau, kainyo ayong Ekapolon Akuj alimu nguna.

¹⁹“Ngitunga lu epote alokuju Yuda kesi elomete nakwap a Edom. Ngulu epote anaukon ana alo too kesi elemarete Pilistia. Elemarete Ngisirael akwap a Epiraim. Elemarete ngitunga a Benjamen akwap a Gilead ka Samaria.

²⁰Ngasigerea a Ngisirael alu alokwap alu araakasi ngirikon, kesi ebongete toremo Poenike tanang kwap nibe Sarepas. Ngirikon lu eponito alo Yerusalem lu ayakasi Saride, elemarete ngirerea lu alokuju Yuda.

²¹Ngitunga a Yerusalem lu idwangete edokarete moru a Sion topolokis Edom. Ekapolon Akuj alope ngesi eliwor ekapolon.”