Read turkana Yona 3 Bible Online

Yona 3 - turkana bible

Yona 3

¹Kisuruor Ekapolon Akuj Yona na ngaarei tolimok akiroit naga,

²“Tonyou, tolot Ninewi, lore loapolon ngolo, tolimo ngakiro nakalimokini ayong iyong.”

³Sodi tonyou Yona tolot Ninewi, loger losek alimunitor Ekapolon Akuj. Apolot ere a Ninewi, arai ngirwa nguuni elosere napei alowae a epei tanang loche.

⁴ Kisiak Yona alomar lore. Adaunet a akolongit a apei elosi ngesi, toowanik tama, “Idongit ngirwa ngitomwon-omwon tomunyarae Ninewi!”

⁵Tonupa ngitunga a Ninewi ngakiro a Akuj. Tolimut kesi atamar toronoi akimuj, tanapae ngiguniae napei ani eyenikinitae tanang ni nyeyenikinitae.

⁶Tananga ngakiro nguna nia ekapolon a Ninewi, tonyou ngesi alokicholong keng a apolou, tobuto eworu keng sodi tanap ngiguniae kiboikin lokuruon.

⁷Todung ngesi akiroit yaarae lotunga a Ninewi ebeyo, “Adungut ekapolon ka ngikapolok keng luuchik kona: Warasi itwaan cha daang, kori etiengit, kori ibarasit nyiir ibore. Warasi kesi nyiimuja kori nyeemata ngakipi.

⁸Pearai tanapa ngitunga daang ka ngitieng ngiguniae, kigoronok itwaan daang Akuj nikationon. Ee robo, torei itwaan daang alorotin keng aluaronok, tachaka amoitanut keng.

⁹Tokona ngon epedori Akuj kiloch ngitamen keng tojongo angoit lokojokon, nyikimunyaror ngoni.”

¹⁰Ani ingolikini Akuj ngakiro na asubakinete kesi, ka eger lo areeunotor kesi alorotin kech aluaronok, abu kiloch ngitamen keng nyiirira kesi loger losek abalar asubakini.